އައްޑޫ ރޭސިން އަށް ދިޔަ ޒުވާނަކު، އެކްސިޑެންޓެއްގައި ނިޔާވެއްޖެ

އައްޑޫ ހަންކެޑެ ބްރިޖުގައި ހިނގި އެކްސިޑެންޓެއްގައި ޒުވާނަކު މިއަދު ނިޔާވެއްޖެ އެވެ.

ފުލުހުންގެ މީޑިއާ އޮފިޝަލަކު ވިދާޅުވީ އެ އެކްސިޑެންޓު ހިނގީ ބާރު ސްޕީޑުގައި މަރަދޫ އިން ހިތަދު އަށް ދުއްވާފައި ދަނިކޮށް ބްރިޖު ބެންޑު ހިސާބުން ސައިކަލު ކޮންޓްރޯލް ނުވެ، ބްރިޖުގެ ފެންސުގައި ޖެހިގެން ކަމަށެވެ.

އެނގިފައިވާ ގޮތުގައި، ބްރިޖުގައި ވަރަށް ބާރު ސްޕީޑުގައި ދުއްވާފައި ދަނިކޮށް، އެކްސިޑެންޓުވެ ނިޔާވީ 24 އަހަރުގެ ފިރިހެނެކެވެ. އޭނާ މާލޭގައި ހުރެފައި އައްޑު އަށް ދިޔައީ އެ ތަނުގައި އޮތް ރޭސިން މުބާރާތެއްގައި ބައިވެރިވުމަށެވެ. މިއީ، މި މަހުގެ ކުރީކޮޅު ހުޅުވި ބްރިޖުގައި ހިނގި ފުރަތަމަ އެކްސިޑެންޓެވެ.

އައްޑޫ އިކުއިޓޯރިއަލް ހޮސްޕިޓަލްގެ މީޑިއާ އޮފިޝަލަކު ވިދާޅުވީ އެކްސިޑެންޓެއްގައި އަނިޔާވި ޒުވާނާކު ގެންދިޔައިރު ވެސް ވަރަށް ހާލު ދެރަ ކަމަށެވެ. ނިޔާވީ ފަރުވާ ދެމުން ދަނިކޮށް ކަމަށް ވިދާޅުވި އެވެ.

އައްޑޫ މޮޓޯ ރޭސިން އެސޯސިއޭޝަނުން އިސް ނަގައިގެން ހުޅުދޫގައި މިދިޔަ ހަފުތާގައި ފެށި "އެންމެންގެ ޑްރެގް ޗެމްޕިއަންޝިޕް" މުބާރާތަށް ފަރިތަކުރަމުން ދިޔަ ޒުވާނަކު ވެސް އެކްސިޑެންޓުވެ، ވެންޓިލޭޓަރުގައި ދަނީ ފަރުވާ ދެމުންނެވެ.