ފޯނުތަކުގެ "ކްލިޕްބޯޑް ޑާޓާ" ޗައިނާއަކަށް ނުފޮނުވަން: ވަންޕްލަސް

ވަންޕްލަސް ފޯނުތައް ބޭނުންކުރާ މީހުން، ފޯނުގެ ކްލިޕްބޯޑަށް ކޮޕީކުރާ ޑާޓާ، ޗައިނާގެ ސާވާއަކަށް ފޮނުވާ ކަމަށް ބުނެ އިންޓަނެޓް ފޯރަމްތަކުގައި ދައްކާ ވާހަކަތަކަށް، ވަންޕްލަސް ޖަވާބުދީފި އެވެ. އެކަން ހިނގަން މެދުވެރިވި ސަބަބު، ވަންޕްލަސްއިން ވަނީ ވަރަށް ރަނގަޅަށް އޮޅުންފިލުވައިދީފަ އެވެ.

ވަންޕްލަސް ފޯނުތައް ބޭނުންކުރާ މީހުންނާ ގުޅުން ހުރި ފަރުދީ މައުލޫމާތު، ޖާސޫސީ ސާވާތަކަށް ފޮނުވާ ކަމަށް ދެކެވުނު ވާހަކަތައް ނަފީކުރަމުން ވަންޕްލަސް އިން ބުނީ، އެ އުޅެނީ ވަރަށް ބޮޑު އޮޅުމެއް އަރައިގެން ކަމަށެވެ. އެ ގޮތުގައި ހެކި ދައްކަމުން "ބޭޑްވޯޑްސް ޑޮޓް ޓީއެކްސްޓީ" ނަމަކަށް ކިޔާ ފައިލަކަށް އިޝާރާތްކޮށްފައި ވެ އެވެ.

ވަންޕްލަސް ފޯނުތައް ނެރެނީ މައިގަނޑު ދެ މާކެޓަކަށެވެ. އެއީ "ގްލޯބަލް" އަދި "ޗައިނާ" އެވެ. ވަންޕްލަސް ގްލޯބަލް ފޯނުތައް ހިންގާ އޮޕަރޭޓިން ސިސްޓަމަށް ކިޔަނީ "އޮކްސިޖަންއޯއެސް" އެވެ. ޗައިނާ ފޯނުތައް ހިންގަން ބޭނުންކުރަނީ "ހައިޑްރޮޖަންއޯއެސް" އެވެ. މި ދެ އޮޕަރޭޓިން ސިސްޓަމްގެ ބިންގަލަކީ އެންޑްރޮއިޑް އެވެ.

ގްލޯބަލް އަދި ޗައިނާ މާކެޓަށް ޚާއްސަ ފޯނުތަކުގައި "ބޭޑްވޯޑްސް ޑޮޓް ޓީއެކްސްޓީ" ފައިލް ހިމެނި ނަމަވެސް، ވަންޕްލަސް ބުނީ، ގްލޯބަލް ފޯނުތަކުގައި އެ ފައިލް ހަރަކާތްތެރި ނުވާނެ ކަމަށެވެ. އެ ފޯނުތަކުގައި އެ ފައިލް މަަސައްކަތްނުކުރާނެ ކަމަށާއި ޗައިނާ ފޯނުތަކުގައި އެ ފައިލް ހަރަކާތްތެރިވާނެ ކަމަށެވެ. ނަމަވެސް ޗައިނާގައި އެއްވެސް ބަޔަކު ޖާސޫސްކުރާ ސާވާއަކަށް އެ ފައިލް ނުފޮނުވާ ކަމަށް ވަނީ ބުނެފަ އެވެ.

ހައިޑްރޮޖަންއޯއެސްގައި އެ ފައި ހިމަނާފައި ވަނީ، މަޝްހޫރު "ވީޗެޓް" އެޕްލިކޭޝަނާ ހެދި ކަމަށް ވަންޕްލަސް އިން ބުނެ އެވެ. އެއީ ވީޗެޓް ސާވާތަކުން ވާދަވެރިންނަށް ފުރުސަތު ނުދޭތީ އެވެ. ވާދަވެރިންނަށް މަގުފަހިވާ ގޮތަށް ހުންނަ ލިންކްތައް، ވީޗެޓުން ބްލޮކްކުރިއަނުދިނުމަަށެވެ. ނަމަވެސް އިންޓަނެޓް ފޯރަމްތަކުގައި ދައްކާފައި ހުރި ވާހަތަކާ ހެދި ވަންޕްލަސް ފޯނުތައް ދެކެ މީހުން ބިރުގަނެ، ޖެހިލުންވެފައިވާ ކަމަށް ވެސް، ވަންޕްލަސް އިން ފާހަގަކުރެ އެވެ.

ޗައިނާ ފޯނުތަކަށް އެމެރިކާގައި ވިޔަފާރި ފުރުސަތު ހަނިވަމުން ދާއިރު، އެ ކަމަށް ހިތްވަރުދެވޭ ގޮތަށް، ތާކުންތާކު ނުޖެހޭ ވާހަކަދެއްކުމުން ވިޔަފާރި ހީނަރުވާނެކަން އެ ކުންފުނިން ފާހަގަކުރެ އެވެ. ވަންޕްލަސް އަބަދު ވެސް ބުނަނީ ބޭނުންކުރާ މީހުންނަށް ހަމަނުޖެހެވެނީސް، އެ މީހުންނަށް ހަމަޖެހެވެން ނެތް ކަމަށެވެ.