ޕީޖީ ގްރޫޕަށް ކުރެވޭނީ މަޖިލީހާ ގުޅޭ މަސައްކަތް އެކަނި: މައުމޫން

ޕީޕީއެމް ޕާލަމެންޓްރީ ގްރޫޕުން ބޭނުންވާ ކޮންމެ ކަމެއް ނުކުރެވޭނެ ކަމަށާއި އެ ގްރޫޕަށް ހަރަކާތްތެރިވެވޭނީ ގަވާއިދުގައި ދީފައިވާ އިހްތިސާސްތަކުގެ ތެރޭގައި މަޖިލީހާ ގުޅުން ހުރި މަސައްކަތް އެކަނި ކަމަށް އެ ގްރޫޕްގެ ލީޑަރު، އަހްމަދު ނިހާނަށް ކުރީގެ ރައީސް އަދި ޕީޕީއެމްގެ ރައީސް މައުމޫން އަބްދުލް ގައްޔޫމް އަންގަވައިފި އެވެ.

މައުމޫން މިގޮތަށް އެންގެވީ ޕީޕީއެމްގެ އެތެރޭގެ މައްސަލަތަކާ ގުޅޭގޮތުން ނިހާން ފޮނުއްވި ސިޓީއަކަށް ޖަވާބު ދެއްވައި ފޮނުއްވި ސިޓީއެއްގަ އެވެ.

އެ ސިޓީގައި މައުމޫން ވިދާޅުވީ ޕީޕީއެމްގެ އަސާސީ ގަވާއިދުގެ 38 ވަނަ ބުނާގޮތުން ޕާލަމެންޓްރީ ގްރޫޕަކީ ޕާޓީގައި ހިމެނޭ ރައްޔިތުންގެ މަޖިލީހުގެ މެމްބަރުން މަޖިލީހާ ގުޅޭ މަސައްކަތްތައް ރާވައި ވިލަރެސްކުރުމަށް އެކުލަވާލެވޭ ގްރޫޕެއް ކަމަށެވެ. އެހެންކަމުން އެ ގްރޫޕަކީ ހަމައެކަނި މަޖިލީހުގެ މަސައްކަތްތައް ރާވައި ހިންގަން އޮންނަ ގުނަވަނެއް ކަމަށް މައުމޫން ވިދާޅުވި އެވެ.

"އެހެންކަމުން މި މާއްދާގެ ބޭރުން ކަންކަން ނިންމެވުމުގެ ހައިސިއްޔަތެއް ޕީޖީ ގްރޫޕަށް ޕާޓީގެ އަސާސީ ގަވާއިދުގައި ލިބިދީފައި ނުވާ ވާހަކަ ދަންނަވަމެވެ،" ސިޓީގައި މައުމޫން ވިދާޅުވި އެވެ.

ޕާޓީގެ އެތެރޭގެ މައްސަލަތަކާ ގުޅޭގޮތުން މަޝަވަރާކުރަން ވަރަށް އަވަހަށް ކައުންސިލް ބައްދަލުވުމެއް ބާއްވަން މަސައްކަތް ކުރައްވަމުން ގެންދަވާ ކަމަށް މައުމޫން ވިދާޅުވި އެވެ.

މި މަހު ތިން ވަނަ ދުވަހު ނިހާނަށް ފޮނުއްވި ސިޓީގައި އެދިވަޑައިގެންނެވި ގޮތަށް ޕާލަމެންޓްރީ ގްރޫޕްގެ ޔައުމިއްޔާތައް ހިއްސާކޮށްދޭން މައުމޫން މި ސިޓީގައި ވެސް އެދިވަޑައިގެންނެވި އެވެ.

"ބައްދަލުވުންތައް ބޭއްވި ތާރީހާއި ތަނާއި ހާޒިރީ އާއި އަދި އެ ބައްދަލުވުންތަކަށް ހުށަހަޅުއްވައި ނިންމެވި ކަންކަން 14 ޖުލައިގެ ކުރިން އަޅުގަނޑަށް ފޮނުއްވައިދެއްވުން އެދެމެވެ،" މައުމޫން ވިދާޅުވި އެވެ.

ރައީސް އަބްދުﷲ ޔާމީނާއި މައުމޫނާ ދެމެދު އުފެދުނު ހިޔާލުތަފާތުވުންތައް ބޮޑުވެ ޕާޓީ ތެރޭގައި މިހާރު ވަނީ ދެ ފެކްޝަން އުފެދިފަ އެވެ. ޕާޓީގެ ހިންގުން ހަރުދަނާކުރަން އިސްލާހީ އެޖެންޑާއެއް މައުމޫން އެކުލަވާލައްވާފައިވާއިރު ޕާޓީ ކައުންސިލްގެ ހުއްދަ ނެތި އެމަނިކުފާނަށް އެކަން ނުކުރެއްވޭނެ ކަމަށް ރައީސް ޔާމީން ފެކްޝަންގައި ތިއްބެވި ބޭފުޅުން ގެންދަވަނީ ވިދާޅުވަމުންނެވެ.