199 ޓީމާ އެކު ޕީޕީއެމުން އަގުބޮޑު ސްޕޯޓްސް ފިއެސްޓާއެއް ބާއްވަނީ

ރާއްޖޭގައި ތިބި ކުޅިވަރަށް ލޯބިކުރާ އެންމެންނަށް އަމާޒުކޮށްގެން ފޯރިގަދަ އަދި އަގުބޮޑު ސްޕޯޓްސް ފިއެސްޓާއެއް ބާއްވަން ވެރިކަންކުރާ ޕީޕީއެމުން ނިންމައިފި އެވެ.

ޕީޕީއެމްގެ ލީޑަޝިޕުގެ ގިނަ ބޭފުޅުން ބައިވެރިވެވަޑައިގެން އެ ޕާޓީގެ އޮފީހުގައި ބޭއްވި ނިއުސް ކޮންފަރެންސްގައި ޕާޓީގެ ނައިބު ރައީސް އަދި ފޮނަދޫ ދާއިރާގެ މެމްބަރު އަބްދުއްރަހީމް ވިދާޅުވީ ރާއްޖޭގެ ހުރިހާ ސަރަހައްދަކަށް ހުޅުވާލައިގެން ކުރިއަށް ގެންދާ ކުޅިވަރު އީދުގައި ފުޓްސަލް މުބާރާތަކާއި ވޮލީ މުބާރާތެއް އޮންނާނެ ކަމަށެވެ. ފުޓްސެލް ހާއްސަކޮށްފައި ވަނީ ފިރިހެނުންނަށް ކަމަށާއި އަންހެނުންނަށް ބާއްވަނީ ވޮލީ މުބާރާތެއް ކަމަށް ވެސް ވިދާޅުވި އެވެ.

އޭނާ ވިދާޅުވި ގޮތުގައި ރާއްޖޭގައި މީހުން ދިރިއުޅޭ ހުރިހާ ރަށަކުން ވެސް އެ މުބާރާތުގައި ބައިވެރިވާނެ އެވެ. ކޮންމެ މުބާރާތެއްގައި 199 ޓީމު ބައިވެރިވާނެ ކަމަށް ވެސް އަބްދުއްރަހީމް ވިދާޅުވި އެވެ.

"މިއީ ރާއްޖޭގައި މިހާތަނަށް ބޭއްވޭ އެންމެ ބޮޑު މުބާރާތް. ވޮލީ އާއި ފުޓްސަލްގައި ވެސް 199 ޓީމު ބައިވެރިވާނެ ކަމަށް އަޅުގަނޑު މި ބަލަނީ. މުބާރާތުގައި ކޮންމެ ރަށަކުން ވެސް ބައިވެރިވެވޭނީ އެއް ޓީމަށް،" އަބްދުއްރަހީމް ވިދާޅުވި އެވެ.

އަގުބޮޑު އިނާމުތައް ހުށަހަޅާފައިވާ މި މުބާރާތުގައި ކްލަބު ޖަމިއްޔާތަކުގެ ނަމުގައި ބައިވެރިއެއް ނުވެވެ އެވެ. މުބާރާތް ތަމްސީލްކުރެވޭނީ ރަށުގެ ނަމުގައި ކަމަށް ވެސް ޕީޕީއެމުން ބުންޏެވެ. ބޭނުމަކީ، އަބްދުއްރަހީމް ވިދާޅުވި ގޮތުގައި، ރައްޔިތުންގެ މެދުގައި އެކުވެރިކަމާއި އެއްބައިވަންތަކަން ގާއިމްކުރުމެވެ.

މުޅި މުބާރާތުގެ އެއް ވަނަ ޓީމަށް ހުށަހަޅާފައި ވަނީ 200،000ރ. އެވެ. ދެ ވަނަ ޓީމަށް 150،000ރ. ހުށަހަޅާފައިވާއިރު ތިން ވަނަ ޓީމަށް 75،000ރ.ގެ ފައިސާގެ އިނާމު ވަނީ ހަމަޖައްސައިފަ އެވެ.

މި ފިއެސްޓާގައި ހިމެނެނީ އަތޮޅު މުބާރާތްތަކާއި ޒޯން މުބާރާތްތަކެވެ. އެގޮތުން އަތޮޅު މުބާރާތްތަކުގެ ޗެޕްމިއަނުން ޒޯން މުބާރާތުގައި ބައިވެރިވުމުގެ ފުރުސަތު ލިބެ އެވެ. މާލެއާ އެކު ފިއެސްޓާ ހަ ޒޯނަކަށް ބަހާލާފައިވާއިރު ފައިނަލް މެޗުތައް ކުޅޭނީ މާލޭގަ އެވެ.

ޕީޕީއެމްގެ މެނިފެސްޓޯގައި އެންމެ މުހިއްމު އިސްކަމެއް ދީފައި ވަނީ ޒުވާނުންނަށް ކަން ފާހަގަކުރައްވައި އަބްދުއްރަހީމް ވިދާޅުވީ އެ ވައުދާ އެއްގޮތަށް އެކި ރަށްތަކުގައި ގިނަ ވަސީލަތްތަކެއް ރައީސް އަބްދުﷲ ޔާމީން ގާއިމްކޮށްދެއްވާފައިވާ ކަމަށެވެ. މުބާރާތުގައި އެކަންކަން ފާހަގަކުރާނެ ކަމަށް ވެސް ވިދާޅުވި އެވެ.

ޓޫރިޒަމް މިނިސްޓަރު އަދި ޕީޕީއެމްގެ ނައިބު ރައީސް މޫސާ ޒަމީރު ވިދާޅުވީ ތިން މަހަށް ދިގު ދެމިގެންދާ މުބާރާތާ އެކު ރާއްޖޭގައި ތިބި ކުޅިވަރަށް ލޯބިކުރާ ގިނަ ޒުވާނުންނަށް ފުރުސަތުތަކެއް ހުޅުވިގެންދާނެ ކަމަށެވެ. އަދި މިއީ، ރައްޔިތުން އެއްބައިވަންތަވެ އެކުވެރިކަން އާލާކުރަން ވެސް ރަނގަޅު ފުރުސަތެއް ކަން ފާހަގަކުރެއްވި އެވެ.