ސައުދީގައި އަލްޖަޒީރާ ދައްކައިފި ނަމަ ބޮޑު ޖޫރިމަނާއެއް

ރިޔާޒް (ޖޫން 10) - ސައުދީ އަރަބިއާގެ ހޮޓާތަކުގައި ގަތަރުގެ އަލް ޖަޒީރާ ޗެނަލްތައް ދެއްކުން މަނާކޮށް، އެ އަމުރާ ޚިލާފުވާ ހޮޓާތަކުގެ ހުއްދަ ބާތިލްކޮށް އަދި 100،000 ރިޔާލް (26،000 ޑޮލަރު) އާ ހަމައަށް ޖޫރިމަނާ ކުރުމުގެ އަމުރެއް ނެރެފި އެވެ.

ސައުދީ ކޮމިޝަން ފޯ ޓޫރިޒަމް އެންޑް ނޭޝަނަލް ހެރިޓޭޖް އިން ނެރުނު ބަޔާނެއްގައި ވަނީ އަލް ޖަޒީރާ މީޑިއާ ނެޓްވޯކުގެ ހުރިހާ ޗެނަލެއް ބަންދު ކުރަން އަންގައިފަ އެވެ. އޭގެ ތެރޭގައި ހޮޓާތަކާއި ޓޫރިސްޓް ފެސިލިޓީތަކާއި ރެސިޑެންޝަލް ޔުނިޓްތައް ވެސް ހިމެނެ އެވެ.

"މި ސާކިއުލާއާ ޚިލާފުވާ ފަރާތްތަކުގެ ހުއްދަ ބާތިލްކޮށް 100،000 ރިޔާލްއާ ހަމައަށް ޖޫރިމަނާ ކުރެވޭނެ،" ބަޔާނުގައި ބުނެފައިވެ އެވެ.

ގަތަރާ ސިޔާސީ ގުޅުން ކަނޑާލި ފަހުން ސައުދީ އަރަބިއާ އާއި ޔޫއޭއީ އަދި ބަހުރޭނުން ދަނީ ދޯހާއާ ދެކޮޅަށް އިތުރު އެތައް ފިޔަވަޅެއް އަޅަމުންނެވެ. ޔޫއޭއީ އާއި ބަހުރޭނުން ވަނީ ގަތަރަށް ހަމްދަރުދީ ފާޅުކުރާ ފަރާތްތައް ޖޫރިމަނާކޮށް ޖަލަށްލާނެ ކަމަށް ބުނެފަ އެވެ. ޔޫއޭއީން ވަނީ ގަތަރަށް ހަމްދަރުދީވެ އެއްވެސް ގޮތަކުން ޝުއޫރެއް ފާޅުކޮށްފި ނަމަ 500،000 ދިރުހަމް (136،000 ޑޮލަރު) އަށް ވުރެ މަދު ނޫން އަދަދަކުން ޖޫރިމަނާކޮށް އަދި 15 އަހަރާ ހަމައަށް ޖަލަށްލާނެ ކަމަށް ބުނެފަ އެވެ. ބަހުރޭނުން ވަނީ ގަތަރަށް ހަމްދަރުދީވާ ފަރާތްތައް ތިން އަހަރަށް ޖަލަށްލާނެ ކަމަށް ބުނެފަ އެވެ.

ސައުދީން ވަނީ އެއްގަމާއި ކަނޑާއި ވައިގެ މަގުން ކުރާ ހުރިހާ ދަތުރެއް ގަތަރަށް ބަންދުކޮށްފަ އެވެ.