ބޮޑު ދުވަހެއް، އިދިކޮޅު ފަރާތްތަކަށް 45 ސޮއި

މ. ކުނޫޒްގައި މިއަދު އޮތް ނޫސްވެރިންގެ ބައްދަލުވުމަށް ނޫސްވެރިން ވަތްއިރު، އިދިކޮޅު ސިޔާސީ ލީޑަރުންނާއި މެމްބަރުން ތިއްބެވީ އުފާފާޅުކުރެއްވުމުގަ އެވެ. އެއް ބޭފުޅަކު އަނެއް ބޭފުޅަކާ ސަލާމްކުރައްވައި "ކާމިޔާބު ވެއްޖެ" ކަމަށް ވިދާޅުވެ އެވެ. އެކަކު އަނެކަކަށް އިނގިލިން އިޝާރާތްކުރައްވައި "ބަރާބަރު" ދައްކާލައްވަ އެވެ. އަނެއް ބަޔަކު ވިދާޅުވަމުން ގެންދެވީ "އިރާދަކުރެއްވިއްޔާ މިކަން ދެން މި ނިމުނީ" ކަމަށެވެ.

އިދިކޮޅު ފަރާތްތަކަށް ލިބުނު އުފަލަކީ، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ މައްސަލަ 45 މެމްބަރުންނާ އެކު ހުށަހެޅުމެވެ. މިއީ މަޖިލިހުގެ ގަވާއިދަށް ބަދަލުގެނެސް، ރިޔާސަތު ބަދަލުކުރަން 42 މެމްބަރުންގެ ސޮއި ބޭނުންވާނެ ކަމަށް ކަނޑައެޅުމާ އެކު ކުރިމަތިވި ހުރަސްތަކުގެ ތެރޭގައި ހޯދި ވަރަށް ބޮޑު ކާމިޔާބީއެއް ކަމަށް، އިދިކޮޅު މެމްބަރުން ދެކެވަޑައިގަނެ އެވެ.

ސަރުކާރާ އިދިކޮޅު ފަރާތްތަކަށް މިއަދަކީ ތާރީޚީ ދުވަހެކެވެ. މިއީ ރައްޔިތުންގެ މަޖިލިހުގެ މެޖޯރިޓީ އޮތް ސަރުކާރަކަށް، އެންމެ ދުވަހަކަށް ނަމަވެސް، ރާއްޖޭގައި އެ އަގުލަބިއްޔަތު ގެއްލުނު ފުރަތަމަ ފަހަރެވެ.

އެމްޑީޕީގެ އިބްރާހިމް މުހައްމަދު ސޯލިހު (އިބޫ) އާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ޖޭޕީގެ އަބްދުﷲ ރިޔާޒު އަދި އަދާލަތު ޕާޓީގެ އަނާރާ ނައީމް ނޫސްވެރިންނާ ބައްދަލުކުރެއްވި އިރު އެ ހޯލުގައި އިދިކޮޅު އެހެން ގިނަ މެމްބަރުންތަކެއް ވެސް ތިއްބެވި އެވެ.

ޕްރެސް ކޮންފަރެންސް ފައްޓަވަމުން އިބޫ ވިދާޅުވީ "މިއަދު މެންދުރު 11:03ގައި މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ 45 މެމްބަރުންގެ ސޮޔާ އެކު ވައްދައިފި" ކަމަށެވެ.

އޭނާ ވިދާޅުވި ގޮތުގައި މަޖިލީހުގެ ކޮންޓްރޯލް އިދިކޮޅު ފަރާތްތަކަށް ލިބުނީ މައުމޫނާއި ކުރީގެ ރައީސް މުހައްމަދު ނަޝީދުގެ އިތުރުން އަދާލަތު ޕާޓީގެ ރައީސް އިމްރާން އަބްދުﷲ ފެއްޓެވި މަސައްކަތުންނެވެ. މަސީހު މަގާމުން ވަކިކުރަން އުޅެނީ، އިބޫ ވިދާޅުވި ގޮތުގައި، މަޖިލީހުގެ ފުރިހަމަ އަޣުލަބިއްޔަތާ އެކުގަ އެވެ.

"މަޖިލީހުގެ ކަންކަން މި ހިސާބަށް ދިއުމުގެ އެންމެ ބޮޑު ޒިންމާ އުފުއްލަވަން ޖެހިވަޑައިގަންނަވާނީ މަޖިލީހުގެ ރައީސް އަބްދުﷲ މަސީހް،" އިބޫ މިހެން ވިދާޅުވުމާ އެކު ހޯލުގައި ތިއްބެވި ގިނަ މެމްބަރުން އެ ވާހަކަ އަށް ތާއީދު ކުރައްވައި ބޯ ޖެއްސެވި އެވެ.

ރިޔާޒް ވިދާޅުވީ މަޖިލީހުގެ ރައީސް ކަމުގެ މަގާމަށް މަސީހު އިހުމާލުވެވަޑައިގެންފައިވާ ކަން މަޖިލީހުގެ މެޖޯރިޓީ މެމްބަރުން ގަބޫލުކުރައްވާފައިވާ ކަމަށެވެ. އެހެންވެ ރީތި ގޮތަކީ އެމަނިކުފާނު މަގާމުން އިސްތިއުފާ ދެއްވަން ގޮވާލެއްވި އެވެ.

"އަޅުގަނޑުމެން މި ދައްކާލީ 45 މެމްބަރުން. މިއަށް ވުރެ ގިނަ މެމްބަރުން އަޅުގަނޑުމެންނާ އެކު، ރައްޔިތުންގެ ވިސްނުމާ އެކު އެބަ ތިއްބެވި. ވޯޓުގައި އެކަން ރައްޔިތުންނަށް ފެނިގެންދާނެ،" ރިޔާޒް ވިދާޅުވި އެވެ.

ދިއްގަރު ދާއިރާގެ މެމްބަރު ފާރިސް ވިދާޅުވީ އިދިކޮޅު ފަރާތްތަކުން މި ފަހަރު ވޯޓު ހަމަކުރީ "ސަރުކާރުން ބޭނުންވި ގޮތަށް"، ކަމަށެވެ. އެމްޑީޕީ އާއި ޖޭޕީ އަދި އަދާލަތުން ވަރަށް ގިނަ މަސައްކަތްތައް ކުރި ކަމަށާއި އެކަމަކު މަސީހުގެ މައްސަލާގައި އެންމެ ބޮޑު ގުރުބާނީއެއްވި އެއް ބަޔަކީ ޕީޕީއެމްގެ މަޖިލިހު މެމްބަރުން ކަން ވިދާޅުވި އެވެ.

"އަޅުގަނޑުމެން މި ހަމަކުރީ 45 ވޯޓު. މިއީ ސަރުކާރުން ބޭނުންވި އަދަދު، ވޯޓުގައި މިއަށް ވުރެ ގިނަ މެމްބަރުން އަޅުގަނޑުމެންނާ ބައިވެރިވެވަޑައިގަންނަވާނެ،" ފާރިސް ވިދާޅުވި އެވެ.

މަސީހު ވަކިކުރަން ބޭނުންވާ އަދަދަށް ސޮއި ހަމަވި ނަމަވެސް މެމްބަރުންނަށް ދެން ކުރިމަތިވާނެ ގޮންޖެހުންތާއި ކުރަން އޮތް މަސައްކަތް ބުރަ ކަން އިބޫ އާއި ފާރިސް ވެސް ފާހަގަކުރެއްވި އެވެ. ކުރިއެކޭ އެއްގޮތަށް، މެމްބަރުންނަށް ބިރު ދެއްކުމުގެ ގޮތުން ތަހުގީގުތަކާއި ޝަރީއަތްތައް ކުރިއަށް ގެންދާނެ ކަމަށް އެ ބޭފުޅުން ވިދާޅުވި އެވެ.

ސަރުކާރުން އެގޮތަށް ކަންކަން ކުރިއަސް މެމްބަރުން މިފަހަރު ތިއްބެވީ، ރިޔާޒު ވިދާޅުވި ގޮތުގައި، ސަރުކާރުން ދައްކާ ބިރަކަށް ފަހަތަށް ޖެހިވަޑައިގަންނަވާ ގޮތަކަށް ނޫނެވެ. ބިރުދައްކައިގެން ކަންކަން ހާސިލް ނުކުރެވޭނެ ކަމަށް ވެސް ވިދާޅުވި އެވެ.

އިދިކޮޅު ފަރާތްތަކާ ގުޅިވަޑައިގަތް ބައެއް މެމްބަރުން މީގެ ކުރިން ވަނީ އަލުން ރައީސް ޔާމީންގެ ފަޅި އަށް އަރުއްވާފައިވެ އެވެ. މިހާރު ސޮއިކުރައްވާފައި ތިބި ބައެއް މެމްބަރުން ޚިޔާލު ބަދަލުކުރައްވައިފި ނަމަ ވޯޓު ކާމިޔާބުވާނެތޯ ނޫސްވެރިން ސުވާލު ކުރުމުން ފާރިސް ވިދާޅުވީ ސޮއިކުރައްވާފައިވާ އެއްވެސް ބޭފުޅެއްގެ ސޮއި އަނބުރާ ގެންދަވާނެ ކަމަށް ގަބޫލެއް ނުކުރައްވާ ކަަމަށެވެ.

"އެ ބޭފުޅުން ވެސް މި ނިންމެވުން ނިންމަވާފައި ވަނީ މަޝްވަރާތަކަށް ފަހު، ލޯކަލް ކައުންސިލް އިންތިހާބުގެ ނަތީޖާއަށް ބަލައި، ރައްޔިތުން އެދޭ ގޮތަށް ވެސް ބައްލަވާފައި،" ފާރިސް ވިދާޅުވި އެވެ.

އިދިކޮޅު ފަރާތްތަކުގެ ޕްރެސް ކޮންފަރެންސް ކުރިއަށް ދަނިކޮށް، ބައެއް މެމްބަރުންގެ ސޮއި ފޯޖުކޮށްފައިވާ ކަމަށް ޕީޕީއެމްގެ ސެކްރެޓަރީ ޖެނެރަލް އަބްދުﷲ ޚަލީލް ޓުވީޓް ކުރެއްވި އެވެ. އެ ވާހަކައާ ގުޅޭ ގޮތުން ނޫސްވެރިއަކު ސުވާލު ކުރުމުން ރިޔާޒް ދެއްވީ ވަރަށް ފިނި ޖަވާބެކެވެ.

ހިނިފުޅުވަޑުވަމުން ވިދާޅުވީ "ޚަލީލްމެން މިހާރު ތިއްބަވާނީ ވަރަށް ދެރަވެފައި ދެއްތޯ؟... އެ ކަހަލަ ވާހަކަ ދައްކަނީ ދެރަ ނުވާންވެގެން، އަޅުގަނޑުމެން އެކަން ބަލައެއް ނުގަންނަން،" ކަމަށެވެ.

"އެންމެ މީހެއްގެ ވެސް ނަން ވެސް ވިދާޅުވެ ދެއްވާ، އެ މީހަކު އަމިއްލަ އަށް. އެކަން އެގޮތަށް ހިނގާފައި އޮތިއްޔާ ވަރަށް ބޮޑު މައްސަލައެއް. ފުލުހުން ބަލަން ޖެހޭނެ. އަޅުގަނޑަށް މައުލޫމާތު ލިބިފައި އޮތް ގޮތުން ވއްޖިއްޔާ އެ މީހެއްގެ ނަން އޭގައި ލިއެފައި އޮތީ އެ މީހަކު އަމިއްލަ އަށް،" ރިޔާޒް ވިދާޅުވި އެވެ.

ޕީޕީއެމުން އޭގައި ސޮއިކުރެއްވި މެމްބަރުންގެ ތެރޭގައި ހިމެނޭ އިސްދޫ ދާއިރާގެ އަހުމަދު ރަޝީދު ވަނީ އެ ޕާޓީގެ އިސް ބައެއް ބޭފުޅުންނާ އެކު ޗެނަލް 13 އަށް އަރުއްވައި ވިދާޅުވީ އެއީ ސައްހަ ސޮއެއް ނޫން ކަމަށެވެ. އެކަމަކު އޭގެ ތަފްސީލެއް އޭނާ ނުދެއްވަ އެވެ.

ލިސްޓްގައި އޮތީ އޭނާގެ ވަގު ސޮއެއް ކަމަށް ރަޝީދު ވިދާޅުވުމާ އެކު އޭނާ އާއި ފާރިސްގެ ފޮޓޯއެއް ސޯޝަލް މީޑިއާގައި އާންމުކުރި އެވެ. އެ ފޮޓޯ އިން ފެންނަނީ މަސީހުގެ މައްސަލަ ހުށަހަޅަން ސޮއިކުރައްވާ ތަން ކަމަށް، އިދިކޮޅު މެމްބަރުން ވިދާޅުވެ އެވެ.

އިދިކޮޅު އިއްތިހާދުގެ ޕްރެސް ކޮންފަރެންސް ނިންމާލީ، މަސީހުގެ ވޯޓު ބޮޑު އަޣުލަބިއްޔަތަކުން ކާމިޔާބު ކުރާނެ ކަމުގެ ޔަގީންކަން ރައްޔިތުންނަށް ދެމުންނެވެ.