ރަސްފަންނުގެ ޕެވިލިއަން ހިންގަން ބްރަދާސް ކޭޓަރިންއާއެކު ހެދި އެއްބަސްވުން އުވާލައިފި

ރަސްފަންނުގައި ހަދާ ޕެވިލިއަން ހިންގަން ބްރަދާސް ކޭޓަރިންއާ އެކު ހެދި އެއްބަސްވުން އުވާލައި، އަލުން ބިޑަށް ލައިފި އެވެ.

ޕެވިލިއަން ތަރައްގީކުރާ އެމްޑަބްލިއުއެސްސީން ބްރަދާސް ކޭޓަރިންއާ އެކު މިދިޔަ އޮކްޓޯބަރު 31ގައި ސޮއިކުރީ ކޭއެފްސީ އާއި ޕިއްޒާ ހަޓް ފަދަ ދުނިޔޭގެ މަޝްހޫރު ފާސްޓް ފުޑް ރެސްޓޯރަންޓް ބްރޭންޑުތައް ހިމެނޭ ގޮތަށް، ޕެވިލިއަން ތަރައްގީކޮށް ހިންގާ ގޮތަށެވެ. ދިހަ އަހަރު ދުވަހުގެ އެއްބަސްވުން އުވާލި ސަބަބެއް އެމްޑަބްލިއުއެސްސީން އާއި ބްރަދާސް ކޭޓަރިން އިން ސާފުވާ ގޮތެއް ނުވި އެވެ. ނަމަވެސް އެތަން އިމާރާތްކުރުމުގެ މަސައްކަތް މިހާރު ކުރަނީ މާޒިޔާ ކޮންސްޓްރަކްޝަނާ ހަވާލުކޮށްގެންނެވެ.

ބްރަދާސް ކޭޓަރިންއާ އެކު އެ ތަން ތަރައްގީކޮށް ހިންގުމުގެ އެއްބަސްވުމުގައި ސޮއިކުރި ދުވަހު އެމްޑަބްލިއުއެސްސީގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވި ގޮތުގައި ބްރަދާސް ކޭޓަރިންއާ ހަވާލުކުރުމާ އެކު، ކުރިއަށް އޮތް ފަސް މަސްދުވަހުގެ ތެރޭގައި އެ ތަނުގެ މަސައްކަތް ނިންމާނެ ކަމަށެވެ. ނަމަވެސް އެ ކުންފުނިން އެތަނާ ހަވާލުވުމަށް ފަހު މިހާތަނަށް އެތަނުގައި އެ ކުންފުނިން އެއްވެސް މަސައްކަތެއްކޮށްފައެއް ނުވެ އެވެ.

އެމްޑަބްލިއުއެސްސީން ނެރުނު އިއުލާނެއްގައި ބުނެފައި ވަނީ އެ ކުންފުނީގެ ފަރާތުން ދޭ މައުލޫމާތާ އެއްގޮތަށް މާލެ ވެސްޓް ކޯސްޓް ބީޗް ޕެވިލިއަން ހިންގައި ބަލަހައްޓައިދޭނެ ފަރާތެއް ހޯދަން ބޭނުންވާ ކަމަށެވެ. އަދި އެ މަސައްކަތަށް ބީލަން ހުށަހެޅުމުގެ ދައުވަތު އެ ކަމަށް ޝައުގުވެރިވާ ހުރިހާ ފަރާތްތަކަށް ހުޅުވާލާ ކަމަށް ވެސް އެ އިއުލާނުގައި ބުނެފައިވެ އެވެ.

އެ ކުންފުނިން ބުނީ އެތަން ހިންގަން ޝައުގުވެރިވާ ފަރާތްތަކަށް މިމަހުގެ 15 ދުވަހު ޕްރީބިޑް މީޓިންއެއް ބާއްވަން ހަމަޖެހިފައިވާ ކަމަށެވެ. އަދި އެކަމަށް ޝައުގުވެރިވާ ފަރާތްތަކުން ބިޑް ހުށައަޅަން ޖެހެނީ މި މަހުގެ 21 ވަނަ ދުވަހުގެ މެންދުރު 2:30ގަ އެވެ. އެ ތަން ހިންގަން ބިޑް ސެކިއުރިޓީގެ ގޮތުގައި ބިޑް ހުށައަޅާއިރު 50،000ރ.ގެ ބިޑް ސެކިއުރިޓީއެއް ހުށަހަޅަން ޖެހެ އެވެ.

އެމްޑަބްލިއުއެސްސީން ބުނީ އެތަން ހިންގަން ހަވާލުވާ ފަރާތުން ޕާފޯމަންސް ގެރެންޓީގެ ގޮތުގައި 250،000ރ. ބިޑް އެވޯޑްކުރާތާ ފަސް ދުވަހުގެ ތެރޭގައި ހުށަހަޅަންވާނެ ކަމަށެވެ.

ދެ ބުރި އަށް ހަދާ ރަސްފަންނުގެ ޕެވިލިއަން ރޭނުގެ ބޮޑު ބައެއް މިހާރު ވަނީ ނިމިފަ އެވެ. ރެސްޓޯރަންޓް އަދި ކެފޭތައް ހުންނަނީ ފުރަތަމަ ބުރީގަ އެވެ. އެންމެ ތިރީ ބުރީގައި ހަދަނީ ފަސް ފާހާނަ ހިމެނޭ ގޮތަށް، މޫދަށް އެރޭ މީހުން ފެންވަރާނެ ތަނަކާއި އާއްމުންނަށް އިށީނދެ ތިބެވޭނެ ޖާގައެކެވެ. އަދި އެ ތަނުގައި ލުއި ކާނާ ފަދަ ތަކެތި ވިއްކާ ފިހާރައެއް ވެސް ހަދަން ވަނީ ނިންމައިފަ އެވެ.