ޑީޓިއުންގެ ލަވައަކުން އެސްޓީއޯގެ މަސައްކަތް ދައްކާލަނީ

އެސްޓީއޯ ގެ އެނިވާސަރީ އަށް ހާއްސަކޮށް ޑީޓިއުން ބޭންޑުން ތައްޔާރުކުރި ވީޑިޔޯ ލަވަ ރޭ ލޯންޗް ކޮށްފިއެވެ.

ލަވައިގެ ލިރިކްސް، ރާގު، އަދި ކޮމްޕޮސިޝަން ޑީޓިއުން އިން ތައްޔާރު ކުރުމުން މިކްސިންގް އަދި މާސްޓަރިންގް ހަދާފައިވަނީ މުހައްމަދު އިކްރާމްއެވެ. އަދި ވިޑިޔޯ ތައްޔާރު ކުރީ އޯކީޒިންކް އާ ގުޅިގެން ކަމަށް ޑީޓިއުން އިން ބުންޏެވެ.

"މި ވީޑިޔޯ އިން އެސްޓީއޯގެ މުވައްޒަފުން ކުރާ މަސައްކަތްތައް އާންމުންނަށް ފެންނާނެ،" ޑީޓިއުން ބޭންޑުން ބުންޏެވެ. "ވަރަށް ބުރަކޮށް ވަޒީފާގައި އުޅެމުންވެސް ވީޑިޔޯ ހެދުމަށް މުވައްޒަފުން ހުރިހާ އެއްބާރުލުމެއް ދިން. އެކަމަށް ވަރަށް ޝުކުރުވެރިވަން. މި ލަވަ ހެދި އިރު ވަރަށް މަޖާ... އަދި ޕްރޮޑަކްޝަން ނިމުނީމަ ވަރަށް އުފާވި، ވަރަށް ހިތް ހަމަ ޖެހުނު."

ޑީޓިއުން ބޭންޑުން މި ފަހަކަށް އައިސް ވައިގަ ހިފާ ކަހަލަ ރީތި ލަވަތައް ރިލީޒް ކުރެއެވެ. ބޭންޑަށް ކުރި އެރުން ލިބޭއިރު، އިޖްތިމާއީ ޒިންމާއެއްވެސް އަދާކުރަން ޖެހޭ ކަމަށް ޑީޓިއުން އިން ދެކެއެވެ.

"މި ލަވަ ހެދީ ޑީޓިއުންއިން ގެންގުޅޭ ސީއެސްއާރް ޕޮލިސީގެ ދަށުން. ކޮންމެ އަހަރަކު މިކަހަލަ ދެ ލަވަ ހެދޭތޯ ބަލަން،" އެ ބޭންޑުން ބުންޏެވެ.

މިދިޔަ އަހަރު ޑީޓިއުން ބޭންޑުން އޯޓިޒަމް އާ މެދު ހޭލުން ތެރިކުރުވާ ލަވަޔަކާ، ޖޭސީއައިގެ "ޕީސް އިސް ޕޮސިބަލް" ކެމްޕޭނަށް ލަވައެއް ހަދައި ދީފައެވެ.