ޒަމާނީ ޑިޖިޓަލް އައިޑީކާޑެއް ތައާރަފްކޮށް، ޒާތީ މައުލޫމާތަށް އެކްސެސްވާ ނަމަ އެނގޭ ގޮތް ހަދާނަން: މިނިސްޓަރު

ޑިޖިޓަލް އައިޑީކާޑް ތައާރަފު ކުރުމުގެ މަސައްކަތް ކުރަން ރައީސް ޑރ. މުހައްމަދު މުއިއްޒު އިރުޝާދު ދެއްވާފައިވާ ކަމަށާއި އެ ކާޑް ބޭނުންކުރަން ފެށުމުން، އެއްވެސް އިދާރާއަކުން އެއަށް އެކްސެސްވާ ނަމަ، އެ މީހަކަށް އެނގޭނެ ކަމަށް ހޯމް ލޭންޑް މިނިސްޓަރު އަލީ އިހުސާން ވިދާޅުވެއްޖެ އެވެ.

ޕީއެސްއެމުން ރޭ ބޭއްވި ފޯރަމެއްގައި ވާހަކަ މިނިސްޓަރު އިހުސާން ވިދާޅުވީ މި ޒަމާނަށް ފެތޭ ފެންވަރުގެ ޑިޖިޓަލް އައިޑެންޓިޓީއެއް ހެދުމުގެ މަސައްކަތް ކުރާނެ ކަމަށާއި އެއީ އިންޓަނޭޝަނަލް ސްޓޭންޑަޑްގައި ގާއިމްކުރާނެ އައިޑެންޓިޓީއެއް ކަމަށެވެ.

"އޭރަށް ރައްޔިތު މީހާއަށް ފެންނާނީ އެއްވެސް އެޖެންސީއަކުން ނުވަތަ ޕްރައިވެޓް ސެކްޓާގެ ފަރާތަކުން ނުވަތަ ހިދުމަތް ފޯރުކޮށްދޭ ފަރާތަކުން އެކްސެސްވާ ކަމަށްވާ ނަމަ، އެ މީހެއްގެ ކޮންސެންޓް [ރުހުން] އެކަމުގައި ބޭނުންވާނެ. އެ ކޮންސެންޓާ އެކުގައި އެ އިދާރާއަކުން އެކަން ކުރާނީ،" މިނިސްޓަރު ވިދާޅުވި އެވެ.

"ހަމައެއާއެކު މީހާއަށް ބަލައިލެވޭނެ ކޮންސެންޓް ދިނުމަށް ފަހު ވެސް ކާކުތޯ ކޮން ސަބަބަކާ ހުރެތޯ ތިމަންނާގެ މި ޒާތީ މައުލޫމާތަށް އެކްސެސްވެފައި މި އޮތީ. މިއީ ވަރަށް ބޮޑު ކޮންފޮޓެއް މިގޮތަށް މާހައުލަކަށް މަސައްކަތް ބައްޓަންވެގެން ދިޔުމަކީ."

އީފާސް މެދުވެރިކޮށް މިހާރު ވެސް އެ މީހެއްގެ އައިޑީ ކާޑާއި ޑްރައިވިން ލައިސަންސާއި ކައިވެނީގެ ސެޓްފިކެޓްގެ މައުލޫމާތު ފަދަ އެތައް މައުލޫމާތެއް ޑިޖިޓަލްކޮށް ފެނެ އެވެ. އެކަމަކު ޑިޖިޓަލް އައިޑީކާޑު ހުރިހާ ތަނަކުން ބަލައެއް ނުގަނެ އެވެ.

އައިޑީކާޑަށް އެކްސެސްވާ ނަމަ އެކަން އެނގޭ ގޮތަށް ޑިޖިޓަލް އައިޑީކާޑެއް ތައާރަފް ކުރަން ސަރުކާރުން ނިންމާފައިވާއިރު، ސަރުކާރު ހިންގާ ޕީއެންސީއަށް މެންބަރުން އިތުރު ކުރަން ޑިޕާޓްމަންޓް އޮފް ނެޝަނަލް ރެޖިސްޓްރޭޝަން (ޑީއެންއާރް) ތެރޭ އައިޑީކާޑުގެ މައުލޫމާތު ވަގަށް ނަގާފައިވާ ކަމުގެ ތުހުމަތު ހޯމް ލޭންޑް މިނިސްޓްރީއަށް ވަނީ އަމާޒުވެފަ އެވެ.

އެ މައްސަލާގައި އިހުސާން މަގާމުން އިސްތިއުފާ ދިނުމަށް ވެސް އެމްޑީޕީން ވަނީ ގޮވާލައިފަ އެވެ. އަދި އެކަމާ ގުޅިގެން އޭނާގެ އިތުބާރު ނެތް ކަމުގެ މައްސަލައެއް ވެސް ރައްޔިތުންގެ މަޖިލީހަށް ވަނީ ހުށަހަޅައިފަ އެވެ.