ވިލިނގިލީގައި ފެން ބޮޑުވެ ގިނަ ގެތަކަށް ގެއްލުން ލިބިއްޖެ

ރާއްޖޭގެ ދެކުނުގެ ރަށްތަކަށް ކުރަމުން އަންނަ ވިއްސާރައިގައި ގއ. ވިލިނގިއްޔަށް ބޯކޮށް ވާރޭވެހި، ގިނަ އަދަދެއްގެ ގެތަކުގައި ފެން ބޮޑުވެ، ގެއްލުންތަކެއް މިއަދު ލިބިއްޖެ އެވެ.

ވިލިނގިލީ ކައުންސިލް އިދާރާގެ އިންފޮމޭޝަން އޮފިސަރު ރަޒިއްޔާ މުހައްމަދު ވިދާޅުވި ގޮތުގައި އިއްޔެ ހަވީރުން ފެށިގެން އެ ރަށަށް ބޯކޮށް ވާރޭވެހި، މުޅި ރަށު ތެރޭގައި ވަނީ ފެން ބޮޑުވެފަ އެވެ.

ރަޒިއްޔާ ވިދާޅުވި ގޮތުގައި ރަށުގައި ހުރި 400 އަށްވުރެ ގިނަ ގޭބިސީގެ ތެރެއިން ދެބައިކުޅައެއް ބަޔަށްވުރެ ގިނަ ގެތަކަށް ވަނީ ފެން ވަދެފަ އެވެ. އަދި ބައެއް ގޭގައި ހުރި ފަރުނީޗަރާއި ހިފާ ގެންގުޅޭ ސާމާނު ވަރަށް ބޮޑަށް ހަލާކުވެފައިވާ ކަމަށް ވެސް ރަޒިއްޔާ ވިދާޅުވި އެވެ.

ރަށު ތެރޭގައި ބޮޑުވި ފެންގަނޑު ހިއްކުމުގެ މަސައްކަތް ކައުންސިލް މެމްބަރުންނާއި އެތަނުގެ އިދާރީ މުވައްޒަފުންނާއި ފުލުހުންނާއި ރެޑްކްރޮސެންޓް ގުޅިގެން ކުރަމުން އަންނަ ކަމަށް ވެސް އޭނާ ވިދާޅުވި އެވެ. އާބާދީގައި ގާތްގަނޑަކަށް 5،000 މީހުން ހިމެނޭ ވިލިނގިލީގެ ގިނަ މަގުތަކެއްގައި ވަނީ ތާރު އަޅައިފަ އެވެ.

އޭނާ ވިދާޅުވީ ރަށު ތެރޭގައި ފެން ބޮޑުވުމުގެ ސަބަބުން ސްކޫލަށް ކިޔެވުމަށް ވެސް އައީ މަދު ކުދިންތަކެކެވެ. އަދި ރަށު ސްކޫލްގައި ވެސް އެއް ފޫޓަށް ފެން ބޮޑުވެފައިވާ ކަމަށް އޭނާ ވިދާޅުވި އެވެ.

"ސްކޫލްގައި ކިޔަވަމުން އަންނަ 617 ކުދިންގެ ތެރެއިން 98 ކުދިން ސްކޫލަށް މިއަދު ހާޒިރުވީ. އެކަމަކު ވެސް ސްކޫލްގެ ކިޔެވުން މެދުކަނޑާނުލާ ކުރިއަށް އެބަދޭ،" ރަޒިއްޔާ ވިދާޅުވި އެވެ.

ރާއްޖޭގެ ދެކުނުގެ ހިސާބުތަކަށް މިހާރު ކުރަމުންދާ ވިއްސާރައިގައި ބައެއް ރަށްރަށުގައި ދަނީ ފެންބޮޑުވަމުންނެވެ. އެގޮތުން ލ. ފޮނަދު އަށް ކުރި ވިއްސާރައިގައި ވެސް ބައެއް ގެތަކުގައި ފެން ބޮޑުވި އެވެ. ފެން ބޮޑުވި ރަށްތަކުގައި ފެން ހިއްކުމުގެ މަސައްކަތް އެމްއެންޑީއެފުން އަންނަނީ ކުރަމުންނެވެ.

މޫސުމާ ބެހޭ އިދާރާގެ އޮފިޝަލަކު ވިދާޅުވި ގޮތުގައި ކުރިއަށް އޮތް 24 ގަޑިއިރު ވެސް ރާއްޖޭގެ ބޮޑު ބަޔަކަށް ވިއްސާރަ ކުރާނެ ކަމަށް ލަފާ ކުރެވެ އެވެ. ހާއްސަކޮށް ދެކުނުގެ ރަށްތަކަށް މޫސުން ގޯސްވާނެ ކަމަށް ބެލެވޭ ކަމަށް ވެސް އޮފިޝަލް ވިދާޅުވި އެވެ.

"ތ. އަތޮޅުން ފެށިގެން އައްޑު އަތޮޅާ ދެމެދު ހިމެނޭ ރަށްތަކަށް ގުގުރުމާއެކު ބޯކޮށް ވާރޭ ވެހޭނެ ކަމަށް ލަފާ ކުރެވޭ. އެހެންވެ އެ ސަރަހައްދުތަކަށް ވައިޓް އެލާޓް ނެރެފައިވާނީ،" އޮފިޝަލް ވިދާޅުވި އެވެ.