މޯލްޑިވިއަންގެ ދެވަނަ ޑޭޝް-8 ބޯޓު ވިއްކާލަނީ

މޯލްޑިވިއަން އިން ޑޮމެސްޓިކް ދަތުރުތަކުގައި ބޭނުން ކުރަމުން އަންނަ ޑޭޝް-8 (ޑީއެޗްސީ-8) ގެ މަތިންދާބޯޓެއް ވިއްކާލަން އިއުލާނުކޮށްފި އެވެ.

ގައުމީ އެއާލައިން ހިންގާ، މޯލްޑިވިއަން އިން ކުރި އިއުލާނުގައި ވަނީ އެކަމަށް އެދި ޕްރޮޕޯސަލް ހުށަހެޅުމަށް ހުޅުވާލައިފަ އެވެ. ޕްރޮޕޯސަލް ހުށަހަޅަން ޖެހެނީ މިމަހުގެ 28 ގަ އެވެ.

އެންމެ ބޮޑު އަގެއް ހުށަހަޅާ ފަރާތަކަށް ވިއްކާލަން އިއުލާނުކުރި އިރު ޑިޕޮސިޓެއްގެ ގޮތުގައި އެއްލައްކަ ޑޮލަރު ހުށަހަޅަން ޖެހެ އެވެ. އަދި ސޭލްސް އެންޑް ޕާޗޭސް އެގްރީމެންޓް ޑިޕޮސިޓެއްގެ ގޮތުގައި ތިން ލައްކަ ޑޮލަރު ހުށަހަޅަން ޖެހެ އެވެ. އެ މުއާމަލާތް ހިންގަން ކަނޑައަޅާފައިވަނީ ޑޮލަރުންނެވެ.

މޯލްޑިވިއަން އިން މިދިޔަ އަހަރު ވެސް އެއް ޑޭޝް-8 މަރުކާގެ މަތިންދާ ބޯޓެއް ވިއްކާލި އެވެ. އެއާލައިން 2000 ވަނަ އަހަރު އޮޕަރޭޝަނަށް އައިސް އެންމެ ފުރަތަމަ ބޭނުން ކުރީ ޑޭޝް-8 ގެ މަތިންދާބޯޓުތަކެވެ. އެ ބޯޓުތައް އުފެއްދުން 2010 ވަނަ އަހަރު ވަނީ ހުއްޓާލައިފަ އެވެ.

އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސް ވިދާޅުވީ، ޑޭޝް-8 ގެ ބޯޓުތައް ބާވެ، އާ ކުރުމުގެ މަސައްކަތް އެއާލައިނުން ފަށާފައިވާ އިރު ޑޮމެސްޓިކް ހުރިހާ ދަތުރަކަށް އޭޓީއާރްގެ ބޯޓުތަކަށް ބަދަލުކުރަމުން އަންނަ ކަމަށެވެ.

ވަރަށް އަވަހަށް އޭޓީއާރްގެ އިތުރު ބޯޓެއް ގެނެސް ފްލީޓަށް އިތުރުވާނެ ކަމަށް ވެސް އޭނާ ވިދާޅުވި އެވެ. އޭނާ ވިދާޅުވީ، އޭޓީއާރްގެ އާ ބޯޓުތައް ގެންނަ ވަރަކުން ޑޭޝް-8 ގެ ބޯޓުތައް ވިއްކާލަމުންދާނެ ކަމަށެވެ.

އައިލެންޑް އޭވިއޭޝަނުން ވަނީ 2023 ވަނަ އަހަރު ކުރީކޮޅު "ބްރޭންޑް ނިއު" ތިން އޭޓީއާރް މަތިންދާބޯޓު ގެނެސްފަ އެވެ. މިދިޔަ އަހަރު އެއް ބޯޓު ގެނެސްފައިވާ އިރު އަންނަ މަހު އާ ބޯޓެއް ގެންނާނެ އެވެ. އިތުރު ތިން ބޯޓާ އެކު، އޭޓީއާރްގެ އަދަދު 8 އަށް އިތުރު ކުރާނެ ކަމަށް އެއާލައިނުން ބުންޏެވެ.

ބޯޓުތައް އާ ކުރުމަށް މިހާތަނަށް 70 މިލިއަން ޑޮލަރު (1.1 ބިލިއަން ރުފިޔާ) ހޭދަކުރި އިރު 8 ބޯޓު ގެންނަން ގާތްގަނޑަކަށް 140 މިލިއަން ޑޮލަރު (2.2 ބިލިއަން ރުފިޔާ) ހޭދަވާނެ ކަމަށް އައިއޭއެސް އިން ލަފާކުރެ އެވެ.

އެއާލައިނުގެ ފްލީޓުގައި މިވަގުތު 25 އެއާކްރާފްޓު ބޭނުންކުރެ އެވެ. އޭގެ ތެރޭގައި ޑޭޝް-8 އާއި އޭޓީއާރް އާއި އެއާބަސް އޭ330 އާއި އޭ320 ބޯޓެއްވެސް ހިމެނެ އެވެ.