މަޖިލީހުގެ އިދާރާގައި ރޯވީ ސަލާމަތީ ކަންކަން ވަރުގަދަ ކުރަމުން ދަނިކޮށް

ރައްޔިތުންގެ މަޖިލީހުގެ އިދާރާގައި މިދިޔަ ހޮނިހިރު ދުވަހުގެ ރޭ ފަތިހު އަލިފާނުގެ ހާދިސާ ހިނގީ، ކުރީގެ ހާދިސާއާ ގުޅިގެން ސަލާމަތީ ކަންކަން ވަރުގަދަ ކުރަން ފަށާފައި ވަނިކޮށް ކަމަށް އެނގިއްޖެ އެވެ.

މަޖިލީހުގެ އިދާރާގެ ފުރަތަމަ ބުރީގައި ހަދާފައިވާ ވުޟޫކުރާ ތަނުގައި ބަހައްޓާފައި ހުރި ޓިޝޫ ފޮއްޓާއި ޑަސްބިންގައި މި ފަހަރު ރޯވެފައިވާއިރު، މިއީ މިފަދަ ހާދިސާއެއް ހިނގި ދެވަނަ ފަހަރެވެ.

މަޖިލީހުގެ އިދާރާގެ ފާޚާނާއެއްގައި ހުރި ޓީޝޫ އަޅާ އެއްޗެއްގައި ވެސް ވަނީ މިދިޔަ ޖުލައި 31 ގައި ރޯވެފަ އެވެ. އެ ފަހަރުގެ ހާދިސާއާ ގުޅިގެން މަޖިލީހުގެ ޖަލްސާތައް ދުވަސްކޮޅަކަށް މެދުކަނޑާލި އެވެ.

މި ދެ ހާދިސާގައި ވެސް މަޖިލީހުގެ އިދާރާ އަށް މާ ބޮޑެތި ގެއްލުންތަކެއް ލިބިފައެއް ނުވެ އެވެ. އަދި އެއްވެސް މީހަކަށް ވެސް އަނިޔާއެއް ނުލިބެ އެވެ.

އަލިފާނުގެ ހާދިސާތަކާ ގުޅިގެން މަޖިލީހުގެ އިދާރާގެ އެއްވެސް އިސްވެރިއެއްގެ ބަހެއް ނުލިބެ އެވެ. ފުލުހުން ބުނީ އަލިފާނުގެ ދެ ހާދިސާ ތަހުގީގު ކުރަމުން އަންނަ ކަމަށެވެ. އެކަމަކު އިތުރު އެއްވެސް ތަފްސީލެއް ނުދެ އެވެ.

އެކަމަކު، "މިހާރު" އަށް އެނގިފައިވާ ގޮތުގައި ފުރަތަމަ ހިނގި އަލިފާނުގެ ހާދިސާއަށް ފަހު، މަޖިލީހުގެ ސަލާމަތީ ކަންކަން ވަނީ ވަރުގަދަކޮށްފަ އެވެ. އެގޮތުން ސެކިއުރިޓީ އަށް ތިބޭ އެމްއެންޑީއެފް އޮފިސަރުންގެ އަދަދު ގިނަކޮށް، ކެމެރާތައް އިތުރު ކުރުމުގެ މަސައްކަތް ދަނީ ކުރަމުންނެވެ.

"އެމްއެންޑީއެފުން މަޖިލިސް ބެލެހެއްޓުން އިތުރަށް ވަރުގަދަ ކުރީ. އަދި މަޖިލީހުގެ އިދާރާގެ އެކި ސަރަހައްދުތަކުގައި ކެމެރާތައް އިންސްޓޯލް ކުރަމުން އަންނަނީ،" މައުލޫމާތު އެނގޭ މީހަކު ކިޔައިދިނެވެ.

މަޖިލީހުގައި އެންމެ ފަހުން ހިނގި އަލިފާނުގެ ހާދިސާއާ ގުޅިގެން އިދިކޮޅު އިއްތިހާދުގެ ތަރުޖަމާނު އަދި ގަލޮޅު ދެކުނު ދާއިރާގެ މެމްބަރު އަހުމަދު މަހްލޫފް އިއްޔެ ނޫސްވެރިންނާ ބައްދަލު ކުރައްވައި ވިދާޅުވީ މަޖިލީހަށް ގެންނަނީ ކޮން ކަހަލަ ޓިޝޫއެއްތޯ ރައްޔިތުންނަށް ސާފުކޮށްދޭން ޖެހޭ ކަމަށެވެ.

މަހްލޫފް ވިދާޅުވި ގޮތުގައި ދައުލަތުގެ ތިން ބާރުގެ ތެރެއިން އެއްބާރުގައި ކުރިން ހިނގި އަލިފާނުގެ ހާދިސާ ތަހުގީގުކޮށްފައި ނުވުމަކީ އިދިކޮޅު މެމްބަރުން ކަންބޮޑުވެވަޑައިގަންނަވާ ކަމެކެވެ.

"މި އެއްޗެހި (ޓިޝޫ ފޮށި) މީހުން ދިރިއުޅޭ ގޭގެއަށް ގޮސްފިނަމަ، އެއީ މައްސަލައެއް. މިހާ ފަސޭހަ އިން އަލިފާން ރޯވަނީ ކޮން ކަހަލަ ޓިޝޫއެއްގައި ކަމާއި ކިހިނެއްކަން އެނގެން އެބަޖެހޭ،" މަހްލޫފް ވިދާޅުވި އެވެ.

މި ފަހަރުގެ އަލިފާނުގެ ހާދިސާ ހިނގިއިރު މަޖިލީހުގެ މެމްބަރުން ތިއްބެވީ އެއްމަސް ދުވަހުގެ ޗުއްޓީއެއްގަ އެވެ. ދެން ޖަލްސާތައް ފަށާނީ އަންނަ މަހު އެވެ.

މަޖިލީހުގެ އިދާރާގެ ސަލާމަތީ ކަންކަން 24 ގަޑިއިރު ބަލަހައްޓަނީ ގާނޫނުއަސާސީގައިވާ ގޮތުން އެމްއެންޑީއެފުންނެވެ.