ދަރިވަރުންތަކެއް މާރާމާރީ ހިންގުމުން ފުނަދޫ ސްކޫލުގެ ޓީޗަރަކު އެނބުރި ގައުމަށް

ށ. ފުނަދޫ ސްކޫލުގެ ބިދޭސީ ޓީޗަރަކަށް އެ ސްކޫލްގެ ދަރިވަރުންތަކެއް އިއްޔެ ބިރުދައްކައި މާރާމާރީ ހިންގުމުން އޭނާ އެނބުރި ގައުމަށް ދާން ނިންމައިފި އެވެ.

ބީޓެކް ކިޔަވައިދޭން އެޑިއުކޭޝަނުން ފޮނުވި އިންޑިއާގެ ފިރިހެން ޓީޗަރަށް ދަރިވަރުންތަކެއް ހަމަލާދިނީ، އެސައިންމެންޓެއްގެ މައްސަލައިގައި ކަމަށް ވެ އެވެ.

މައުލޫމާތު އެނގޭ ބޭފުޅަކު "މިހާރު" އަށް ވިދާޅުވީ އެ ޓީޗަރަށް ފޮތުންނާއި ގޮނޑިން ދަރިވަރުން ހަމަލާދީފައިވާ ކަމަށެވެ. އަދި ކަޓަރުން ވެސް ބިރުދައްކާފައިވާއިރު ދަރިވަރުން އެދުނީ، އެސެއިންމެންޓުގެ މާކްސް މަތިކޮށްދޭން ކަމަށް ވެސް އޭނާ ވިދާޅުވި އެވެ.

ދަރިވަރުންގެ ފަރާތުން ކުރިމަތިވި މި ކަންކަމާ ގުޅިގެން އޭނާ އަމިއްލަ އަށް ވަޒީފާ އިން ވަކިވެ، އެނބުރި ގައުމަށް ފުރާގޮތަށް ހަމަޖައްސާފައި ވަނީ މިރެ އެވެ. ރާއްޖޭގައި އޭނާ ކިޔަވައިދޭތާ ގާތްގަނޑަކަށް ތިން އަހަރު ވެއްޖެ އެވެ.

"އެސައިންމަންޓް ހުށަހަޅަން ބުނީމަ [ދަރިވަރު] މި ބުނަނީ ނުކުރާނަމޭ އެކަމެއް. ދެން ގައުމަށް ފޮނުވާލާނަމޭ ކިޔާފައި ޓީޗަރާ ދިމާލަށް ގޮނޑިއެއް އެއްލައިލީ. ދެން ޕާސްޓްޕޭޕަރެއް ވެސް ޓީޗަރާ ދިމާލަށް އެއްލައިލި. އޭގެ ފަހުން ސްކޫލުގެ އިސްވެރިން ކްލާހަށް ދިޔައީ. އެކަމަކު އެއްވެސް ފިޔަވަޅެއް ނާޅާ،" "މިހާރު" އަށް ވާހަކަ ދެއްކެވި ބޭފުޅާ ވިދާޅުވި އެވެ.

ފުނަދޫން ވާހަކަ ދެއްކި އެހެން މީހަކު ބުނިގޮތުގައި، ބީޓެކްގެ އެ ކްލާހަށް ދާ ހުރިހާ ޓީޗަރުންނަށް ވެސް ދަރިވަރުން ފުރައްސާރަކޮށް، ޖެއްސުން ކުރެ އެވެ. މީގެއިތުރުން، ޓީޗަރުންނަށް ޖޯކު ޖަހައި ކާޓޫނު ކުރަހާފައި ހުންނަ ކަމަށް ވެސް އޭނާ ބުންޏެވެ.

"ކްލާހުގެ ދޮރުފަތްތަކުގެ ތަންޑުތައް ވެސް ނައްޓުވާފައި ހުންނަނީ. ސްކޫލުގައި އަލިފާން ނިއްވާ ސިސްޓަމް އެޑިއުކޭޝަނުން ހަރުކުރިތާ މަހެއް ވެސް ނުވަނީސް ކްލާސްތެރެ އަށް ޖަހާޖަހާ، އެ ހުރިހާ ފުޅިތަކެއް ވެސް ހުސްކޮށްފި. ދަރިވަރުންނަށް އެއްވެސް ރައްކާތެރިކަމެއް ނެތް،" މި މައްސަލައިގައި ކަންބޮޑުވުންފާޅުކޮށް ވާހަކަ ދެއްކި މީހާ ބުންޏެވެ.

މި މައްސަލައިގައި އެޑިއުކޭޝަނުން އަދި ވަކި އެއްޗެއް ނުބުނެ އެވެ.

ދަރިވަރަކާ މާރާމާރި ހިންގި ކަމަށް ބުނެ މަޖީދިއްޔާ ސްކޫލުގެ ބިދޭސީ ޓީޗަރަކު މިދިޔަ ހޯމަ ދުވަހު ވަނީ ސަސްޕެންޑްކޮށްފަ އެވެ. އޭގެ ފަހުން ގުރޫޕަކުން ބިރު ދައްކާތީ އެ ޓީޗަރު ވަނީ މިިދިޔަ އަންގާރަ ދުވަހު ރާއްޖެ ދޫކޮށް ފުރައިފަ އެވެ.