ބާބްރީ މިސްކިތް ތަޅާލި މައްސަލާގައި ބީޖޭޕީގެ އިސް ލީޑަރުންނަށް ދައުވާ ކުރަނީ

ނިއު ދިއްލީ (އެޕްރީލް 19) - އިންޑިއާގެ އަޔޯދިޔާގައި ހުންނަ 16 ވަނަ ގަރުނުގެ ބާބްރީ މިސްކިތް ތަޅާލި މައްސަލައިގައި ޖިނާއީ ކުށުގެ ރޭވުންތައް ރާވާފައިވާ ކަމުގެ ތުހުތުގައި ބާރްތިޔާ ޖަނަތާ ޕާޓީ (ބީޖީޕީީ)ގެ އިސް ލީޑަރުންގެ މައްސަލަ ބެލުމަށް ސްޕްރީމް ކޯޓުން މިއަދު އަންގައިފި އެވެ.

ދައުވާ ކުރާ ފަރާތްތަކުގެ ތެރޭގައި ބީޖޭޕީ ސީނިއާ ލީޑަރު އެލްކޭ އަދުވާނީ އާއި ޔޫނިއަން މިނިސްޓަރު އުމާ ބާރުތީ ހިމެނެ އެވެ. މިސްކިތް ތަޅާލި އިރު އުއްތަރަ ޕްރަދޭޝްގެ ޗީފް މިނިސްޓަރަކަށް ހުންނެވި ކަލިޔަން ސިންގަކީ ރާޖަސްތާނުގެ މިހާރުގެ ގަވަރުނަރެވެ. އޭނާގެ ޝަރީއަތް ކުރެވޭނީ ގަވަރުނަރުކަމުގެ ދައުރު ނިމުމުން ކަމަށް ވެސް ސްޕްރީމް ކޯޓުން ވަނީ އަންގައިފަ އެވެ. އިންޑިއާގެ އެންމެ މަތީ ކޯޓުން ވަނީ ކޮންމެ ދުވަކު ޝަރީއަތްތައް ބާއްވައިގެން ނަމަވެސް ދެ އަހަރު ތެރޭ މައްސަލަ ނިންމުމަށް އަންގައިފަ އެވެ.

އަދުވާނީ، 89، އާއި ބީޖޭޕީގެ އެހެން އިސް ލީޑަރުންގެ މައްޗަށް ވަނީ 1992 ވަނަ އަހަރު ބާބްރީ މިސްކިތް ތަޅާލުމަށް ހިންދޫންގެ ހަރުކަށި ފަރާތްތަކަށް ހިތްވަރު ލިބޭ ގޮތަށް ވާހަކަ ދައްކާފައިވާ ކަމަށް ބުނެ ދައުވާ ކޮށްފަ އެވެ. އެ ޝަރީއަތްތައް ކުރިއަށް ގެންގޮސްފައި ވަނީ ރައެ ބަރެލީގަ އެވެ. ނަމަވެސް ބީޖޭޕީގެ ލީޑަރުންގެ ޝަރީއަތް ދެން ކުރާނީ ލަކްނޯގަ އެވެ. މިސްކިތް ތަޅާލުމުގެ ތުހުމަތުގައި 20 މީހެއްގެ މައްޗަށް ވަނީ އެހެން ދައުވާއެއް ވެސް އުފުލައިފަ އެވެ.

ސީބީއައި އިން ބުނެފައި ވަނީ މިސްކިތް ތަޅާލި ދުވަހު، އެ މިސްކިތާ ކައިރީގައި ހުރި ސްޓޭޖެއްގައި ބީޖޭޕީގެ ލީޑަރުން ވަނީ މިސްކިތް ތަޅާލުމަށް ހިތްވަރު ލިބޭ ގޮތަށް ވާހަކަ ދައްކައިފައި ކަމަށެވެ. އަދި މިސްކިތް ތަޅާލި ދުވަހުގެ ކުރީ ރޭ އަދުވާނީ އާއި ބީޖޭޕީގެ އެހެން ލީޑަރުން ބައްދަލުކޮށްފައިވާ ކަމަށް ވެސް ސީބީއައި އިން ބުނެފައިވެ އެވެ. އަދި އެއީ މިސްކިތް ތަޅާލުމުގެ ޕްލޭން ކުރިއަށް ގެންދިއުމުގެ ރޭވުމުގެ ބައްދަލުވުމެއް ކަމަށް ވެސް ބުނެފައިވެ އެވެ.

ބާބްރީ މިސްކިތް ތަޅާލީ އެ މިސްކިތް ހުރި ތަނުގައި ފައްޅިއެއް ހެދުމަށެވެ. ހިންދޫންގެ ގިނަ މީހުން ގަބޫލް ކުރަނީ ބާބްރީ މިސްކިތް ހަދާފައި ވަނީ ލޯޑް ރާމް އުފަންވި ތަނުގައި ކަމަށެވެ. އަދި މޫގަލް އެމްޕަޔާ މިސްކިތް ހެދީ އެ ތަނުގައި ހުރި ފައްޅި ތަޅާލުމަށް ފަހު ކަމަށް ހިންދޫން ބުނެ އެވެ. އެހެންވެ އެ ތަނުގައި ފައްޅިއެއް ހަދަން ހިންދޫން ހިންގި ހަރަކާތުގެ އެންމެ އިސްކޮށް ހުރީ އަދުވާނީ އެވެ. މިސްކިތް ތަޅާލުމާ ގުޅިގެން ހިންދޫންނާއި މުސްލިމުންނާ ދެމެދު އުފެދުނު ހަމަނުޖެހުންތަކުގައި 2،000 އަށް ވުރެ ގިނަ މީހުން ވަނީ މަރުވެފަ އެވެ.