ވަގަށް އެތެރެކުރަން އުޅުނު 400 ވޭޕް އަތުލައިގެންފި

ރާއްޖެެއަށް ވަގަށް އެތެރެކުރަން އުޅުނު 400 ވޭޕް ކަސްޓަމްސް އިން އިއްޔެ އަތުލައިގެންފި އެވެ.

އެ އިދާރާއިން މިއަދު ބުނީ ވޭޕް ޝިޕްމަންޓް އަތުލައިގަތީ ކަނޑުމަގުން ވިޔަފާރި ބަނދަރަށް އެތެރެކުރި ޝިޕްމަންޓެއް ފާސްކުރިއިރު ޝައްކުކުރެވޭ ކަންތައްތަކެއް ހުރުމުން އިތުރަށް ބެލިއިރު ކަމަށެވެ.

އެ ޝިޕްމަންޓް ކަސްޓަމްސްއަށް ޑިކްލެއާކޮށްފައިވަނީ ޖެނެރަލް ކާގޯގެ ގޮތުގަ އެވެ. އެ މުދަލުގެ ތެރޭގައި ވޭޕް ސްޓިކް ފޮރުވާފައި ހުރިކަމަށް ޝައްކުވެގެން އިތުރަށް ބެލުމުން 400 ވޭޕް ހިމެނޭ ޕެކޭޖު ފެނުނު ކަމަށް ބުންޏެވެ. އެއީ ހަތަރު ވޭޕް ހިމެނޭ 100 ޕެކެޓެވެ.

ދުންފަތް ކޮންޓްރޯލްކުރުމާ ބެހޭ ގާނޫނުގެ ދަށުން ރާއްޖެއަށް ވޭޕާއި އީ-ސިނގިރޭޓު އެތެރެކުރުމަކީ މިދިޔަ ޑިސެމްބަރު 15 އިން ފެށިގެން މަނާ ކަމެކެވެ.

ކަސްޓަމްސް އިން ދަނީ އެ މައްސަލަ ބަލަމުންނެވެ.

ފުލުހުން ވެސް ވަނީ ވޭޕް ވިއްކާ ތަނެއް ރޭ ފާސްކޮށް ބިދޭސީއެއް ހައްޔަރުކޮށްފަ އެވެ.

އެ ބިދޭސީ މީހާ ދިރިއުޅޭ ތަނާއި މަސައްކަތްކުރާ ކެފޭ ބަލައި ފާސްކުރިއިރު 84 ވޭޕް ކާޓްރިޖް އަދި ވޭޕް ވިއްކައިގެން ހޯދާފައިވާ ކަމަށް ތުހުމަތު ކުރެވޭ ފައިސާ ފެނިފައިވާ ކަމަށް ފުލުހުން ބުންޏެވެ.