ރެސްޓޯރެންޓްތަކުގެ އަގުތަކާއި ކުލީގެ އަގުތައް 29 ޕަސެންޓަށް އުފުލިއްޖެ

ރެސްޓޯރެންޓްތަކުން ވިއްކާ ކާބޯތަކެއްޗާއި އެކޮމޮޑޭޝަން ހިދުމަތްތައް ނުވަތަ ކުލީގެ އަގުތައް 29 ޕަސެންޓަށް އުފުލިއްޖެ އެވެ.

މަރުކަޒީ ބޭންކް، އެމްއެމްއޭ އިން އާންމުކޮށްފައިވާ ހިސާބުތަކުން ދައްކާ ގޮތުން އެއީ އެންމެ ބޮޑަށް އިންފްލޭޝަން އުފުލިފައިވާ ދެ ދާއިރާ އެވެ. މިއަހަރުގެ ފުރަތަމަ ތިން މަހު އެވްރެޖުކޮށް ރެސްޓޯރެންޓްތަކުގެ އަގުތަކާއި ކުލީގެ އިންފްލެޝަން ހުރީ 29.5 ޕަސެންޓުގަ އެވެ. އަދި ދެވަނަ ކުއާޓާގައި އިންފްލޭޝަން ހުރީ 29.4 ޕަސެންޓުގަ އެވެ.

އެއީ މިދިޔަ އަހަރުގެ ފުރަތަމަ ހަ މަހަށް ވުރެ 40 ގުނަ އިތުރު އަދަދެކެވެ. މިދިޔަ އަހަރުގެ ފުރަތަމަ ހަ މަހުގެ އެ ދާއިރާތަކުގެ އިންފްލޭޝަން ހުރީ 0.7 ޕަސެންޓުގަ އެވެ.

ރެސްޓޯރެންޓްތަކުން ވިއްކާ ކާބޯތަކެއްޗާއި ކުލީގެ އަގުތައް އުފުލެން ފެށީ މިދިޔަ އަހަރުގެ ނޮވެމްބަރު މަހުން ފެށިގެންނެވެ. އެއަށް ފަހު އެވްރެޖުކޮށް އެ ދެ ދާއިރާއިން އަގުތައް ދިޔައީ އުފުލެމުންނެވެ.

މިއަހަރުގެ ޖޫން މަސް ނިމުނުއިރު ރާއްޖޭގެ އިންފްލޭޝަން ހުރީ 3.8 ޕަސެންޓުގަ އެވެ. އަދި ކާބޯތަކެތީގެ އިންފްލޭޝަން ހުރީ ފަސް ޕަސެންޓުގަ އެވެ.