މައުލޫމާތު ނުދީގެން ގާފަރު ސްކޫލަށް ދައުވާ ކޮށްދޭން އެދިއްޖެ

ގާނޫނުގެ ދަށުން ވެސް މައުލޫމާތު ނުލިބިގެން، ކ. ގާފަރު ސްކޫލާ ދެކޮޅަށް ޖިނާއީ ދައުވާ ކޮށްދިނުމަށް އެދި ޕީޖީ އޮފީހަށް ހުށަހަޅައިފި އެވެ.

ޕީޖީ އޮފީހުގެ މީޑިއާ އޮފިޝަލް މިދިޔަ ބުދަ ދުވަހު ވިދާޅުވީ، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން މައުލޫމާތު ފޯރުކޮށްދިނުމަށް އެދުނު މުއްދަތުގައި އެކަން ނުކުރުމާއި އެ ނިންމުން އިސްތިއުނާފު ނުކޮށް އޮތުމުން، ގާފަރު ސްކޫލަށް ދައުވާ ކޮށްދިނުމަށް އެދި އިންފޮމޭޝަން ކޮމިޝަނަރުގެ އޮފީހުން ހުށަހަޅާފައިވާ ކަމަށެވެ.

ނަމަވެސް، މިދިޔަ މަހުގެ 30 ގައި ޕީޖީ އޮފީހަށް ފޮނުވި މައްސަލައިގައި އަދި ވަކި ގޮތެއް ނުނިންމަ އެވެ.

އެނގިފައިވާ ގޮތުގައި، ގާފަރުގެ އާއްމު މީހަކު ސްކޫލަށް ހުށަހެޅީ ސިހުރާ ގުޅޭ މައުލޫމާތުތަކެއް ހޯދުމަށެވެ. އެކަމާ ގުޅޭ ބައެއް މައުލޫމާތުތައް، އެ ހޯދަން ހުށަހެޅި މީހާއާ ހިއްސާކުރި އެވެ.

ނަމަވެސް، ދައުވާ ކޮށްދޭން އައިކޮމުން ޕީޖީ އޮފީހުގައި އެދުނީ ބޭނުންވި ހުރިހާ މައުލޫމާތެއް ފޯރުކޮށް ނުދީގެންނެވެ.

މައުލޫމާތު ނުދީގެން ރައީސް އޮފީހާ ދެކޮޅަށް ވެސް ދައުވާކުރަން ވެސް އައިކޮމް އިން ވަނީ މިދިޔަ އަހަރު ހުށަހަޅައިފަ އެވެ. އެއީ، ވެކްސިން ޖެހުމާ ގުޅޭ މައުލޫމާތުތަކެއް ހޯދުމަށް، ކުރީގެ ސަރުކާރުގައި 2022 ވަނަ އަހަރު މީހަކު އެދުމުން އެ މައުލޫމާތު ނުދިން މައްސަލައެކެވެ.