ނަޝީދުގެ ނަޒަރުގައި ހައްލަކީ ބިދޭސީން އިތުރުކޮށް އައްޑޫގައި ދިރިއުޅޭ އާބާދީ 50،000 އަށް މަތި ކުރުން!

އައްޑޫ ސިޓީ ކައުންސިލުގެ ދަށުން އިދާރީ ގޮތުން ހުޅުދު އާއި މީދޫ އަދި ފޭދޫ ވަކިކޮށް، އެ ތިން ރަށުގައި ވަކިވަކި ކައުންސިލުތައް ހެދުން ނުވަތަ އައްޑޫ "ބައިބައި ކުރުމުން" ވަކިވަކި ރަށްތަކަށް ލިބޭނެ އިތުރު ފައިދާއެއް ނެތް ކަމަށާއި އެ ސިޓީގެ ތަރައްގީ އަށް އެންމެ ބޮޑަށް ބޭނުންވަނީ އާބާދީ އިތުރު ކުރެވޭނެ ގޮތެއް ކަމަށް ކުރީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

އައްޑޫގެ ތިން ރަށެއްގައި ވަކިވަކި ކައުންސިލްތަކެއް އުފެއްދުމާ ގުޅޭ ގޮތުން އަންނަ ހޮނިހިރު ދުވަހު ބާއްވާ ރިފަރެންޑަމް ވޯޓުގެ ބަހުސް ހޫނުވެފައިވާ މި ދަނޑިވަޅާ ދިމާކޮށް ނަޝީދު "އެކްސް" ގައި ހުށަހެޅުއްވި ހިޔާލަކީ ގާނޫނުއަސާސީގެ ހުދޫދުގެ ތެރެއިން ބިދޭސީންނަށް އައްޑޫގައި ދިރިއުޅުމުގެ ފުރުސަތު ދީގެން އާބާދީ އިތުރު ކުރުމެވެ.

ނަޝީދު ވިދާޅުވި ގޮތުގައި، ގާނޫނުއަސާސީގައި ބުނާ ޝަރުތު ހަމަވާ، ފަންނީ އަދި ތައުލީމީ ބޭރު މީހުން ވަކި މުއްދަތެއް ވަންދެން އައްޑޫގައި ވަޒީފާ އަދާކުރުމަށް ޝަރުތުކޮށް ދިވެހި ރައްޔިތުކަން ދިނުމަކީ ރަނގަޅު ސިޔާސަތެކެވެ.

"އިސްލާމީ އުއްމަތުގައި މިފަދަ ފުރުސަތުގެ ބޭނުން ހިފާނެ ޒުވާން އިންޖިނިއަރުން، ޑޮކްޓަރުން، ޓީޗަރުން އަދި މި ނޫން ވެސް ފަންނީ މީހުން ބައިވަރު. އައްޑުއަކީ 50،000 މީހުން ދިރިއުޅޭ ސިޓީއަކަށް ހެދިދާނެ،" މިހާރު 35،000 އަށް ވުރެ ގިނަ މީހުންގެ އާބާދީއެއް އޮތް އައްޑޫގެ ތަރައްގީ އާއި އާބާދީ އިތުރު ކުރުމާ ގުޅުވައިގެން ނަޝީދު ވިދާޅުވި އެވެ.

އައްޑޫ ސިޓީ ކައުންސިލުގެ ދަށުން އިދާރީ ގޮތުން ހުޅުދު އާއި މީދޫ އަދި ފޭދޫ ވަކިކޮށް، އެ ތިން ރަށުގައި ވަކިވަކި ކައުންސިލްތައް ހެދުމާ ދެކޮޅު މީހުންގެ ވިސްނުމުގައި އެހެން ހަދައިފި ނަމަ އައްޑޫގެ ރައްޔިތުންގެ މެދުގައި ބައިބައިވުން އުފެދި ހަރަދުތައް ބޮޑުވާނެ އެވެ. އެ ވިސްނުމާ އެއްކޮޅު މީހުން މައިގަނޑު ގޮތެއްގައި ބުނަނީ، އައްޑޫ ސިޓީ ކައުންސިލްގެ އަޣުލަބިއްޔަތު އޮންނަ ބަޔަކު އެހެން ރަށްރަށުގެ ތަރައްގީ އާއި ނިންމުންތަކަށް ބަސް ބުނުމުގެ ބަދަލުގައި އެ ބާރު އެ ރަށެއްގެ ކައުންސިލަކަށް ދިނުމަކީ ތަރައްގީ އާއި ކުރިއެރުން ލިބޭނެ ކަމެއް ކަމަށެވެ.

މި ބަހުސްގެ ތެރެއިން އައްޑޫގެ އާބާދީ އިތުރު ކުރުމުގެ ވާހަކައެއް ނަޝީދު މިއަދު އެ ވާހަކަ ވިދާޅުވުމާ ހަމައަށް އަދި ނުދައްކަ އެވެ.

އައްޑޫ ފޭދޫ، ހުޅުދޫ އަދި މީދޫގެ ރައްޔިތުންގެ މެދުގައި ނަގާ ފެންނަ ނުފެންނަ ވޯޓުގެ އިދާރީ ހުރިހާ ކަމެއް ގާތްގަނޑަކަށް ނިމިފައިވާ ކަމަށް އިލެކްޝަންސް ކޮމިޝަނުން ވަނީ ބުނެފަ އެވެ. އެ ވޯޓުގައި ހުޅުދޫގައި ތިން ވޯޓު ފޮށްޓާއި މީދޫގައި ތިން ފޮށި އަދި ފޭދޫގައި ފަސް ވޯޓު ފޮށި ބަހައްޓާނެ އެވެ. އަދި އެ ރަށްރަށުގެ މީހުން ވޯޓުލުމަށް މާލޭގައި ވެސް ހަތް ވޯޓު ފޮށި ބަހައްޓާނެ އެވެ.

އިލެކްޝަންސް ކޮމިޝަނުން އާންމުކޮށްފައިވާ ވޯޓުލުމުގެ ހައްގު ލިބިގެންވާ މީހުންގެ ލިސްޓުގައިވާ ގޮތުން ފޭދޫން 4،355 މީހަކަށް މި ރިފަރެންޑަމްގައި ވޯޓުލުމުގެ ހައްގު ލިބޭއިރު، ހުޅުދޫން 2،874 މީހަކަށް އަދި މީދޫން 2،347 މީހަކަށް ވޯޓުލުމުގެ ހައްގު ލިބެ އެވެ.