އާސަންދަ ކުންފުނީގެ މެނޭޖިން ޑިރެކްޓަރަކަށް ހަސަން އަލީ އައްޔަން ކުރައްވައިފި

އާސަންދަ ކުންފުނީގެ މެނޭޖިން ޑިރެކްޓަރަކަށް، ހައި ކޯޓުގެ ކުރީގެ ރަޖިސްޓްރާ އަދި ކުރީގެ އިމިގްރޭޝަން ކޮންޓްރޯލަރު ހަސަން އަލީ މިއަދު އައްޔަން ކުރައްވައިފި އެވެ.

ސަރުކާރު ކުންފުނިތަކުގެ ބޯޑަށް މެމްބަރުން އައްޔަންކޮށް، ވަކި ކުރުމުގެ ބާރު އޮންނަ ޕްރައިވެޓައިޒޭޝަން ބޯޑުގެ ރައީސް މުހައްމަދު ނިޒާރު ކުރެއްވި ޓްވީޓެއްގައި ވިދާޅުވީ، އާސަންދައިގެ މެނޭޖިން ޑިރެކްޓަރަކަށް ހަސަން އައްޔަން ކުރެއްވީ މިއަދު ކަމަށެވެ.

އާސަންދަ ކުންފުނީގެ އެމްޑީއަކަށް ހަސަން އައްޔަން ކުރެއްވީ، އެ މަގާމުގައި ކުރިން ހުންނެވި މައުމޫން އަބްދުއްސަމަދު މިއަދު ވަކިކޮށް، ހައުސިން މިނިސްޓްރީ އަށް ބަދަލު ކޮށްފައި ވަނިކޮށެވެ. އޭނާގެ މަގާމު ބަދަލުކުރި ސަބަބެއް ސަރުކާރަކުން ނުބުނެ އެވެ.

އާސަންދަ ކުންފުނީގެ މެނޭޖިން ޑިރެކްޓަރަކަށް އައްޔަންކުރި ހަސަން ވަނީ އިމިގްރޭޝަން ކޮންޓްރޯލަރު ކަމާއި ހައި ކޯޓުގެ ރެޖިސްޓްރާގެ މަގާމުގެ އިތުރުން ހައުސިން މިނިސްޓަރުގެ ނައިބުކަން ވެސް ކުރިން ކުރައްވައިފަ އެވެ. އޭނާ ހައި ކޯޓުގެ ރެޖިސްޓްރާގެ މަގާމުގައި ހުންނަވަނިކޮށް، މިދިޔަ މަހު ކުއްލި ގޮތަކަށް އެ މަގާމުން ވަނީ ވަކިކޮށްފަ އެވެ.