ދައުވާ އުފުލީ ފްލޯކް ވާހަކަތަކެއްގެ މައްޗަށް ބިނާކޮށް: އަލީ ހަމީދު

އޭނާއާ ދެކޮޅަށް ދައުލަތުން އުފުލާފައިވާ ދައުވާ އަކީ ފްލޯކް ވާހަކަތަކެއްގެ މައްޗަށާއި ހިޔާލީ ވާހަކަތަކެއްގެ މައްޗަށް ބިނާކޮށް އުފުލި ދައުވާއެއް ކަމަށް ސުޕްރީމް ކޯޓުގެ ފަނޑިޔާރު އަލީ ހަމީދު މިރޭ ވިދާޅުވެއްޖެ އެވެ.

މިދިޔަ ފެބްރުއަރީ މަހުގެ ފަސް ވަނަ ދުވަހުގެ ރޭ ރައީސް އަބްދުﷲ ޔާމީން އިއުލާން ކުރެއްވި ކުއްލި ނުރައްކަލުގެ ހާލަތުގައި ހައްޔަރުކޮށް، ދައުވާ އުފުލާފައިވާ އަލީ ހަމީދު އެގޮތަށް ވިދާޅުވީ އޭނާގެ މައްޗަށް ކުރާ އަދުލު އިންސާފު ގާއިމް ކުރަން ހުރަސް އެޅުމުގެ ދައުވާގެ މިއަދުގެ އަޑުއެހުމުގަ އެވެ.

އެ މައްސަލާގައި ފަނޑިޔާރު އަލީ ހަމީދުގެ އިތުރުން ކުރީގެ ރައީސް މައުމޫން އަބްދުލްގައްޔޫމާއި އުއްތަމަ ފަނޑިޔާރު އަބްދުﷲ ސައީދަށް ވެސް ދައުވާ ކުރެ އެވެ.

އެ ތިން ބޭފުޅުންނަށް އެ ދައުވާ ކުރަނީ ރައްޔިތުންގެ މަޖިލީހުގެ މެމްބަރުންތަކަކަށާއި ބައެއް ފަނޑިޔާރުންނަށް ރިޝްވަތު ދީގެން ވަކި ގޮތަކަށް ހުކުމްތައް ކުރުވަން މަސައްކަތް ކުރި މައްސަލައާ ގުޅިގެން އެ ބޭފުޅުން ހައްޔަރުކޮށް، އެ ބޭފުޅުންގެ ފޯނު ދޭން ފުލުހުން އެންގުމުން އެކަން ނުކުރެއްވި ކަމަށް ބުނެ އެވެ.

މިއަދުގެ އަޑުއެހުމުގައި، ދައުވާ ސާފުވޭތޯ ގާޒީ އާދަމް އާރިފް ސުވާލު ކުރެއްވުމުން ޖަވާބުގައި އަލީ ހަމީދު ވިދާޅުވީ ދައުލަތުން ހުށަހެޅި ދައުވާ ސާފު ނުވާ ކަމަށެވެ.

ޖިނާއީ ކުށެއް ނަމަ، މައްސަލަ ސާބިތު ކުރަން ވަކި ހެކިތަކެއް ހުށަހަޅަން ޖެހޭނެ ކަމަށް އަލީ ހަމީދު ވިދާޅުވި އެވެ. އަދި ދައުވާ ކުރަނީ ހެކިތަކެއް ހުރެދާނެ ކަމަށް ބަލާފައި ކަމަށް ވެސް އޭނާ ވިދާޅުވި އެވެ.

އެހެންވެ، މިއީ ގާނޫނުތަކުގެ ތެރެއިންނާއި އިސްލާމީ އުސޫލުތަކުގެ ތެރެއަށް ޝަރުތު ހަމަވާ ދައުވާއެއް ނޫން ކަމަށް ވިދާޅުވެ، އަލީ ހަމީދު ވަނީ ދައުވާ އަށް އިންކާރު ކުރައްވައިފަ އެވެ.

"މިއީ ފްލޯކު ވާހަކަތަކެއްގެ މައްޗަށް، ހިޔާލީ ވާހަކަތަކެއްގެ މައްޗަށް ބިނާކޮށް ހުށަހެޅި ދައުވާއެއް،" ހުދު ކުލައިގެ ގަމީހެއް ތުރު ކުރައްވައިގެން، ކޮޅަށް ތެދުވެވަޑައިގެން ހުންނަވައި އަލީ ހަމީދު ވިދާޅުވި އެވެ.

އޭނާ ޖަވާބުދާރީވެވަޑައިގަތުމަށް ގާޒީ ފުރުސަތު ދެއްވިއިރު، އިށީނދެވަޑައިގެން ވާހަކަފުޅު ދެއްކެވިޔަސް، މައްސަލައެއް ނެތް ކަމަށް ގާޒީ ވިދާޅުވި އެވެ. ނަމަވެސް، އަލީ ހަމީދު ވިދާޅުވި ގޮތުގައި އޭނާ މަސައްކަތް ކުރައްވާނީ ކޮޅަށް ތެދުވެވަޑައިގެން ހުންނަވައި މައްސަލަ އަށް ވާހަކަފުޅު ދެއްކެވުމަށެވެ.

އަލީ ހަމީދުގެ ވަކީލު މަހްފޫޒު ސައީދު ވަނީ އަލީ ހަމީދާ ދެކޮޅަށް ކުރާ ދައުވާއާ ގުޅިގެން ދައުލަތުގެ ވަކީލުންނާ ގިނަ ސުވާލުތަކެއް ކުރިމަތި ކުރައްވައިފަ އެވެ. އެގޮތުން ގާނޫނުލްއުގޫބާތުގެ 530 ވަނަ މާއްދާގެ (ހ) ގެ ދަށުން ދައުވާ ކުރާއިރު، ދައުވާ ކުރާ މަގްސަދު ސާފުކޮށް ދެއްވުމަށް އޭނާ އެދިވަޑައިގަތެވެ.

އެ އަށް ޖަވާބު ދެއްވައި ދައުލަތުގެ ވަކީލު ވިދާޅުވީ އަލީ ހަމީދުގެ މައްޗަށް ދައުވާ ކުރަނީ މީހެއްގެ މައްޗަށް ދައުވާ އުފުލުމަށް ހުރަސް އެޅުމުގެ މަގްސަދު އޮތީމާ ކަމަށެވެ. އަދި މި މައްސަލައިގައި އަލީ ހަމީދު ހެކި ނައްތާލަން އުޅުއްވި ކަމަށް ތުހުމަތު ކުރެވޭ ކަމަށް ވެސް އޭނާ ވިދާޅުވި އެވެ.

ނަމަވެސް މަހްފޫޒު ވިދާޅުވީ އަލީ ހަމީދު ކުރެއްވި އަމަލީ ކޮބައިކަމާއި ކުށް ކުރި ތަނާއި ވަގުތަކީ ކޮބައިކަން ދައުލަތުން ސާފު ކޮށްދޭން ޖެހޭ ކަމަށެވެ.

ދައުލަތުގެ ވަކީލް ވިދާޅުވީ، ފެބްރުއަރީ ފަސް ވަނަ ދުވަހުގެ ރޭ އަލީ ހަމީދު ސުޕްރީމް ކޯޓުގައި ހުންނަވަނިކޮށް، ފޯނު ދެއްވަން އެންގުމުން، ފޯނު ދެއްވުމަށް އިންކާރު ކުރައްވާފައި ވާތީ ކުރި ދައުވާއެއް ކަމަށެވެ. އަދި މިކަމުގައި ފޯނުން ކުރި މުއާމަލާތްތައް ހެއްކަކަށް ފުދޭ ކަމަށް ދައުލަތުގެ ވަކީލް ވިދާޅުވި އެވެ.

އެންމެ ފަހުން، މަހްފޫޒު ވަނީ ދައުވާ ސާފުވެފައިވާ ކަމަށް ވިދާޅުވެފަ އެވެ.

މީގެ އިތުރުން، އަލީ ހަމީދު ވިދާޅުވީ ދައުލަތުން ކުރި ދައުވާ އަކީ ޝަރުތުތައް ފުރިހަމަ ނުވާ އެއްވެސް އަސާސެއް ނެތް ދައުވާއެއް ކަމަށެވެ. މިއީ މުތުލަގަށް "ދޮގު ދައުވާއެއް" ކަމަށް އޭނާ ވިދާޅުވި އެވެ.

ނަމަވެސް ގާޒީ ވަނީ މި މައްސަލަ ބެލޭނެ ކަމަށް މަދަނީ މިންގަނޑުން ކަނޑައަޅުއްވައިފަ އެވެ. އެ އަށް ފަހު، ދައުލަތުންނާއި ދިފާއީ ވަކީލުން ހުށަހަޅަން ޖެހޭ ހުށަހެޅުންތައް ކިހާ ދުވަހަކުން ހުށަހެޅޭނެތޯ ކޮންމެ ބޭފުޅަކާ ވަކިވަކިން ގާޒީ ސުވާލުކުރެއްވި އެވެ.

އެކަމާ ގުޅިގެން އަލީ ހަމީދާއި މައުމޫންގެ ވަކީލުން ވިދާޅުވީ ޝަރީއަތުގެ ކުރިން ހުށަހެޅުންތައް ހުށަހަޅަން ދެ ހަފުތާ ދެއްވުމަށެވެ. ދައުލަތުގެ ވަކީލުން ވިދާޅުވީ ހުށަހެޅުންތައް އަންނަ ހަފުތާގައި ހުށަހަޅުއްވާނެ ކަމަށެވެ. ނަމަވެސް ގާޒީ ނިންމެވީ އަންނަ ހޯމަ ދުވަހުގެ ނިޔަލަށް ހުށަހެޅުންތައް ހުށަހެޅުމަށެވެ.

މި މައްސަލައިގައި އަޑުއެހުމެއް އަންނަ މެއި މަހުގެ 8 ގައި ބާއްވާނެ ކަން ގާޒީ އިއުލާން ކުރެއްވި އެވެ.