"ހައްޔަރުކުރާކަށް ނޫޅޭ، އިސްތިއުފާ ދޭކަށް ވެސް ހުށަހެއް ނާޅާ"

އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރު ކުރަން އަދި އިސްތިއުފާ ދެއްވަން ވެސް ސަރުކާރުން ހުށަނާޅާ ކަމަށް އެ ދެ ބޭފުޅުންގެ ފަރާތްޕުން ވާހަކަ ދެއްކެވި ބޭފުޅަކު މިރޭ ވިދާޅުވެއްޖެ އެވެ.

އަބްދުﷲ ސައީދާއި އަލީ ހަމީދުގެ ފަރާތްޕުޅުން ވާހަކަ ދެއްކެވި ފަރާތުން އެހެން ވިދާޅުވިއިރު، އުއްތަމަ ފަނޑިޔާރު ހައްޔަރުކުރަން އުޅޭ ކަމަށް ބުނެ ގިނަ ބަޔަކު މިރޭ ވަނީ އެމަނިކުފާނުގެ ގެކޮޅު ކައިރިއަށް އެއްވެފަ އެވެ. އެކަމަކު ފުލުހުން ބުނީ، އުއްތަމަ ފަނޑިޔާރު ދިރިއުޅުއްވާ ގެކޮޅަށް ފުލުހުން ވަދެ އެމަނިކުފާނު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ބުނެ މީޑިއާގައި ހިއްސާ ކުރަމުން ދަނީ ދޮގު މައުލޫމާތެއް ކަމަށެވެ.

އަބްދުﷲ ސައީދާއި އަލީ ހަމީދުގެ ފަރާތްޕުޅުން ވާހަކަ ދެއްކެވި ފަރާތުން ވިދާޅުވީ އެ ދެ ބޭފުޅުން ވެސް ތިއްބެވީ ހެޔޮ ހާލުކޮޅުގައި ކަމަށެވެ.

"އެ ދެ ބޭފުޅުން ވިދާޅުވީ ހައްޔަރުކުރާކަށް ވެސް ނޫޅޭ ކަމަށް. އިސްތިއުފާ ދެއްވުމަށް ވެސް ހުށަހެއް ނާޅައޭ،" އޭނާ ވިދާޅުވި އެވެ.

މި ކަމާ ގުޅޭ ގޮތުން، އުއްތަމަ ފަނޑިޔާރާއި ފަނޑިޔާރު އަލީ ހަމީދުގެ ސީދާ ބަހެއް ލިބޭ ގޮތެއް ނުވި އެވެ.