ގާސިމްގެ ބޭސްފަރުވާގެ މުއްދަތު އިތުރު ނުކުރި މައްސަލަ ކޯޓަށް ހުށަހަޅައިފި

ހިތުގެ އާލާސްކަންފުޅެއްގައި ސިންގަޕޫރުން ފަރުވާ ހޯއްދަވަމުން ގެންދަވާ ޖުމްހޫރީ ޕާޓީގެ ލީޑަރު ގާސިމް އިބްރާހީމް ބޭރުގައި ހުންނެވުމުގެ މުއްދަތު މޯލްޑިވްސް ކަރެކްޝަނަލް ސާވިސް އިން އިތުރުނުކޮށްދިން މައްސަލަ، ގާސިމްގެ ވަކީލުން ސިވިލް ކޯޓަށް މިއަދު ހުށަހަޅައިފި އެވެ.

ރިޝްވަތުގެ މައްސަލައެއްގައި ތިން އަހަރުގެ ޖަލު ހުކުމެއް އިއްވާފައިވާ ގާސިމް ސިންގަޕޫރުގައި ތިން މަސް ހުންނަވަން ޖެހޭނެ ކަމަށް އެ ގައުމުގެ ޑޮކްޓަރުން ވަނީ ލަފާދީފަ އެވެ. އެކަމަކު ދެ ބުރެއްގެ މަތިން 20 ދުވަހުގެ މުއްދަތެއް ދިނުމަށް ފަހު ކަރެކްޝަނުން މިހާރު އަންގާފައި ވަނީ އިތުރަށް ދެން މުއްދަތު ދެވެން ނެތް ކަމަށެވެ.

އެންމެ ފަހުން ދިން މުއްދަތު މާދަމާ ހަމަވާނެ އެވެ. އަދި އޭގެ ކުރިން އެނބުރި ރާއްޖެ ވަޑައިގަންނަވަން އެންގުމުން މިއަދު ސިންގަޕޫރު އެއާލައިންސުން ދަތުރުކުރައްވަން ގާސިމް އެއާޕޯޓަށް ވެސް ވަޑައިގަތެވެ. އެކަމަކު އާއިލާ އިން ބުނީ، ދާދި ފަހުން ހިތުގެ އޮޕަރޭޝަނެއް ކުރެއްވި ގާސިމް ބޯޓަށް ނޭރުވި ކަމަށެވެ.

ގާސިމްގެ ވަކީލުން ނެރުނު ބަޔާނެއްގައި ބުނީ ގާސިމްގެ ބޭސްފަރުވާއަށް ހުރަސް އަޅައި، އޭނާގެ ފުރާނައަށް ނުރައްކާވާ ގޮތަށް ކަރެކްޝަންސުން އަމަލު ކުރަމުން އަންނާތީ ކަންބޮޑުވާ ކަމަށެވެ. މީހެއްގެ ބަލި ހާލަތާ މެދު ގޮތް ކަނޑައަޅައި، ބަލި މީހަކަށް ދޭން ޖެހޭ ފަރުވާ އާއި ބޭސްފަރުވާގެ މުއްދަތަކީ އިދާރީ ނިންމުމެއްގެ ގޮތުގައި ކަރެކްޝަންސް އަށް ނުނިންމޭނެ ކަމަށް ވެސް އެ ބަޔާނުގައިވެ އެވެ.

ސިވިލް ކޯޓަށް މައްސަލަ ހުށަހެޅީ، ބަޔާނުގައިވާ ގޮތުން، ކަރެކްޝަންސްގެ ފަރާތުން ތަބާވާން ޖެހޭ ގާނޫނީ އޮނިގަނޑުގައި އަމަލު ކުރަން ލާޒިމް ކުރާ އުސޫލުތަކާ ހިލާފަށް އަމަލު ކުރުމާ ގުޅިގެންނެވެ.

ބަޔާނުގައި ބުނި ގޮތުގައި ކަރެކްޝަންސްގެ އާބިޓަރީ ނިންމުން ގާނޫނީ ގޮތުން ވެސް ސައްހައެއް ނޫނެވެ.

ގާސިމް މި ވަގުތު ދަތުރު ނުކުރެއްވުމަށް ޑޮކްޓަރުން ލަފާދެއްވާފައިވާތީ، ސިންގަޕޫރު އެއާލައިންސަށް ނޭރުވުމުން މިއަދު ރާއްޖެއަށް ވަޑައިގެންނެވޭ ގޮތެއް ނުވި އެވެ.

ގާސިމްގެ ވަކީލުން މިހާރު އެދިފައި ވަނީ ގާސިމަށް ފްލައިޓްގައި ދަތުރު ކުރެއްވުމުގެ ހުއްދަ ލިބެންދެން ބޭސްފަރުވާގެ މުއްދަތު އިތުރުކޮށް ދިނުމަށެވެ.

"ސިންގަޕޫރުގައި އޭނާއަށް (ގާސިމް) ފަރުވާ ދެއްވާ ޑޮކްޓަރުން ވެސް ވިދާޅުވެފައިވަނީ އޭނާ ހެއްދެވި ހިތުގެ ޕްރޮސީޖާއަށް ފަހު އޭނާގެ ވެންޓިކިއުލާ އެކްޓޮޕިސް އިތުރަށް ބަލައި މޮނިޓާ ކުރަމުން ގެންދަން ޖެހޭ ކަމަށާއި މިހާރު ކުރެވުނު ކްރޮނެރީ އިންޓަވެންޝަން އިން ރިކަވަވުމުން، ޕްރި ސިންކޯޕް ވިތު އިލެކްޓްރޯފިޒިއޮލޮޖިކަލް ސްޓަޑީ ހަދަން ޖެހޭ ކަަމަށެވެ،" ބަޔާނުގައިވެ އެވެ.