މިސްރު ސިފައިންނަށް ހަމަލާދިން 15 މީހަކު ދަންޖައްސައި މަރައިފި

މިސްރު ސިފައިންނަށް ހަމަލާ ދިން 15 މީހެއްގެ މައްޗަށް އަސްކަރީ ކޯޓުގައި ޝަރީއަތް ކުރުމަށް ފަހު އިއްޔެ ދަންޖައްސައި މަރައިފި އެވެ.

މި 15 މީހުންނަކީ މީގެ ހަތަރު އަހަރު ކުރިން، މިސްރުގެ ސައިނާގައި ގާއިމުކޮށްފައި ހުރި ސިފައިންގެ ޗެކް ޕޮއިންޓަކަށް ހަމަލާދިނުމުގެ ކުށް ސާބިތުވި 15 މީހެކެވެ. މި މީހުންގެ މައްޗަށް މަރުގެ ހުކުމް ތަންފީޒު ކުރީ ވެރިރަށް ގާހިރާގެ ދެ ޖަލެއްގަ އެވެ.

މިއީ މިސްރު ސަރުކާރާ ދެކޮޅަށް ސައިނާގައި ހަމަލާތައް ދޭން ފެށިފަހުން މިހާ ގިނަ ބައެއްގެ މައްޗަށް އެއް ދުވަހެއްގައި މަރުގެ ހުކުމް ތަންފީޒު ކުރި ފުރަތަމަ ފަހަރެވެ.

މިސްރުގެ އަސްކަރީ ކޯޓުން ކުރި ހުކުމްގައި ބުނެފައިވާ ގޮތުގައި 2013 ވަނަ އަހަރު ސައިނާގައި މިސްރު ސިފައިންނަށް ދިން ވަރުގަދަ ހަމަލާގައި މިސްރު ސިފައިންގެ ނުވަ މީހަކު މަރައިލި ކަން ސާބިތުވެ އެވެ. އޭގެ ތެރޭގައި ސިފައިންގެ އިސް އޮފިސަރެއް ވެސް ހިމެނެ އެވެ.

ސައިނާ އިން އިދިކޮޅު ހަނގުރާމަވެރިންގެ ބާރު ކަނޑުވައިލުމަށް މިސްރު ސިފައިން ޚާއްސަ ހަރަކާތްތަކެއް ފަށާފައި ވަނިކޮށް، މިދިޔަ މަހުގެ ތެރޭގައި ވެސް ވަނީ މިސްކިތަކަށް ހަމަލާދީ 300 އަށް ވުރެ ގިނަ މީހުން މަރާލައިފަ އެވެ. ހުކުރު ދުވަހެއްގެ ހުކުރުގެ ޖަމާއަތަށް މިސްކިތަށް މީހުން އެއްވެފައި ވަނިކޮށް ދިން އެ ހަމަލާގައި އެތައް ސަތޭކަ ބަޔަކު ޒަޚަމްވި އެވެ.

އަދި މިހާރު މިސްރުގެ ގިބްތީން (އޮރްތޯޑޮކްސް ކްރިސްޓިއަނުން) ފާހަގަކުރަމުން އަންނަ ކްރިސްމަސް އާއި އައު އަހަރުގެ އިހުތިފާލްތަކާ ދިމާކޮށް ޓެރަރިސްޓް ހަމަލާއެއް ދީފާނެތީ، މިސްރުގެ އެކި ސަރަހައްދުތަކުގައި ވަނީ ސަލާމަތީ ފިޔަވަޅުތައް ވަރަށް ބޮޑަށް ވަރުގަދަ ކޮށްފަ އެވެ. ޚާއްސަކޮށް ގިބްތީ ފައްޅިތައް ހުންނަ ސަރަހައްދުތަކާއި ގިބްތީން ގިނަ ސަރަހައްދުތަކުގައި ވަނީ ސަލާމަތީ ފިޔަވަޅުތައް ވަރުގަދަ ކޮށް ފުލުހުންގެ ފޯރިމެރުން ވެސް އިތުރު ކޮށްފަ އެވެ.