މަތީ ފެންވަރުގެ ރިސޯޓެއްގެ ގޮތުގައި 125 ކޮޓަރިއާއެކު ވައްކަރު ހުޅުވައިފި

މަތީ ފެންވަރުގެ ރިސޯޓެއްގެ ގޮތުގައި، 125 ކޮޓަރިއާއެކު ބ. ވައްކަރު ޓޫރިސްޓުންނަށް ހުޅުވާލައިފި އެވެ.

ޔުނެސްކޯގެ ބަޔޮސްފިއާ ރިޒާވްގައި ބޮޑު ފަޅަކާއެކު އޮންނަ ހިތްގައިމު ރަށުގައި ހެދި ރިސޯޓުގައި އެއްގަމު ކޮޓަރި އަދި މޫދު ކޮޓަރީގެ އިތުރުން ހަތަރު ރެސްޓޯރަންޓާއި ދެ ބާ ހިމެނެ އެވެ. އޭގެ އިތުރުން އާއްމުކޮށް ބޭނުންކުރެވޭ ބޮޑު ޕޫލަކާއި ކުޑަކުދިންގެ ޕޫލެއް އަދި ބައެއް ކޮޓަރިތަކުގައި ވެސް ޕްރައިވެޓް ޕޫލް ހިމަނާފައިވެ އެވެ. އަދި އެ ރަށުގައި ސްޕާގެ ޚިދުމަތާއި ޑައިވިން އާއި ވޯޓާ ސްޕޯޓްސްގެ ވެސް ހަރަކާތްތައް ވެސް އޮވެ އެވެ.

ވެލާނާ އިންޓަނޭޝަނަލް އެއާޕޯޓުން ސީ ޕްލޭންގައި 25 މިނިޓުން ދެވޭ ހިސާބުގައި އޮންނަ ރިސޯޓަކީ އާއިލާ އާއި އަދި ރަހުމަތްތެރިންނާއެކު އުފާވެރި ވަގުތަކެއް ހޭދަކުރެވޭ ގޮތަށް އިންތިޒާމްތައް ހަމަޖެހިފައިވާ ރިސޯޓެކެވެ. އެ ރިސޯޓު ހުޅުވުމާ ދިމާކޮށް ޚާއްސަ އަގުތަކެއް ވެސް ތައާރަފް ކޮށްފަ އެވެ. އެގޮތުން ހަތަރު ރޭ ވަންދެން މި ރިސޯޓުގައި މަޑުކުރަން ބޭނުންވާ މީހުންނަށް 30 ޕަސެންޓްގެ ޑިސްކައުންޓްގެ އިތުރުން ހެނދުނުގެ ނާސްތާ ލިބެ އެވެ.

އެ ރިސޯޓުގައި މިދުވަސްވަރު ހަތަރު ރެއަށް ކޮޓަރިއެއް ވިއްކާ އަގު އުޅެނީ 1،000 ޑޮލަރުން ފެށިގެން މަތިންނެވެ.

ޓޫރިޒަމް ވަރަށް ބޮޑަށް ފުޅާވެފައިވާ ބ. އަތޮޅުގައި މިހާރު ވެސް 13 ރިސޯޓު ހިންގަ އެވެ. އެ އަތޮޅުގައި މިހާރު ވެސް ގިނަ އަދަދެއްގެ ރިސޯޓު އަންނަނީ ތަރައްގީ ކުރަމުންނެވެ.