އޭޖީ އަނިލްގެ އިތުބާރު ނެތްކަމުގެ މައްސަލަ ބޭރުކޮށްލައިފި

ބަންޑާރަ ނައިބު މުހައްމަދު އަނިލްގެ އިތުބާރު ނެތްކަމުގެ މައްސަލަ މަޖިލިހުގެ އިދާރާ އިން މިއަދު ބޭރުކޮށްލައިފި އެވެ.

އިދިކޮޅު ފަރާތްތަކުން 24 މެމްބަރުންގެ ސޮޔާއެކު މިދިޔަ ބުރާސްފަތި ދުވަހު މަޖިލިހަށް ވެއްދި މި މައްސަލަ ބޭރުކޮށްލީ، އެއީ ގާނޫނުއަސާސީގެ 82 ވަނަ މާއްދާގެ ދަށުން ހުށަހެޅޭނެ ގަރާރެއް ކަމަކަށް ނުވާތީ ކަމަށް މެމްބަރުންނަށް މަޖިލިހުން ފޮނުވި މެސެޖުގައިވެ އެވެ.

އަނިލް މަގާމުން ވަކިކުރުމުގެ މައްސަލަ ބާތިލްކުރީ ގާނޫނުއަސާސީގެ 82 ވަނަ މާއްދާއާ ޚިލާފަށް ހުށަހަޅާފައިވާ ގަރާރަކަށް ވާތީ ކަމަށް މަޖިލިހުގެ އިދާރާ އިން ބުނި ނަމަވެސް، އެއީ ވަޒީރުން ވަކިކުރުމާ ގުޅޭ މާއްދާއެއް ނޫނެވެ. ގާނޫނުއަސާސީގެ 82 ވަނަ މާއްދާގައި ބުނަނީ ރައްޔިތުންގެ މަޖިލިހުގެ ރައީސާއި ނައިބު ރައީސް އިންތިޚާބު ކުރުމާއި އެ ދެ ބޭފުޅުން މަގާމުން ވަކިކުރުމުގެ ވާހަކަތަކެވެ.

އަނިލްގެ އިތުބާރު ނެތްކަމުގެ މައްސަލަ މަޖިލިހުގެ އިދާރާ އިން ބޭރުކޮށްލިއިރު، މަޖިލިހުގެ ރައީސް އަބްދުﷲ މަސީހް ވަކިކުރުމުގެ ގަރާރު ވެސް ވަނީ ބާތިލްކޮށްފަ އެވެ. އެ ގަރާރު ބާތިލްކުރީ އޭގައި ސޮއިކުރެއްވި އިދިކޮޅު 45 މެމްބަރުންގެ ތެރެއިން ހަތަރު މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅުމުން، މައްސަލަ ހުށަހެޅުމަށް ގަވައިދުގައި ބުނާ އަދަދަށް ވުރެ މެމްބަރުންގެ އަދަދު ދަށްވުމުންނެވެ. ގަވައިދަށް އެންމެ ފަހުން ގެނައި އިސްލާހުގައި ވާ ގޮތުން މަޖިލިހުގެ ރައީސްގެ އިތުބާރު ނެތްކަމުގެ މައްސަލަ ހުށަހެޅޭނީ 42 މެމްބަރުންގެ ސޮޔާއެކު އެވެ.