ދެން ފެންނާނީ ވައުދުވި ގޮތަށް ކަންކަން ނިމިގެންދާތަން: ރައީސް

ކުރިއަށް އޮތް ދުވަސްތަކުގައި ފެންނާނީ ރިޔާސީ އިންތިހާބުގައި ވައުދުވެވަޑައިގެންވި ގޮތަށް ކަންކަން ނިމިގެންދާތަން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ށ. އަތޮޅުގެ މީހުން ދިރިއުޅޭ ރަށްތަކަށް މިހާރު އެމަނިކުފާނު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ށ. ފޭދޫއަށް ވަޑައިގެން އެރަށުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ފޭދޫގައި ކުރުމަށް ހަމަޖެހިފައިވާ އެންމެ މުހިންމު މަސައްކަތަކީ އެ ރަށު ސްކޫލްގެ މަސައްކަތް ކަމަށެވެ.

ސްކޫލުގެ ކްލާސްރޫމުތަކާއި މަލްޓިޕާޕޯސް ހޯލު ނިންމުމަކީ އެ ރަށުގެ ރައްޔިތުން ވަރަށް ބޮޑު އުންމީދެއްކަން ފާހަގަ ކުރައްވައި، ރައީސް ވިދާޅުވީ ވަރަށް ކުރު މުއްދަތެއްގެ ތެރޭގައި އެކަން ނިންމައިދެއްވާނެ ކަމުގެ ޔަގީންކަން ދެއްވާ ކަމަށެވެ.

އޭގެ އިތުރުން އެ ރަށު ސިއްހީ މަރުކަޒު 24 ގަޑިއިރަށް ބަދަލު ކުރައްވާނެ ކަމަށާއި އެ ބަދަލާއެކު ނަރުހުންނާއި ޑޮކްޓަރުންގެ އިތުރުން ވެސް ބޭނުންވާ މުވައްޒަފުން ނެގުމުގެ މަސައްކަތް ވެސް ކުރެވޭނެ ކަމަށް އެމަނިކުފާނު ވިދާޅުވި އެވެ. އަދި ކުރިއަށް އޮތް ދުވަސްތަކުގައި ފެނިގެންދާނީ އެމަނިކުފާނު ވައުދުވެވަޑައިގެން ގޮތަށް ކަންކަން ނިމިގެންދާތަން ކަމަށް ވެސް ރައީސް ފާހަގަ ކުރެއްވި އެވެ.

ފޭދޫގައި އަލަށް ފަށަން ނިންމި މަޝްރޫއުތައް

- ފޭދޫ މަގުތައް ހެދުމުގެ މަޝްރޫއު

- ގޮނޑުދޮށް ހިމާޔަތް ކުރުމުގެ މަޝްރޫއުގައި

- މޫދަށް އެރުމަށް ތަނެއް ހެދުމުގެ މަޝްރޫއު

- އަަންނަ އަހަރުގެ ބަޖެޓުގައި އެރަށުގައި 500 މީހުންގެ ޖާގައިގެ މިސްކިތެއް އެޅުން

- ހޭންޑްބޯލް ކޯޓެއްގެ މަސައްކަތް

- ޓާފް ބަދަލު ކުރުމާއި ލައިޓް ޖެހުމާއި ރޮސްޓްރަމެއްގެ މަސައްކަތް

- ޕަވާ ހައުސް މަސައްކަތް

- ފުލުހުންގެ މަރުކަޒެއް އެޅުން

- ހޮސްޕިޓަލްގެ ކެޕޭސިޓީ އިތުރުކުރުން