އޮސްޓްރޭލިއާގެ ސްކޮލަޝިޕަށް ހުޅުވާލައިފި

އޮސްޓްރޭލިއާ ސަރުކާރުން ރާއްޖެ އަށް ދޭ ސްކޮލަޝިޕަށް ކުރިމަތިލުމުގެ ފުރުސަތު މިއަދު ހުޅުވާލައިފި އެެވެ.

މި ސްކޮލަޝިޕަށް ކުރިމަތިލުމުގެ ފުުރުސަތު މިއަދުން ފެށިގެން އަންނަ އޭޕްރީލް މަހުގެ ނިޔަލަށް ވަނީ ހުޅުވާލައިފަ އެވެ. މި ފުރުސަތު ލިބޭ ދަރިވަރުން ކިޔަވަން ފަށާނީ އަންނަ އަހަރުގެ ޖެނުއަރީ މަހު އެވެ.

ބޭރު ގައުމަކުން މިހާތަނަށް އެންމެ ގިނަ ދުވަސް ވަންދެން ރާއްޖެ އަށް ދެމުން އަންނަ މަތީ ތައުލީމުގެ މި ފުރުސަތު އޮސްޓްރޭލިއާ އިން ދެނީ ތައުލީމް، ގުޑް ގަވަނެންސް، އިކޮނޮމިކް ޑިވެލޮޕްމެންޓް އަދި އެންވަޔަރްމެންޓް މެނޭޖްމެންޓުގެ ދާއިރާއިންނެވެ.

ކުރިން ހަމަޖައްސާފައި އޮންނަ ގޮތުން، އޮސްޓްރޭލިއާގެ ސްކޮލަޝިޕްގައި ކިޔެވޭނީ މައިގަނޑު ހަތަރު ދާއިރާ އިން ކުރެ ކޮންމެ ދާއިރާއަކުން ވެސް ކަނޑައަޅާ ވަކި ކޯސްތަކެކެވެ. ނަމަވެސް މި އަހަރުން ފެށިގެން، މައިގަނޑު ހަތަރު ދާއިރާގެ ތެރެއަށް ފެތޭނަމަ އެ ދަރިވަރު ބޭނުން މާސްޓާސް ފެންވަރުގެ ކޮންމެ ކޯހެއް ވެސް ކިޔެވޭނެ އެވެ.

އޮސްޓްރޭލިއާގެ ސްކޮލަޝިޕާ ގުޅޭ މައުލޫމާތު ދިނުމަށް ސެޝަންތަކެއް ބާއްވާނެ އެވެ. އެ ސެޝަނަށް ވެސް ދަރިވަރުން ރަޖިސްޓަރީ ވާން ޖެހޭނެ އެެވެ. އަދި ރަށްރަށުގައި ދިިރިއުޅޭ މީހުން އޮންލައިންކޮށް، ސްކައިޕް މެދުވެރިކޮށް ސެޝަނުގައި ބައިވެރިވެވޭނެ އެވެ.

އޮސްޓްރޭލިޔާ އެވޯޑްސް އަށް ކުރިމަތިލުމާ ބެހޭ ހުރިހާ މައުލޫމާތެއް އޮސްޓްރޭލިއާ އެވޯޑްސް މޯލްޑިވްސްގެ ވެބްސައިޓް www.australiaawardsmaldives.org އިން ލިބޭނެ ކަމަށް އެތަނުން ބުނެ އެވެ.

އޮސްޓްރޭލިއާ އިން ރާއްޖެ އަށް ސްކޮލަޝިޕް ދެމުން އަންނަތާ މިހާރު 54 އަހަރު ވެއްޖެ އެވެ. އެ ފުރުސަތުގެ ދަށުން މިހާތަނަށް 600 އަށް ވުރެ ގިނަ ދިވެހިން ވަނީ މަތީ ތައުލީމް ހާސިލްކޮށްފަ އެވެ.

އެ ގައުމުން މި އަހަރު ވެސް ދިވެހި 10 ދަރިވަރަކަށް ސްކޮލަޝިޕް ދީފައި ވެ އެވެ.