ގައުމެއް ބިނާކުރުމުގެ އަސްލަކީ އަންހެނުން: ފަސްޓް ލޭޑީ

ގައުމެއް ބިނާކުރުމުގެ އަސްލަކީ އަންހެނުން ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން ފަސްޓް ލޭޑީ ސާޖިދާ މުހައްމަދު ރޭ ވިދާޅުވެއްޖެ އެވެ.

ތަފާތު އެކި ދާއިރާތަކުން ފާހަގަކޮށްލެވޭ އަންހެނުންނަށް ހާއްސަ ކޮށްފައިވާ ރެހެންދި އެވޯޑު ދިނުމަށް ބޭއްވި ރަސްމިއްޔާތު ޝަރަފުވެރި ކޮށްދެއްވައި ވާހަކަ ދައްކަވަމުން ފަސްޓް ލޭޑީ ވިދާޅުވީ އުންމަތެއް ނުވަތަ ގައުމެއް ދިރިގެން އައުމުގެ އަސްލަކީ ވެސް އަންހެނުން ކަމަށެވެ.

އެކަމަނާ ވިދާޅުވީ އިސްލާމް ދީނުގައި އަންހެނުން ބާރުވެރިކުރުމުގައި އެ މީހުންނަށް ދީފައިވާ މަތިވެރި މަގާމު ހަނދާން ކުރަންޖެހޭ ކަމަށެވެ. އަންހެނަކަށް ވިއަސް ވިޔަފާރީގައި އަދި މުދާ ބެހުމުގައި ވިއަސް ތަފާތެއް ނެތް ކަމަށާއި އެންމެ ހެޔޮ ގެއަކީ، އެ ގެއެއްގައި އަންހެނުންނަށް އިހުތިތާމް ކުރާ ގެ ކަމަށް ފަސްޓް ލޭޑީ ވިދާޅުވި އެވެ.

ދަރިފުޅުގެ ފުރަތަމަ ޓީޗަރު، އެހީތެރިޔާ، ހިޔާވަހި އަދި މަދަރުސާއަކީ ވެސް އެކަމަނާ ވިދާޅުވި ގޮތުގައި އަންހެނުން ނުވަތަ މަންމަ އެވެ.

ދުޝްމަނުންގެ ތެރެއިން ގައުމު ސަލާމަތްކުރަން ސިފައިންނާއި ފުލުހުންގެ ލަޝްކަރެއް ތައްޔާރު ކުރުމަށް ހޭލާ އުޅެނީ މަންމަ ކަމަށާއި އަދި ޑޮކްޓަރުންނާއި ނަރުހުން އުޅޭއިރު އެކަމަށް އެ މީހުން އެންމެ ފުރަތަމަ ތައްޔާރު ކޮށްދެނީ މަންމަކަން ސާޖިދާ ފާހަގަކުރެއްވި އެވެ.

ފަސްޓް ލޭޑީ ވިދާޅުވި ގޮތުގައި، އަންހެނުން އެކި ރޮނގުތައް ކުރިއަށް ދަނީ ގޭތެރޭގައި އެ ހުރިހާ ޒިންމާތަކެއް އަދާކުރަމުންނެވެ.

ކުރީގައި އަންހެނުން ކޮށް އުޅުނު ކަންތައް ބަދަލުވެފައި ވާ ކަމަށާއި މިހާރު އެހެން ހުނަރުތައް ތަރައްގީކޮށް، އެ ބަދަލުތަކަށް ހޭނެންޖެހޭ ކަމަށް ފަސްޓް ލޭޑީ ވިދާޅުވި އެވެ. ޓެކްނޮލޮޖީ އަށް ހޭލުންތެރިވެ އަދި ވިޔަފާރީގެ އާ ގޮތްތައް އީޖާދު ކުރަންޖެހޭ ކަމަށާއި ވިޔަފާރީގެ ގޮތުން ހުރި ގިނަ ފުރުސަތުތަކަށް ތައްޔާރުވާން ޖެހޭ ކަމަށް އެ ކަމަނާ ވިދާޅުވި އެވެ.

ފަސްޓް ލޭޑީ ވިދާޅުވީ އަންހެނުންގެ ކިބައިގައި އެ ހުނަރު ހުންނާނެ އެވެ. އަންހެނުންނަކީ ވިސްނުންތެރި، ދުރު ފެންނަ އަދި ހުޝިޔާރު ބައެއްކަން މީގެ ކުރިން ސާބިތުވެފައިވާކަން ފާހަގަކުރެއްވި އެވެ.

"ގައުމެއް ބިނާކުރުމުގައި ހިނގާ ހުރިހާ ކަމެއްގައި، އެ ގައުމެއް ބައްޓަންކުރުމުގެ ފުރަތަމަ މޭސްތިރިއަކީ މަންމަ،" އަންހެނުންގެ މަސައްކަތްތަކަށް ތައުރީފު ކުރައްވަމުން ސާޖިދާ ވިދާޅުވި އެވެ.

ތަފާތު އެކި ރޮނގުން 15 އަންހެނަކަށް ރޭ ވަނީ ރެހެންދި އެވޯޑު ދީފަ އެވެ.

ފަސްޓް ލޭޑީ ސާޖިދާ ވިދާޅުވީ ރޭގެ ރަސްމިއްޔާތުން ވެސް ސާބިތުވީ އަންހެނުންގެ ގާބިލްކަމާއި ހީވާގިކަމާއި މުރާލިކަން އަދި ނަތީޖާ ހާސިލުކުރުމުގައި ވާ ގުރުބާނީ ކަމަށެވެ.