ހުޅުމާލެ މަގުތަކުގެ ދުވާރުމަތީގައި ހުރި ގޮނޑިމޭޒު ނަގަން އަނެއްކާވެސް އަންގައިފި

ހުޅުމާލެ މަގުތަކުގެ ދުވާރުމަތީގައި ކެފޭތަކުން ބަހައްޓާފައި ހުރި ގޮނޑިތަކާއި މޭޒުތައް ނަގަން އެޗްޑީސީން އަނެއްކާވެސް އަންގައިފި އެވެ.

އެޗްޑީސީން އިއްޔެ ކުރި އިއުލާނެއްގައި ބުނީ ހުޅުމާލޭ ދުވާރުމައްޗާއި ހެޖުތެރޭގައި ގޮނޑި އާއި މޭޒު ބަހައްޓައިގެން ހިދުމަތް ނުދޭން މިދިޔަ އޮގަސްޓު މަހު އެންގި ނަމަވެސް، އަދިވެސް ގިނަ ކެފޭތަކަކުން އެކަން ކުރަމުންދާ ކަމަށެވެ.

މަގު ބޭނުންކުރާ މީހުންނަށް ދަތިވާ ގޮތަށް ދުވާރުމަތީގައި ގޮނޑި އާއި މޭޒު ބަހައްޓައިގެން ވިޔަފާރި އުސޫލުން ބޭނުން ކުރުމަކީ މަނާ ކަމެއް ކަމަށް އެޗްޑީސީން ބުންޏެވެ.

ދުވާރުމަތީގައި ބަހައްޓާފައި ހުރި ގޮނޑި އާއި މޭޒުތައް އަންނަ ބުރާސްފަތި ދުވަހުގެ ކުރިން ނެގުމަށް އެޗްޑީސީންގެ އިއުލާނުގައި ވަނީ އަންގައިފަ އެވެ.

އެޗްޑީސީން ބުނީ ހުޅުމާލޭގެ ހެޖުތެރޭގައި ބިޔަވާ ޒާތުގެ ގަސްތައް އިންދާފައި ހުރުމުގެ ސަބަބުން މަގުތަކަށް ޖަމާވާ ފެން ހިންދުމަށް ދަތިވެ، މަގުތަކުގައި ފެންބޮޑުވުމާއި ތާރުގަނޑު ހަލާކުވުން ފަދަ މައްސަލަތައް ވެސް ކުރިމަތިވަމުންދާ ކަމަށެވެ. އެހެންވެ، އެ ގަސްތައް ނެގުމަށް ވެސް އެ ކޯޕަރޭޝަނުން ވަނީ އަންގައިފަ އެވެ.

ދީފައިވާ މުއްދަތުގެ ތެރޭގައި ދުވާރުމަތިން ގޮނޑިތަކާއި މޭޒުތައް އަދި ހެޖުތެރޭގައި އިންދާފައި ހުރި ގަސްތައް ނުނަގައިފިނަމަ، އެޗްޑީސީން އެ ތަކެތި ނަގާނެ ކަމަށް ވެސް އެ ކޯޕަރޭޝަންގެ އިއުލާނުގައި ބުނެފައިވެ އެވެ. އަދި އެ މަސައްކަތުގެ ތެރެއިން އެ ތަކެއްޗަށް ލިބޭ ގެއްލުމަކަށް އެ ކޯޕަރޭޝަނުން ޒިންމާ ނުވާނެ ކަމަށް ވެސް އެޗްޑީސީން ބުންޏެވެ.