ގާސިމްގެ ފަރުވާގެ މުއްދަތުގެ މައްސަލަ ހައްލު ނުވުމުން ޝަރީއަތް ފަށައިފި

ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ބޭސްފަރުވާގެ މުއްދަތު އިތުރުކުރަން ގާސިމްގެ ފަރާތުން ސިވިލް ކޯޓަށް ހުށަހެޅި މައްސަލާގެ ސުލްހަވެރި ހައްލެއް ނުލިބުމުން އެ މައްސަލައިގެ ޝަރީއަތުގެ މަރުހަލާ މިއަދު ފަށައިފި އެވެ.

ރިޝްވަތުގެ މައްސަލާގައި ތިން އަހަރުގެ ޖަލު ހުކުމެއް އައިސްފައިވާ ގާސިމްގެ ހިތުގެ އާލާސްކަންފުޅަކަށް ފަރުވާ ހޯދަން ސިންގަޕޫރުގައި ހުންނެވުމަށް ކަރެކްޝަނަލް ސާވިސް އިން ދިން މުއްދަތު މާދަމާ ހަމަވާނެ އެވެ. ގާސިމްގެ ފަރާތުން އެދިފައިވަނީ ދަތުރު ކުރުމުގެ ހުއްދަ ޑޮކްޓަރު ދެއްވަން ދެން، ރާއްޖެއިން ބޭރުގައި ހުންނެވުމުގެ މުއްދަތު އިތުރުކޮށްދިނުމަށެވެ. ކުރިން ގާސިމް ރާއްޖެ ވަޑައިގަތުމަށް އެއާޕޯޓަށް ވަޑައިގަތުމުން އެއާލައިނުން ވަނީ ގާސިމް މަތިންދާބޯޓަށް އަރުވަން ދެކޮޅު ހަދައިފަ އެވެ.

ބޭސްފަރުވާގެ މުއްދަތު އިތުރު ކުރަން ދައުލަތާ ދެކޮޅަށް ހުށަހެޅި މައްސަލަ ޑިސްޕިއުޓް ރިޒޮލިއުޝަން ޑިވިޝަންގައި ހައްލު ނުވުމުން އެ މައްސަލަައިގެ ޝަރީއަތް ހިންގަން މިދިޔަ ހަފުތާގައި ވަނީ ނިންމައިފަ އެވެ. ޝަރީއަތް ހިންގުމުގެ މަރުހަލާ މިއަދު ވަނީ މައްސަލައިގެ ބަޔާންތައް ވަނީ ކޯޓުގައި ބަދަލުކޮށްފަ އެވެ. އަޑުއެހުންތައް ފަށައިގަންނާނީ އޭގެފަހުގަ އެވެ.

ގާސިމް ބޭޭރުގައި ހުންނެވުމުގެ މުއްދަތު މާދަމާ ހަމަވާއިރު ކަރެކްޝަންސް އިން ބުނެފައިވަނީ މާދަމާ ގާސިމް ރާއްޖެ ވަޑައިނުގެންފި ނަމަ އޮންނަ އުސޫލުގެ މަތިން އަމަލު ކުރާނެ ކަމަށެވެ.