ނޭޝަނަލް ނިއުސް އެޖެންސީ ލޯންޗުކޮށްފި

މީޑިއާތަކަށް އެއް ޕްލެޓްފޯމަކުން ކޮންޓެންޓު ފޯރުކޮށްދޭން "ނޭޝަނަލް ނިއުސް އެޖެންސީ" މިއަދު ލޯންޗުކޮށްފި އެވެ.

ސަރުކާރުގެ ނިއުސް އެޖެންސީ ހެދުމަށް އިންފޮމޭޝަން މިނިސްޓްރީން ޕީއެސްއެމްއާ އެކު ސޮއިކުރީ މިދިޔަ އޮގަސްޓް 7 ގަ އެވެ.

ދައުލަތުގެ މީޑިއާ، ޕީއެސްއެމްގެ ދަށުން ހިންގާ ނިއުސް އެޖެންސީ އޭގެ ތިން މަސް ފަހުން ލޯންޗުކޮށްދެއްވީ، ޓީވީއެމްގައި ބޭއްވި ރަސްމިއްޔާތެއްގައި ރައީސް އޮފީހުގެ ތަރުޖަމާނު ހީނާ ވަލީދާއި ޕީއެސްއެމްގެ މެނޭޖިން ޑިރެކްޓަރު އިބްރާހިމް ނަސްރީން އަދި އިންފޮމޭޝަން މިނިސްޓްރީގެ ސްޓޭޓް މިނިސްޓަރު އަލީ ޝަމްއާނެވެ.

އެޖެންސީގެ ވެބްސައިޓު ލޯންޗުކުރުމަށް ފަހު، އެ ޕްލެޓްފޯމާ ފުރަތަމަ ގުޅުނު 20 މީޑިއާއާ އެކު ވަނީ އެއްބަސްވުމުގައި ސޮއިކޮށްފަ އެވެ.

އެ ރަސްމިއްޔާތުގައި ޝަމްއާން ވިދާޅުވީ މީޑިއާތައް ބޭނުންކުރަން، ޕީއެސްއެމްގެ ވީޑިއޯ ކޮންޓެންޓުތަކާއި އެކި އިވެންޓްތަކުގެ ވީޑިއޯ/ފޮޓޯ، ފޯރުކޮށްދޭނެކަމަށް ކަމަށެވެ. އަދި ކުރިއަށް އޮތް ތަނުގައި އަމިއްލަ އެހެން މީޑިއާތަކުން ނަގާ ފޮޓޯ އާއި ވީޑިއޯ ވެސް އެ ވެބްސައިޓު މެދުވެރިކޮށް ހިއްސާކުރެވޭނެކަމަށް ޝަމްއާން ވިދާޅުވި އެވެ. ޕީއެސްއެމްގެ އެމްޑީ ނަސްރީން ވިދާޅުވީ ގިނަ ކޮންޓެންޓުތަކެއް އެ ޕްލެޓްފޯމު މެދުވެރިކޮށް ދޫކުރާނީ ހިލޭ ކަމަށެވެ. އަދި ޕްރިމިއަމް ޕެކޭޖްތައް މެދުވެރިކޮށް ހާއްސަ ކަންކަމާ ގުޅޭ ވީޑިއޯތައް ލިބޭނެ ޕެކޭޖުތައް ވެސް ހިމަނާނެ ކަމަށް ނަސްރީން ވިދާޅުވި އެވެ.

ޕިއެސްއެމްގެ މޯލްޑިވް މީޑިއާ އިންސްޓިޓިއުޓު އަދި އިންފޮމޭޝަން މިނިސްޓްރީ ގުޅިގެން މީޑިއާތަކަށް ތަފާތު ތަމްރީން ޕްރޮގްމްތައް ހިންގަން ރާވާފައިވާ ކަމަށާއި އަދި ބައިނަލްއަގުވާމީ އެކި މީޑިއާ އިވެންޓްތަކުން ވެސް ފުރުސަތު ހޯދައިދިނުމަށް މަސައްކަތް ކުރާނެކަމަށް އޭނާ ވިދާޅުވި އެވެ.