މޫސުން ވަރަށް ބޮޑަށް ގޯސް، ބ. އަތޮޅުން ދ. އަތޮޅަށް އޮރެންޖު އެލާޓް!

މޫސުން ވަރަށް ބޮޑަށް ގޯސްވެ، ރާއްޖޭގެ ބޮޑު ސަރަހައްދަކަށް މޫސުމާ ބެހޭ އިދާރާ އިން މިރޭ އޮރެންޖު އެލާޓް ނެރެފި އެވެ.

އޮރެންޖު އެލާޓް ނެރެފައިވަނީ މާލެ ސަރަަހައްދު ހިމެނޭހެން ބ. އަތޮޅުން ފެށިގެން ދ. އަތޮޅާ ހަމައަށެވެ.

މިރޭ 9:45 އިން ދަންވަރު 12 އަށް ނެރުނު އޮރެންޖު އެލާޓުގައިވާ ގޮތުން މި ވަގުތުތަކުގައި މި ސަރަހައްދަށް ގުގުރުމާ އެކު ބޯކޮށް ވާރޭވެހި، ފެންބޮޑުވާނެ ކަމަށް ލަފާކުރެވެ އެވެ.

އޮރެންޖް އެލާޓް ނެރުމުގެ އިރުކޮޅެއް ކުރިން އެ ސަރަހައްދުގެ ބައެއް އަތޮޅުތަކަށް ޔެލޯ އެލާޓް ވެސް ނެރުނެވެ. އިތުރު އަތޮޅުތަކާ އެކު އެލާޓް ލެވެލް މަތި ކުރީ އޭގެ ގަޑިއިރެއް ފަހުންނެވެ.

ރާއްޖޭގައި މޫސުން ދަރަޖަ ކޮށްފައި އޮންނަ ގޮތުން ނެރެނީ ވައިޓް، ޔެލޯ، އޮރެންޖް، ރެޑް އަދި ވިއްސާރަ އަލިވުމުން، ގްރީން އެލާޓެވެ. އޮރެންޖް އެލާޓް ނެރެނީ އެއް ގަޑިއިރު ތެރޭގައި 90 މިލިމީޓަރުގެ ވާރޭވެހި، ގަޑިއަކު 63 މޭލަށް ވައި ޖެހޭނެ ކަމަށް ލަފާކުރެވުމުންނެވެ.

މާލެ އަށް އިއްޔެ ވެސް ވަރަށް ބޯކޮށް ވާރޭ ވެހިފައިވާއިރު، މިއަދު ހަވީރުން ފެށިގެން މެދުނުކެނޑި ވެހެމުންދާ ވާރެއާ އެކު، ގިނަ މަގުތަކުގައި ވަނީ އާދަޔާ ހިލާފަށް ފެންބޮޑުވެފަ އެވެ. އެހެންވެ، މަގުތަކުން ފެން ހިންދުމުގައި އެމްއެންޑީއެފްގެ ފަޔާ އެންޑް ރެސްކިޔު ސާވިސްގެ ސިފައިން މިހާރު ވެސް އަންނަނީ ހަރަކާތްތެރިވަމުންނެވެ. އަދި ފެންބޮޑުވާ ސަރަހައްދުތަކުގައި ވެލި ބަސްތާ ޖެހުމުގައި ވެސް ސިފައިން އެބަ ހަރަކާތްތެރިވަމުންނެވެ.

މެޓުން ވަނީ ކުރިއަށް އޮތް ދުވަސްތަކުގައި ބޯކޮށް ވާރޭވެހި، ގުގުރާނެ ކަމަށް ލަފާ ކުރެވޭތީ މޫސުމަށް ސަމާލުވާން އިލްތިމާސް ކޮށްފަ އެވެ.