ލަންކާގެ ސެންޓްރަލް ބޭންކުގެ ކުރީގެ ގަވަރްނަރު ޕޮލިހަށް ހާޒިރު ކުރަނީ

ކޮލަމްބޯ (ފެބްރުއަރީ 18) - ސްރީ ލަންކާގެ ސެންޓްރަލް ބޭނުންކުން ބޮންޑު ވިއްކުމުގައި ހިންގާފައިވާ ކޮރަޕްޝަނުގެ ތަހުގީގަށް އެ ބޭންކުގެ ކުރީގެ ގަވަރްނަރު އަރްޖުނާ މަހެންދުރަ އަންނަ މަހު 8 ގެ ކުރިން ޕޮލިހަށް ހާޒިރުވުމަށް ކޯޓުން އަނެއްކާ ވެސް އަންގައިފި އެވެ.

މަހެންދުރަންގެ މައްޗަށް ފޯޓް މެޖިސްޓްރޭޓް ކޯޓުން ދެ ވަނަ އަމުރު ނެރެފައި ވަނީ މި މަހު 15 ގެ ކުރިން އޭނާ ފުލުހަށް ހާޒިރުވުމަށް ކޯޓުން އެންގި އެންގުމަށް ތަބާވެފައި ނުވާތީ އެވެ. ކޯޓުން ފުރަތަމަ އެންގީ އިންޓަޕޯލް މެދުވެރިކޮށް މަހެންދުރަންގެ ގެއަށް އަމުރު ފޮނުވުމަށެވެ. ނަމަވެސް އެ އަމުރު އިންޓަޕޯލުން މަހެންދުރަންގެ ގެއަށް ހަވާލުކޮށްފައެއް ނުވެ އެވެ. ކޯޓުން މި ފަހަރު އަންގާފައި ވަނީ ޕޮލިހުންގެ ސީއައިޑީ އިން އެކްސްޕްރެސް މެއިން ނުވަތަ ޑީއެޗްއެލް މެދުވެރިކޮށް ސިންގަޕޫރުގައި ހުންނަ މަހެންދުރަންގެ ގެއަށް ނޯޓިސް ފޮނުވުމަށެވެ.

މަހެންދުރަން އަކީ ސްރީ ލަންކާ ރައްޔިތެއް ނަމަވެސް އޭނާ ދިރިއުޅެނީ ސިންގަޕޫރުގަ އެވެ.

ކޮލަމްބޯ ފޯޓް މެޖިސްޓްރޭޓް ކޯޓަށް ހުށަހަޅާފައިވާ ލިޔުންތަކުން އެނގޭ ގޮތުގައި މަހެންދުރަންގެ އިތުރުން އޭނާގެ ދަނބިދަރި ޕާޕަޗުއަލް ޓްރެޝަރީ ލިމިޓެޑުގެ ޑިރެކްޓަރު އަރްޖުން އަލޮއިސިއަސް އާއި އެ ކުންފުނީގެ ސީއީއޯ ކަސުން ޕަލިސެނާ ވަނީ ބޭންކުގެ ބޮންޑުގެ ކޮރަޕްޝަނުގައި ބައިވެރިވެފަ އެވެ.

ބޮންޑު ވިއްކި މައްސަލައިގެ ޚިޔާނާތް ތަހުގީގު ކުރަން ރައީސް މައިތުރިޕާލާ ސިރިސޭނާ އުފެއްދެވި ރިޔާސީ ކޮމިޝަނުގެ ރިޕޯޓުގައިވާ ގޮތުން ބޮންޑުގެ ޚިޔާނާތުން ސަރުކާރަސް ވަނީ 8.52 ބިލިއަން ރުޕީސްގެ ގެއްލުންވެފަ އެވެ. ކޮމިޝަނުގެ 1،154 ސަފްހާގެ ރިޕޯޓުގައިވާ ގޮތުން ބޮންޑުގެ ޚިޔާނާތުން ސަރުކާރަށް ލިބުނު ގެއްލުން މަހެންދުރަން އާއި އޭނާގެ އަނބިދަރީގެ އަތުން ހޯދުމަށް ވެސް ލަފާދީފައިވެ އެވެ.

ސެންޓްރަލް ބޭންކުގެ ގަވަރުނަރުގެ މަގާމަށް މަހެންދުރަން 2015 ވަނަ އަހަރު ހަމަޖެއްސީ ބޮޑު ވަޒީރު ރަނިލް ވިކްރަމަސިންހަ އެވެ. ބޮންޑުގެ ޚިޔާނާތާ ގުޅިގެން ރަނިލް އާއި ސިރިސޭނާގެ ކޯލީޝަނުގެ ގުޅުން ވެސް ވަނީ ގޯސްވެފަ އެވެ. އަދި އިގްތިސާދީ ހުރިހާ ކަމެއް ބެލެހެއްޓުން ރަނިލްގެ އަތްޕުޅުން ނަންގަވާ ސިރިސޭނާ ވަނީ ދާދި ފަހުން ހަވާލުވެވަޑައިގެންފަ އެވެ.