ވިލާއިން ވިއްކާ ދިހަ ކިލޯގެ ގޭސް ފުޅިއަކުން 25ރ. ހެޔޮކޮށްފި

ވިލާ ހަކަތަ އިން ވިއްކާ 10 ކިލޯގެ ގޭސް ފުޅީގެ އަގު ރޯދައާ ދިމާކޮށް ހެޔޮ ކޮށްފި އެވެ.

އެ ކުންފުނިން ނެރުނު ނޫސްބަޔާނެއްގައި ބުނެފައި ވަނީ ކައްކާ ގޭހުގެ ދިހަ ކިލޯގެ ފުޅިއަކުން މިއަދުން ފެށިގެން 25ރ. ހެޔޮކޮށްފައިވާ ކަމަށެވެ. މި ބަދަލާ ގުޅިގެން، ކުރިން 200ރ. އަށް ވިއްކި ދިހަ ކިލޯގެ ގޭސް ފުޅިއެއް މިހާރު 175ރ. އަށް ލިބޭނެ އެވެ.

ދިހަ ކިލޯގެ ގޭސް ފުޅިއަކީ ގޭގޭގައި އާއްމުކޮށް ކައްކަން ބޭނުންކުރާ ސައިޒެވެ.

ވިލާ އިން ގޭހުގެ އަގު ހެޔޮ ކުރި އިރު، މޯލްޑިވް ގޭހުން ވެސް ވަނީ ކުރިން 200ރ. އަށް ވިއްކަމުން އައި ދިހަ ކިލޯގެ ފުޅިއަކުން 25ރ. ހެޔޮކޮށްފަ އެވެ.

އެ ކުންފުނިން ބުނީ އެއީ ރޯދަ މަހާ ދިމާކޮށް އެ ކުންފުނިން ނިންމި ނިންމުމެއް ކަމަށެވެ. އެހެންކަމުން މިއަދުން ފެށިގެން ހަ ރޯދައިގެ އެންމެ ފަހު ދުވަހާ ހަމަ އަށް، 10 ކިލޯގެ ގޭސް ފުޅިއަކުން 25 ރުފިޔާ ހެޔޮ ކޮށްފައިވާ ކަމަށް އެ ކުންފުނިން ބުންޏެވެ.