އެމްޓީސީސީން އަލަށް ބަން އޭސީ ފެރީތަކުގެ ޚިދުމަތް ފެށުން ލަސްވެއްޖެ

އެމްޓީސީސީން މީގެ ދެ އަހަރެއްހާ ދުވަސް ކުރިން ބަންނަން ފެށި އޭސީ ތިން ފެރީގެ ތެރެއިން، ދެ އުޅަނދެއް މިދިޔަ މަހު ބޭނުންކުރަން ނިންމި ނަމަވެސް އެކަން އަނެއްކާވެސް ލަސްވެއްޖެ އެވެ.

އެ ފެރީތައް ބަންނަނީ މެރިން ޑިޒައިން ކިޔާ ކުންފުންޏަކާ ހަވާލުކޮށްގެން ރ. އިނގުރައިދޫގަ އެވެ.

މާލެ އާއި ހުޅުމާލެއާ ދެމެދު ފެރީ ދަތުރުގެ ޚިދުމަތް ދިނުމަށް ހަވާލުކޮށްފައިވާ ސަރުކާރުގެ ކުންފުނީގެ އޮފިޝަލަކު މިއަދު ވިދާޅުވީ ފެރީތައް ބޭނުންކުރަން ފެށުން ލަސްވީ އެ އުޅަނދުތައް މާލެ ނުގެނެވިގެން ކަމަށެވެ. އެކަމަކު އޭނާ ވިދާޅުވި ގޮތުގައި އެ ދެ ފެރީ އަންނަ އާދީއްތަ ދުވަހު މާލެ ގެނެވޭނެ އެވެ.

"އަންނަ އާދީއްތަ ދުވަހު އެ ދެ ފެރީ މާލެ ގެނެސް، ސްކޫލްތައް ހުޅުވެންވާއިރަށް ދަތުރުތަކުގައި ބޭނުންކުރަން ފެށޭނެ،" އޮފިޝަލް ވިދާޅުވި އެވެ.

މި ތިން ފެރީގެ މަސައްކަތް ނިންމައި އެމްޓީސީސީއާ ހަވާލުކުރުން ލަސްވާތީ، މިދިޔަ އަހަރު ބޭއްވި އެމްޓީސީސީގެ އަހަރީ އާއްމު ޖަލްސާގައި ހިއްސާދާރަކު ކުރި ސުވާލަކަށް ޖަވާބު ދެއްވަމުން ސީއީއޯ އިބްރާހިމް ޒިޔަތު ވިދާޅުވެފައި ވަނީ އެ ފެރީތައް ކަނޑައެޅިފައިވާ މުއްދަތަށް ހަވާލުކޮށްފައި ނުވާ ކަމަށެވެ. އަދި އެއްބަސްވުމުގައިވާ ގޮތުގެ މަތިން އަޅަންޖެހޭ ފިޔަވަޅު އަޅާނެ ކަމަށް އޭރު އޭނާ ވިދާޅުވެފައިވެ އެވެ. އެކަމަކު މުއްދަތަށް ނުނިންމުމުން، މެރިން ޑިޒައިންއާ މެދު ފިޔަވަޅެއް އެޅިކަމެއް އެމްޓީސީސީއަކުން ނުބުނެ އެވެ.

މެރިން ޑިޒައިން އާއި އެމްޓީސީސީއާ ދެމެދު ސޮއިކޮށްފައިވާ އެއްބަސްވުމުގައިވާ ގޮތުން ފެބްރުއަރީ 2016 ގައި އެ ފެރީތައް ހަވާލުކުރަން ޖެހެ އެވެ. ފެރީތައް ބަންނަން ހަވާލުކުރީ 12 މިލިއަން ރުފިޔާ އަށެވެ. ފެރީތަކަށް އިންޖީނު ސަޕްލައިކޮށްދެނީ އެމްޓީސީސީންނެވެ.

އެމްޓީސީސީން ކުރިން ބުނެފައި ވަނީ އޭސީ ތިން ފެރީ މާލެ ގެނައުމަށް ފަހު، މިހާރު 30 މިނެޓުން އޮންނަ "ޕްރީމިއަމް ލިންކް"ގެ ދަތުރުތައް 15 މިނެޓަށް އަވަސްކުރަން ނިންމާފައިވާ ކަމަށެވެ. އަލަށް ގެންނަ ކޮންމެ ފެރީއަކީ 100 މީހުންގެ ޖާގައިގެ ފެރީ ދޯނިތަކެއް ކަމަށް ވެސް އެމްޓީސީސީން ބުނެފައިވެ އެވެ.

ހުޅުމާލޭގައި ސަރުކާރުން އަލަށް އެޅި 661 ފްލެޓްގެ ތެރެއިން ބައެއް ތަންތަނަށް މީހުން ބަދަލުވުމާއި ޗުއްޓީ ދުވަސްވަރާ ދިމާކޮށް ގިނަ އަދަދެއްގެ ބަޔަކު އެ ފެރީތަކުން ދަތުރުކުރާތީ، ހުޅުމާލެ ފެރީ ޓާމިނަލަށް ބާރު ބޮޑުވެ، ފެރީން ދަތުރުކުރުމަށް ވަނީ ދަތިތަކާ ކުރިމަތިވެފަ އެވެ. ބައެއް ފަހަރު ފެރީތައް ފުރިގެން މީހުން ކޮޅަށް ތިބެން ޖެހިގެން ބައެއް މީހުން ފެރީން ބާލަން ވެސް ޖެހެ އެވެ.

އެމްޓީސީސީގެ ތަފާސްހިސާބުތައް ދައްކާ ގޮތުން މިހާރު އެވްރެޖްކޮށް ދުވާލަކު 22،000 އަށް ވުރެ ގިނަ މީހުން ހުޅުމާލެގެ ފެރީން ދަތުރުކުރެ އެވެ.