ބީޖީ ބަލިކޮށް ވިކްޓަރީ ލީގުގައި ފުރަތަމަ މޮޅު ހޯދައިފި

އުރީދޫ ދިވެހި ޕްރިމިއާ ލީގުގައި މިރޭ ބީޖީ ސްޕޯޓްސް 2-0 އިން ބަލިކޮށް މި ފަހަރު ލީގުގައި ވިކްޓަރީ ފުރަތަމަ ފަހަރަށް މެޗަކުން މޮޅުވެއްޖެ އެވެ.

މިރޭގެ މެޗުގެ ކުރިން ވިކްޓަރީ ކުޅުނު ފަސް މެޗުގެ ތެރެއިން ހަތަރު މެޗުން ވަނީ ބަލިވެފަ އެވެ. ވިކްޓަރީ ވަނީ މި މޮޅާ އެކު ލީގުގެ ހަތް ވަނަ އަށް ޖެހިލައިފަ އެވެ. އެއީ ހަ މެޗުން ހަތަރު ޕޮއިންޓް ހޯދައިގެންނެވެ. މިރޭގެ ބައްޔާއެކު ބީޖީ ވަނީ ލީގުގެ އަށް ވަނަ އަށް ވެއްޓިފަ އެވެ. ހަަ މެޗުން އެ ޓީމަށް ލިބިފައިވަނީ ދެ ޕޮއިންޓެވެ.

ވިކްޓަރީގެ ދެ ލަނޑު ވެސް މެޗުގެ ދެ ވަނަ ހާފްގައި ކާމިޔާބުކުރީ މެޗުގެ މޮޅު ކުޅުންތެރިއާގެ މަގާމު ހޯދި ގޮޑްފްރޭ ވެސްޓް އެވެ.

ރަސްމީ ބޯޅަ ދަނޑުގައި މިރޭ ކުޅުނު މެޗު ފެށިގެން 17 ވަނަ މިނިޓްގައި ބީޖީގެ ބިދޭސީ ފޯވާޑް ކިންގްސްލީ އެލެޗީ އަށް ވަނީ ގޯލާ އަމާޒުކޮށް ހަމަލާއެއް އުފައްދަން ރަނގަޅު ފުރުސަތެއް ލިބިފަ އެވެ. ވިކްޓަރީ ދެ ކުޅުންތެރިން ކައިރިން ނައްޓާލުމަށް ފަހު ކިންގްސްލީ ލަސްކޮށްލުމުން އެ ބޯޅަ ފޮނުވާލެވޭ ގޮތެއްނުވި އެވެ.

ފުރަތަމަ ހާފްގައި ވިކްޓަރީގެ ފަރާތުން މާ އެދެވޭ އެޓޭކްތަކެއް ނުފެނުނު ނަމަވެސް ދެ ވަނަ ހާފްގައި އެ ޓީމުން ކުޅުން ރަނގަޅުކުރި އެވެ. މެޗުގެ 61 ވަނަ މިނިޓްގައި ވިކްޓަރީގެ މުހައްމަދު ރިޝްވާން ނަގައިދިން ހުރަހަކުން މުހައްމަދު ތަސްނީމް (ތައްތި) ބޮލުން ފޮނުވާލި ބޯޅަ ދިޔައީ ހުރަސް ދަނޑިމަތިންނެވެ.

ވިކްޓަރީން ލީޑު ނެގީ މެޗުގެ 71 ވަނަ މިނިޓްގަ އެވެ. ތައްތި މަތިން ނަގައިދިން ހުރަަހަކުން ބީޖީ ހާފް ތެރޭގައި ހުސްކޮށް ހުރެ ވެސްޓް ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ. ވެސްޓް ވަނީ އޭގެ ހަތަރު މިނިޓް ފަހުން ދެ ވަަނަ ލަނޑު ކާމިޔާބު ކޮށްފަ އެވެ.

މެދުތެރެއިން ހުސްކޮށްލާފައި ވެސްޓް އަށް ދިން ބޯޅަ ހިފައިގެން އޭރިއާ ތެރެއަަށް ވަދެ އޭނާ މި ލަނޑު ޖެހީ ބީޖީގެ ކީޕަރު މުހައްމަދު ސާގިބު ކައިރިން ނައްޓާލުމަށް ފަހު އެވެ.

ބީޖީން ވަނީ މެޗުގެ ފަހު ދިހަ މިނިޓްގައި ލަނޑެއް ކާމިޔާބުކުރަން ގިނަ އެޓޭކްތަކެއް ކޮށްފަ އެވެ. އެ ޓީމުގެ އަހުމަދު ޖައިލަމް އަށް ވިކްޓަރީ ހާފް ތެރެއިން ހުސްކޮށް ލިބުނު ބޯޅަ ފޮނުވާލި ނަމަވެސް ވިކްޓަރީ ކީޕަރު ހަސަން ތޮލާލް ވަނީ އެ ބޯޅަ މަތަކޮށްފަ އެވެ.

ލީގުގައި މާދަމާ ކުޅޭ މެޗުގައި ޓީސީ ސްޕޯޓްސް ކްލަބް ނުކުންނާނީ މާޒިޔާ ސްޕޯޓްސްއާ ދެކޮޅަށެވެ.