މަސައްކަތްތެރިންނަށް ހައްގު އުޖޫރަ ލިބިގެން ނޫނީ ކުރިއަރައިގެން ނުދާނެ: ސައީދު

މަސައްކަތްތެރިންނަށް ހައްގު އުޖޫރަ ލިބިގެން ނޫނީ ގައުމެއްގެ އިގުތިސާދު ކުރިއަރައިގެން ނުދާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިރޭ ވިދާޅުވެއްޖެ އެވެ.

މިއަދު ފާހަގަކުރަމުން އަންނަ މި އަހަރުގެ ބައިނަލްއަގްވާމީ މަސައްކަތްތެރިންގެ ދުވަހާ ބެހޭ ގޮތުން، ޕީޕީއެމްގެ "ރުމާލު 2" ޖަގަހައިގަ ވާހަކަ ދައްކަވަމުން މިނިސްޓަރު ސައީދު ވިދާޅުވީ، ރައީސް އަބްދުﷲ ޔާމީން ވެރިކަމަށް ވަޑައިގެންނެވީ މަސައްކަތްތެރިންގެ ތަސައްވުރަކާ އެކު ކަމަށެވެ. އަދި ރައީސް ޔާމީން ވެރިކަމަށް ވަޑައިގެންނެވި ފަހުން މިހާތަނަށް 9،000 ޑޮލަރު މީހެއްގެ ބޮލަކަށް ޖެހޭ ކަމަށް ވެސް ސައީދު ވިދާޅުވި އެވެ.

"މިއަދު އަޅުގަނޑު ވެސް އަޖައިބުވި އަޅުގަނޑުމެންގެ ބައިނަލްއަގްވާމީ ވައިގެ ބަނދަރުގެ ބައެއް ވަސީލްތައްތައް ފެނިފައި. ހަމަ ހަގީގަތުގައި އަޅުގަނޑު އަޖައިބުވި. އަޅުގަނޑު ހިތަށް އެރި މި އޮތް ތިރި ޖަޒީރާ ރަށުގައި އެޅޭ ރަންވޭ އަކާއި މިހިރަ އިމާރާތް ކުރެވޭ ތަންތަނުގެ ފުރިހަމަކަން،" ރާއްޖޭގެ ތަރައްގީ އަށް އިޝާރާތް ކުރައްވަމުން މިނިސްޓަރު ވިދާޅުވި އެވެ.

ސައީދު ވިދާޅުވި ގޮތުގައި، މިއަދު ފެންނަނީ މުއްސަނދިކަމަކާ ދިމާލަށް ރާއްޖެ ދަތުރުކުރާ މަންޒަރެވެ.

"މިއަދު ފަޅުތަކާއި ގިރިތަކާއި ރަށްތަކާއި ޖަޒީރާތައް ވެއްޖެ އަޅުގަނޑުމެންގެ ތެޔޮވަޅުތަކަށް. މީގެ ކުރިން ވެސް ހުއްޓޭ މިތަކެތި،" ކުރީގެ ސަރުކާރުތަކުން ތަރައްގީ އަށް އިސްކަން ނުދޭކަން ފާހަގަކުރައްވަމުން މިނިސްޓަރު ވިދާޅުވި އެވެ.

ސައީދު ވިދާޅުވީ މިއަދު އަޅުގަނޑުމެންގެ އިންސާނީ ކަރާމާތް އެތައް ގުނައަކަށް އުފުލިގެން މިދަނީ ވަޒީފާގެ ބާޒާރަށް އައިސްފައިވާ ތިޔާގިކަމާ ގުޅިގެން ކަމަށެވެ.

"އެ އަށް ވުރެ ބޮޑު ހައްގަކީ ކޮބައިތޯ؟ ވަޒީފާގެ ބާޒާރަށް ލިބޭނެ އެންމެ ބޮޑު ހައްގަކީ އެންމެ ބޮޑު ކުރިއެރުމަކީ ވަޒީފާގެ ބާޒާރުން ފުރުސަތު ލިބުން. ގައުމުގައި ތިބެގެން މަސައްކަތް ކުރެވޭނެ އިންތިޒާމްތައް ފަހިވެގެން ދިއުން،" މިނިސްޓަރު ވިދާޅުވި އެވެ.

ސައީދު ވިދާޅުވީ މީގެ ކުރިން 20-30 ރިސޯޓު ނުހެދި ހުރި ކަމަށެވެ. އެ ތަންތަން ނުހެދި ހުރި ސަބަބާ ބެހޭ ގޮތުން މިނިސްޓަރު ވިދާޅުވީ އެއީ ރާއްޖެ އަށް އިތުބާރުކުރާ ބޭންކެއް ނެތުމާއި ލޯނު ދޭނެ ރަނގަޅު ކްރެޑިޓް ސިސްޓެއް ނެތުން އަދި ރާއްޖެއާ މެދު އެއްވެސް ޔަގީން ކަމެއް ނެތުމުން ކަމަށެވެ.