ބިޕާޝާގެ ކައިވެނީގެ ހަދިޔާއަކަށް ސަލްމާން ގެއެއް ދިނީތަ؟

ބިޕާޝާ ބާސޫ އާއި ކަރަން ސިންގް ގްރޯވަރުގެ ކައިވެނީގެ ހަދިޔާއަކަށް ބިޕާޝާގެ އެކުވެރިޔާ އަދި ފިލްމީ ތަރި ސަލްމާން ޚާން އޭނާއަށް 10 ކްރޯޑު (100 މިލިއަން ރުޕީޒް)ގެ ގެއެއް ދިން ކަމަށް ދަނީ ވާހަކަ ދެކެވެމުންނެވެ. މި ވާހަކަ ގިނަ ބަޔަކު ގަބޫލު ވެސް ކޮށްފި އެވެ. އެކަމަކު ބިޕާޝާ ބުނަނީ އެއީ ދޮގެއް ކަމަށެވެ.

ބިޕާޝާ، 37، ބުނަނީ އެ ވާހަކަތަކުގައި އެއްވެސް ހަގީގަތެއް ނެތް ކަމަށެވެ.

"މިއީ އަހަރެން މިހާތަނަށް އަޑުއެހި އެންމެ ބޮޑު ދޮގު. އަހަރެން ކީއްކުރަން މީހެއްގެ އަތުން މިކަހަލަ ހަދިޔާއެއް ހޯދަންވީ،" ބިޕާޝާ ކުރި ޓުވީޓެއްގައި ބުނެފައިވެ އެވެ.

ބިޕާޝާ އާއި ކަރަން ބައްދަލުވީ 2014 ގައި މި ދެ ތަރިން އެކުގައި ކުޅުނު "އެލޯން"ގެ ސެޓުންނެވެ. އޭގެ ފަހުން ރައްޓެހިވެގެން އަހަރެއްހާ ދުވަސް ވަންދެން ރައްޓެހިވެގެން އުޅުމަށްފަހު ކައިވެނި ކުރީ މިދިޔަ އޭޕްރީލް މަހުގެ ތެރޭގަ އެވެ.

މި ކައިވެނީގެ ރިސެޕްޝަނަށް ސަލްމާން ޚާން، ޝާހްރުކް ޚާން އަދި ބައްޗަން އާއިލާ ގޮސްފައިވެ އެވެ.