އުމްރާނީ ތަރައްގީގެ މަސައްކަތްތަކަށް ސަރުކާރުގެ ހާއްސަަ ކުންފުންޏެއް ރައީސް އުފައްދަވައިފި

ރާއްޖޭގެ އުމްރާނީ ތަރައްގީގެ މަސައްކަތްތަކަށް ހާއްސަ 100 ޕަސެންޓު ދައުލަތުގެ ހިއްސާ އޮންނަ ސަރުކާރުގެ ކުންފުންޏެއް ރައީސް ޑރ. މުހައްމަދު މުއިއްޒު މިއަދު އުފައްދަވައިފި އެވެ.

ރައީސް އޮފީހުން މިރޭ ބުނީ ކުންފުނީގެ ގާނޫނުގެ ދަށުން "އިންފްރާސްޓްރަކްޗާ ޑިވެލޮޕްމަންޓް ސޮލިއުޝަން ކޮމްޕެނީ ލިމިޓެޑް"ގެ ނަމުގައި ރައީސް މުއިއްޒު ކުންފުންޏެއް މިއަދު އުފައްދަވާފައިވާ ކަމަށެވެ.

އެ ކުންފުނި އުފައްދަވާފައި ވަނީ މިއަދު ދިވެހި ސަރުކާރުގެ ގެޒެޓުގައި ޝާއިއުކުރެއްވި ރައީސުލްޖުމްހޫރިއްޔާގެ ގަރާރަކުންނެވެ.

ރައީސް އޮފީހުން ބުނި ގޮތުގައި، ދައުލަތުގެ 100 ޕަސެންޓް ހިއްސާ އޮންނަ އެ ކުންފުނި އުފެއްދުމުގެ މައިގަނޑު މަގުސަދަކީ ސަރުކާރުގެ އިގުތިސާދީ ސިޔާސަތުތަކާ އެއްގޮތްވާ ގޮތުގެ މަތިން ރާއްޖޭގައި ބޮޑަށް އާބާދުވެފައިވާ "އާބަން" ސަރަހައްދުތަކާއި މަދުން އާބާދުވެފައިވާ "ރޫރަލް" ސަރަހައްދުތަކުގެ އުމްރާނީ ތަރައްގީ ފުޅާކުރުމުގެ މަގުސަދު ހާސިލުކުރުމެވެ.

ދުނިޔެއަށް އަލަށް އީޖާދުވާ ޓެކްނޮލޮޖީ އާއި ޒަމާނީ އީޖާދީ ވަސީލަތްތައް ބޭނުންކޮށްގެން ގާ އެޅުމާއި ކާސްޓިންގެ މަސައްކަތްތަކާއި އެއާ ގުޅުން ހުރި އެހެން ކަންކަމާއި އެ މަސައްކަތްތަކާ ގުޅޭ ހުރިހާ ކަމެއް އެ ކުންފުނި މެދުވެރިކޮށް ތަންފީޒުކުރާނެ ކަމަށް ރައީސް އޮފީހުން ބުންޏެވެ.

އެ އޮފީހުން ބުނީ "އިންފްރާސްޓްރަކްޗާ ޑިވެލޮޕްމަންޓް ސޮލިއުޝަން ކޮމްޕެނީ ލިމިޓެޑް" ކުންފުންޏަށް ހުއްދަ ކޮށްފައިވާ ރައުސުލްމާލަކީ 10ރ. ގެ 10 މިލިއަން ހިއްސާގެ މައްޗަށް ބަހާލާފައިވާ 100 މިލިއަން ރުފިޔާ ކަމަށެވެ.

އެއީ އަމިއްލަ ނަމުގައި ދައުވާކުރުމާއި ދައުވާ ލިބިގަތުމުގެ ހައްގު ލިބިގެންވާ، ވަކި ސިއްކައެއް އޮންނަ، ގާނޫނީ ގޮތުން އަމިއްލަ ޝަހުސެއް ކަމަށް ވެސް ރައީސް އޮފީހުން ބުންޏެވެ.