އަންހެނުން ބާރުވެރިކުރުވުމުގެ ނަތީޖާ އެބަ ފެނޭ: މިނިސްޓަރު

އަންހެނުން ބާރުވެރިކުރުވުމަށް ކުރާ މަސައްކަތްތަކުގެ ނަތީޖާ ފެންނަމުުން އަންނަ ކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އައިޝަތު ޝިހާމް މިރޭ ވިދާޅުވެއްޖެ އެވެ.

ރެހެންދި އެވޯޑު ދިނުމަށް ބޭއްވި ރަސްމިއްޔާތުގައި މިނިސްޓަރު ވިދާޅުވީ ގައުމު ބިނާކުރުމާއި ގޮތް ނިންމާ ފެންވަރުގައި އަންހެނުންގެ އަދަދު އިތުރު ކުރުމަކީ ސަރުކާރުގެ މުހިއްމު ސިޔާސަތެއް ކަމަށެވެ.

އެއާ އެއްގޮތަށް އައްޔަންކުރާ މަގާމުތަކުގައި އަންހެނުންގެ އަދަދު އިތުރުވެފައިވާކަން ފާހަގަކުރައްވައި، މިނިސްޓަރު ވިދާޅުވީ ދައުލަތުގެ ކުންފުނިތަކުގެ ބޯޑަށް އައްޔަންކުރާ އަންހެނުންގެ އަދަދު މިހާރު 27 ޕަސެންޓަށް އިތުރުވެފައިވާ ކަމަށެވެ. އޭގެ އިތުރުން އެންސްޕާ، އެމްއޭސީއެލް، އާސަންދަ، ސީއެމްޑީއޭ ފަދަ ކުންފުނިތަކުގެ އިސް ސަފުގައި ވެސް ތިބީ އަންހެނުން ކަމަށް އައިޝަތު ޝިހާމް ވިދާޅުވި އެވެ.

"ކުރިން އަންހެނުން މަދުކަމަށް ފާހަގަކުރާ ގިނަ ދާއިރާތަކެއްގައި މިއަދު ގިނަ އަންހެނުން ދަނީ އިސްސަފުގައި ބައިވެރިވަމުން،" މިނިސްޓަރު ވިދާޅުވި އެވެ.

އޭނާ ވިދާޅުވި ގޮތުގައި، ޗާޓާޑް އެކައުންޓެންޓުންގެ ގޮތުގައި ރާއްޖޭގައި ރަޖިސްޓަރީ ވެފައި ތިބި 58 އަންހެނުންގެ ތެރެއިން 36 ޕަސެންޓު އަންހެނުން ތިބީ އެ ދާއިރާގެ އިސްމަގާމުތަކުގަ އެވެ. އަދި ފުލުހުންގެ ތެރޭގައި އަންހެނުންގެ ބައިވެރިވުން 2019 ވަނަ އަހަރު 12 ޕަސެންޓުގައި ހުއްޓަސް މިހާރު އެ އަދަދު 21 ޕަސެންޓަށް އިތުރުވެފައިވާކަން މިނިސްޓަރު ފާހަގަކުރެއްވި އެވެ. ސިވިލް ސާވިސް އަށް ބަލާއިރު 2022 ވަނަ އަހަރު އެގްޒެކެޓިވް ލެވެލްގައި އަންހެނުން ތިބީ 21 ޕަސެންޓުގައި ކަމަށް ވިއަސް މިހާރު އެ އަދަދު 45 ޕަސެންޓަށް އިތުރުވެފައިވާ ކަމަށް އައިޝަތު ޝިހާމް ވިދާޅުވި އެވެ.

އިގުތިސޯދީ ގޮތުން އަންހެނުން ބާރުވެރި ކުރުވުމާއި އިސްސަފުގައި ހަރަކާތްތެރިވާ އަންހެނުންގެ އަދަދު އިތުރުވަމުން އަންނަ ކަމަށް ވެސް އޭނާ ވިދާޅުވި އެވެ.

ފަނޑިޔާރުންނާއި ގާޒިންގެ ގޮތުގައި އަންހެނުންގެ އަދަދު 16 ޕަސެންޓަށް އިތުރުކޮށް އަދި މިދިޔަ އަހަރު އެކި ދާއިރާތަކުން ދަސްވެނިވި މީހުންގެ ތެރެއިން މާސްޓާސް ނިންމި 66 ޕަސެންޓަކީ އަންހެނުން ކަމަށާއި ޕީއެޗްޑީ ހާސިލްކުރި 70 ޕަސެންޓަކީ އަންހެނުން ކަމަށް ވެސް މިނިސްޓަރު ވިދާޅުވި އެވެ.

"މިކަމުން ދައްކުވައިދެނީ މި ގައުމު ބިނާކުރުމުގައި އަންހެނުން ވެސް އިސް ދައުރެއް އަދާކުރަމުންދާކަން،" އޭނާ ވިދާޅުވި އެވެ.

އިގުތިސޯދީ ގޮތުން އަންހެނުން ބަރުވެރިކުރުވުމަށް ފަށާފައިވާ މަސައްކަތުގެ ނަތީޖާ ފެންނަ ކަމަށް ވެސް މިނިސްޓަރު ވިދާޅުވި އެވެ.

އޭނާ ވިދާޅުވީ ރައީސް ޑރ. މުހައްމަދު މުއިއްޒު ވެރިކަމަށް ވަޑައިގަތުމަށް ފަހު، އަންހެނުންނަށް ދިމާވާ ގޮންޖެހުންތައް ބެއްލެވިއިރު، އެންމެ ބޮޑު މައްސަލައަކަށް ފާހަގަކުރެވުނީ ވިޔަފާރިކުރުމަށް ލޯނު ނެގުމުގައި ހުރި ހުރަސްތަކެވެ.

އެހެންވެ، އެކަމަށް ހައްލެއްގެ ގޮތުގައި 100 މިލިއަން ރުފިޔާގެ ލޯނު ސްކީމެއް ހަމަޖައްސައި މިހާތަނަށް 83 މީހަކަށް ލޯނު ދޫކޮށްފައިވާ ކަމަށް މިނިސްޓަރު ވިދާޅުވި އެވެ. އޭގެ ތެރެއިން، 45 ޕަސެންޓް މީހުން ވިޔަފާރި ފަށައި އޭގެ މަންފާ ހޯދަމުން އަންނަކަން ފާހަގަކުރެއްވި އެވެ.

އެ ލޯނު ސްކީމްގެ 25 ޕަސެންޓް ހާއްސަ ކޮށްފައިވަނީ ނުކުޅެދުންތެރިކަން ހުންނަ މީހުންނަށެވެ

އޭނާ ވިދާޅުވި ގޮތުގައި، އެ ކާމިޔާބީތަކާ އެކު ވެސް އަންހެނުންގެ ހައްގުތައް ކަށަވަރު ކުރުމުގައި ގިނަ މަސައްކަތްތަކެއް ކުރަންޖެހެ އެވެ.

މިނިސްޓަރު ވިދާޅުވީ އަންހެނުން ކުރިއަށް ދިއުމަށް އޮތް ގޮންޖެހުމަކީ އެ މީހުންނަށް އެކި ގޮތްގޮތުން ކުރާ އަނިޔާ ކަމަށެވެ. އެކަން ހުއްޓުވަން ގާނޫނުތަކަށް އިސްލާހުތައް ގެންނަ ކަމަށާއި އޭގެ ތެރެއިން އުފެދޭ އާ މައްސަލަތަަކަށް ރިއާޔަތްކޮށް، އަންހެނުންގެ ހައްގުތައް ކަށަވަރު ކުރަން އިތުރު ފިޔަވަޅުތައް އަޅާނެ ކަމަށް ވިދާޅުވި އެވެ.

ގެވެށި އަނިޔާ ހުއްޓުވުމުގެ ގާނޫނާއި ޖިންސީ ފުރައްސާރަ ކުރުމާއި ގޯނާކުރުމުގެ ގާނޫނު އިސްލާހުކުރުމުގެ މަސައްކަތް މިހާރު އަންނަނީ ކުރަމުންނެވެ. އަދި ޖެންޑާ އީކުއަލިޓީގެ ގާނޫނު މުރާޖައާ ކުރަން އަންނަ އަހަަރަށް ތާވަލް ކޮށްފައިވާ ކަމަށް މިނިސްޓަރު ވިދާޅުވި އެވެ.