ސީނާގައި މިސްރުގެ 11 ސިފައިން މަރާލައިފި

މިސްރުގެ ސައިނާގައި ހުރި ފެނުގެ ހިދުމަތްދޭ އެކުވެންޏަކަށް، ހަނގުރާމަވެރިންގެ ބަޔަކު ދިން ކުއްލި ހަމަލާއެއްގައި މިސްރު ސިފައިންގެ އޮފިސަރަކާއި 10 ސިފައިން މަރާލައިފި ކަމަށް، އެ ގައުމުގެ އަސްކަރިއްޔާ އިން ބުނެފި އެވެ.

މިސްރުގެ އަސްކަރިއްޔާ އިން ފޭސްބުކްގައި އިއްޔެ އާންމުކުރި ބަޔާނެއްގައި ބުނެފައިވާ ގޮތުން ހަނގުރާމަވެރިން ދިން މި ހަމަލާގައި 11 ސިފައިން މަރުވުމުގެ އިތުރުން، ސިފައިންގެ ފަސް މީހަކު ވަނީ ޒަހަމްވެފަ އެވެ. އެ ފަސް ސިފައިންނަށް މިހާރު އަންނަނީ އަސްކަރީ ހޮސްޕިޓަލެއްގައި ފަރުވާ ދެމުންނެވެ.

މި ހާދިސާ ހިނގީ ކޮން ދުވަހެއްގައި ކަމެއް މިސްރުގެ އަސްކަރިއްޔާ އިން ނުބުނެ އެވެ. ނަމަވެސް ހަމަލާ ދިން ހަނގުރާމަވެރިން މިހާރު ތިބީ، ސައިނާގައި މީހުން ނުއުޅޭ ހިސާބެއްގައި، މިސްރު ސިފައިންގެ ހިސޯރުގެ ދަށުގައި ކަމަށް ވެސް އެ ބަޔާނުގައި ބުނެފައިވެ އެވެ.

މިސްރުގެ އަސްކަރިއްޔާ އިން ނެރުނު ބަޔާނުގައި ބުނެފައިވާ ގޮތުން ހަނގުރާމަވެރިންގެ މި ހަމަލާގައި މަރުވި އަދި ޒަހަމްވި ހުރިހާ ސިފައިންނަކީ ވެސް، ސައިނާގެ ސަލާމަތީ ކަންތައް ބެލެހެއްޓުމަށް ޚާއްސަކޮށްފައިވާ ފައުޖުގައި ހިމެނޭ ސިފައިންނެވެ.

މަރުވި ސިފައިންގެ އާއިލާތަކަށް ތައުޒިޔާ ވިދާޅުވެ، ފޭސްބުކްގައި އިއްޔެ އާންމުކުރެއްވި ބަޔާނެއްގައި، މިސްރުގެ ރައީސް އަބްދުލް ފައްތާހް އައްސީސީ ވަނީ، ހަނގުރާމަވެރިންގެ މަގްސަދު ހާސިލު ނުވާނެ ކަމަށް ވިދާޅުވެފަ އެވެ.

"ޓެރަރިޒްމްގެ މޫތައް މިސްރުގެ ބިމުން ލުހެލުމަށް، މި ގައުމުގެ ދަރިންނާއި މިގައުމުގެ ހަތިޔާރު އެޅި ބާރުތަކުން ކަނޑައަޅާފައިވާ އަޒުމަށް، މިފަދަ ފިނޑިން ދޭ ހަމަލާތަކުން އެއްވެސް ބަދަލެއް ނާންނާނެ،" ރައީސް ސީސީ ވިދާޅުވި އެވެ.

ސައިނާގައި ދޭތެރެ ދޭތެރެ އިން މިސްރު ސިފައިންނާ ދެކޮޅަށް ހަނގުރާމަވެރިން ހަމަލާތައް ދެމުން ދިޔަ ނަމަވެސް، މިއީ މިދިޔަ ހައެއްކަ މަސް ތެރޭގައި މިހާ ގިނަ އަދަދެއްގެ ސިފައިން މަރައިލި ފުރަތަމަ ހާދިސާ އެވެ. ހަނގުރާމަވެރި އެއްވެސް ޖަމާއަތަކުން، މިހާތަނަށް މި ހަމަލާގެ ޒިންމާއެއް ނުއުފުލަ އެވެ. އާންމު ގޮތެއްގައި މިފަހަކަށް އައިސް ސައިނާ ސަރަހައްދުގައި މިފަދަ ހަމަލާތައް ދެމުން ގެންދަނީ އިސްލާމިކް ސްޓޭޓް (އައިއެސް) ޖަމާއަތަށް ނިސްބަތްވާ ހަނގުރާމަވެރިންނެވެ.

މިސްރުގެ ސައިނާގައި ހަރަކާތްތެރިވާ ހަނގުރާމަވެރި ޖަމާއަތްތައް ނައްތައިލުމުގެ މަސައްކަތް މިސްރު ސިފައިން ފަށައިގެން އުޅޭތާ މިހާރު ކިތަންމެ އަހަރެއް ވެއްޖެ އެވެ. އެފަދަ ހަނގުރާމަވެރިން އެންމެ ގިނައިން އުޅެނީ، މިސްރުގެ އުތުރުން ސައިނާގައި އޮންނަ ފަލަސްތީނުގެ ގާޒާއާ ގުޅިފައިވާ ސަރަހައްދުގަ އެވެ.

ރައީސް އަބްދުލް ފައްތާހް އައްސީސީ މިދިޔަ މަހުގެ ތެރޭގައި ވިދާޅުވެފައިވާ ގޮތުގައި ސައިނާގައި އުޅޭ ހަނގުރާމަވެރިން 2013 ވަނަ އަހަރުން ފެށިގެން މިހާތަނަށް ދިން ހަމަލާތަކުގައި، މިސްރުގެ ސިފައިންނާއި ފުލުހުންގެ ތެރެއިން 3277 މީހަކު ވަނީ މަރުވެފަ އެވެ. އަދި 12000 އަށް ވުރެ ގިނަ މީހުން ވަނީ ޒަހަމްވެފަ އެވެ.