ފަނޑިޔާރުން ވަކިކުރާ ބިލްގެ ވޯޓުގައި ބައިވެރި ނުވީ ދެ މެމްބަރެއް: ފަލާހު

ސުޕްރީމް ކޯޓުގެ ފަނޑިޔާރުންގެ އަދަދު މަދުކުރަން ގާނޫނަށް ހުށަހެޅި އިސްލާހު ބަލައިގަތުމަށް ރައްޔިތުންގެ މަޖިލީހުގައި މިއަދު ވޯޓު ނެގި ވަގުތު މަޖިލީހުގައި ވަޑައިގެން ނެތީ ދެ މެމްބަރަކު ކަމަށް ޕީއެންސީގެ ޕާލަމެންޓްރީ ގްރޫޕްގެ ލީޑަރު އިބްރާހިމް ފަލާހު ވިދާޅުވެއްޖެ އެވެ.

ސުޕްރީމް ކޯޓުގެ ފަނޑިޔާރުންގެ ބެންޗްގެ އަދަދު 5 އަށް މަދުކުރަން ގާނޫނަށް ހުށަހެޅި އިސްލާހުގެ މައްސަލަ ބަލައިގަތުމަށް ވޯޓު ދިނުމަށް ޕީއެންސީގެ ޕީޖީ ގްރޫޕުން ވިޕެއް އޮތީ ނެރެފަ އެވެ. ނަމަވެސް މިއަދު މަޖިލީހުގައި ނެގި ވޯޓުގައި ޕީއެންސީގެ 11 މެމްބަރަކު ބައިވެރިވެވަޑައިނުގަންނަވާ ކަމަށް ބުނެ ވަނީ އަޑު ފެތުރިފަ އެވެ.

އެކަމާ ގުޅިގެން ޕީއެންސީގެ ޕީޖީ ގްރޫޕްގެ ލީޑަރު ފަލާހު ކުރެއްވި ޓްވީޓެއްގައި ވިދާޅުވީ އެ 11 މެމްބަރުންގެ ތެރެއިން ނުވަ މެމްބަރަކު އުޅުއްވަނީ ރަސްމީ ދަތުރުތަކެއްގައި ކަމަށެވެ. އަދި ދެން ތިއްބެވި ދެ މެމްބަރުން ވޯޓުގައި ބައިވެރިނުވި ސަބަބު ޕާޓީން ބަލާނެ ކަމަށް އޭނާގެ ޓްވީޓްގައިވެ އެވެ.

ރައީސް ޑރ. މުހައްމަދު މުއިއްޒު ދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި ވެސް އެ މަނިކުފާނާ އެކު ތިން މެމްބަރަކު އެބައުޅުއްވަ އެވެ. އެއީ މިލަންދޫ ދާއިރާގެ މެންބަރު ހަސަން މުފީދު އަބްދުލްގާދިރާއި ކުޑަހުވަދޫ ދާއިރާގެ މެންބަރު ހުސައިން ހާމިދު އަދި ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިން އެވެ.

އެނގިފައިވާ ގޮތުގައި މާލޭގައި ހުންނެވުމަށް ފަހު، ވޯޓުގައި ބައިވެރިވެވަޑައިނުގަތް އެއް މެމްބަރަކީ ހިތަދޫ މެދު ދާއިރާގެ މެމްބަރު އަހުމަދު އަޒާން މަރްޒޫގެވެ. އޭނާއަކީ އެ ބިލާ ދެކޮޅަށް ޕީއެންސީގެ ޕީޖީ ގްރޫޕްގައި ވެސް ވާހަކަ ދެއްކެވި ބޭފުޅެއް ކަމަށް ވަނީ އެނގިފަ އެވެ.

ޕާޓީގެ ވިޕްލައިނާ ހިލާފްވި މެމްބަރުންނަށް ފިޔަވަޅު އަޅާނެ ކަމަށް ޕީޖީ ލީޑަރު ފަލާހު މިއަދު ޕީޖީ ގްރޫޕަށް ފޮނުއްވި މެސެޖެއްގައިވަނީ ވިދާޅުވެފަ އެވެ. ނަމަވެސް އޭނާ ފަހުން "މިހާރު" އަށް ވިދާޅުވި ގޮތުގައި ފިޔަވަޅު އަޅާނީ ވޯޓުގައި ބައިވެރިނުވި ސަބަބު ބެއްލެވުމަށް ފަހު ކަމަށެވެ.

ރައީސް މުއިއްޒު ވެސް ޕީއެންސީގެ ޕީޖީގެ ވަޓްސްއެޕް ގުރޫޕްގައި ވިދާޅުވީ، ވަކި ގޮތަކަށް ވޯޓު ދެއްވަން ވިޕްލައިނެއް ކަނޑައެޅުމުން އެއާ ހިލާފުވުމަކީ އެއްވެސް އިރަކު ކުރައްވައިގެން ވާނެ ކަމެއް ނޫން ކަމަށެވެ.

ޕާޓީން ވަކިކޮށް ފިނަމަ ނުވަތަ ވަކިވެއްޖެ ނަމަ މެމްބަރުންގެ ގޮނޑި ގެއްލޭ ގޮތަށް ގާނޫނުއަސާސީ އަށް އިސްލާހު ގެނެސްފައިވާއިރު، އެ އިސްލާހު ބާތިލް ކުރުމުގެ މައްސަލަ ސުޕްރީމް ކޯޓުގައި ދަނީ ހިނގަމުންނެވެ. އެ މައްސަލަ ނުނިމެނީސް، މެމްބަރުންނަށް ފިޔަވަޅު ނޭޅުމުގެ އަމުރަކަށް ސުޕްރީމް ކޯޓުގައި އޮތީ އެދިފަ އެވެ.