ރާއްޖެ އަށް ތާއީދު އެބައޮތް، ސެކިއުރިޓީ ކައުންސިލްގެ ގޮނޑި ކާމިޔާބު ކުރެވޭނެ: ޝައިނީ

ގައުމުތަކުގެ ތާއީދާ އެކު އދ.ގެ ސަލާމަތީ މަޖިލީހުގެ ގޮނޑި ރާއްޖެ އަށް ކާމިޔާ ކުރެވޭނެ ކަމުގެ ޔަގީން ކަން އޮތް ކަމަށް ފިޝަރީޒް މިނިސްޓަރު ޑރ. މުހައްމަދު ޝައިނީ މިއަދު ވިދާޅުވެއްޖެ އެވެ.

އދ.ގެ ސަލާމަތީ މަޖިލީހުގެ ގޮނޑީގެ އިންތިޚާބު މާދަމާ އޮންނައިރު، ރާއްޖެ އިން ވަނީ ވަރަށް ވަރުގަދަ ކެމްޕޭނެއް ކޮށްފަ އެވެ. ނިއު ޔޯކްގައި ހުންނަ އދ.ގެ މައި މަރުކަޒުގައި ބާއްވާ އދ.ގެ އާންމު މަޖިލީހުގެ ބައްދަލުވުމުގައި ނަގާ މި ވޯޓުގައި، ސަލާމަތީ މަޖިލީހުގެ ގޮނޑިއަކަށް އޭޝިއާ ސަރަހައްދުން ރާއްޖޭގެ އިތުރުން ވާދަކުރަނީ އިންޑޮނީޝިއާ އެވެ.

ނިއު ޔޯކްގައި ހުންނަވައި ޝައިނީ "މިހާރު" އަށް ވިދާޅުވީ ކުޑަ ގައުމެއްގެ ގޮތުގައި އޮވެ، އދ.ގެ އެންމެ ބާރު ގަދަ ގުނަވަން ކަމަށްވާ ސަލާމަތީ މަޖިލީހުގެ ގޮނޑި ކާމިޔާބުވުމަކީ ރާއްޖެ އަށް ލިބޭނެ ވަރަށް ބޮޑު ފަޚުރެއް ކަމަށެވެ. ރައީސް އަބްދުﷲ ޔާމީންގެ އިރުޝާދާއެކު، އެކަމަށްޓަކައި ރާއްޖެ އިން ކެމްޕޭންކޮށް ގިނަ ގައުމުތަކުގެ ވޯޓު ކަށަވަރުކޮށްފައިވާ ކަމަށް ވެސް ވިދާޅުވި އެވެ.

"ޔޫއެންގައި ހިމެނޭ 192 ގައުމުގެ ތެރެއިން ވަރަށް ގިނަ ގައުމުތަކުގެ ތާއީދު ރާއްޖެ އަށް އެބައޮތް. ރާއްޖޭގެ ވައުދުތަކަކީ ގައުމުތަކުން ބަލައިގަންނަ، ގަބޫލުކުރާ ވައުދުތަކެއް. އެހެންވީމަ އަޅުގަނޑުމެންނަށް ވަރަށް ބޮޑު އުއްމީދަކާއި ޔަގީންކަމެއް އެބައޮތް ރާއްޖެ އަށް ކާމިޔާބީ ލިބޭނެ ކަމަށް،" ސިޔާސީ ކަންކަމުގައި ސަރުކާރު ތަމްސީލް ކުރައްވާ އިސް މަންދޫބު ޝައިނީ ވިދާޅުވި އެވެ.

އޭނާ ވިދާޅުވި ގޮތުގައި ވަރަށް ގިނަ ގައުމުތަކަކުން ރާއްޖެ އަށް ތާއީދުކޮށްގެން ތިއްބައި، އިދިކޮޅު ފަރާތްތަކުން ކުރި އެންޓި ކެމްޕޭނެއްގެ ސަބަބުން ރާއްޖެ އަށް ވޯޓުތަކެއް ގެއްލުން އެކަށީގެންވެ އެވެ. ރާއްޖެއާ ގުޅޭ ގޮތުން ނޭދެވޭ ތަސައްވަރެއް ބޭރުގެ އެކި ގައުމުތަކަށްދީ، ވޯޓު ކާމިޔާބު ވިޔަނުދޭން، ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދާއި ކުރީގެ ފޮރިން މިނިސްޓަރު އަހްމަދު ނަސީމް މަސައްކަތް ކުރެއްވި ކަމުގެ ތުހުމަތު ޝައިނީ މިއަދު ވެސް ކުރެއްވި އެވެ. މީގެ ކުރިން މި ތުހުމަތު ޝައިނީ ކުރެއްވުމުން، އެ ދެ ބޭފުޅުން ވަނީ އެކަން ދޮގު ކުރައްވައިފަ އެވެ.

"ބައެއް ގައުމުތަކާ ދެ ފަހަރު، ތިން ފަހަރު އަޅުގަނޑުމެން ބައްދަލުކޮށްފައި ވާނެ. އެ ބައްދަލުވުންތަކުގައި ވޯޓު ކަށަވަރުކޮށްފައިވީ ނަމަވެސް އެންޓި ކެމްޕޭންގެ ސަބަބުން ގެއްލުނު ވޯޓުތަކެއް އެބަހުރި، އެކަން އެނގިގެން ދާނީ މާދަމާގެ ވޯޓަށް ފަހު،" ޝައިނީ ވިދާޅުވި އެވެ.

ސަލާމަތީ މަޖިލީހުގެ ގޮނޑިއަކަށް ރާއްޖެ ވާދަކުރަނީ އަންނަ އަހަރުން ފެށިގެން 2020 ވަނަ އަހަރުގެ ނިޔަލަށް އޮންނަ ދައުރަށެވެ. މިއީ އެ ސަލާމަތީ މަޖިލީހުގެ މެމްބަރު ކަމަށް ރާއްޖެ ވާދަކުރާ ފުރަތަމަ ފަހަރެވެ.

އދ. ސަލާމަތީ މަޖިލީހުގެ މެމްބަރު ކަމަށް ހޮވޭނީ އދ. ގެ އާންމު މަޖިލީހުގައި ނަގާ ވޯޓުގައި މެމްބަރު ގައުމުތަކުގެ ތެރެއިން ތިން ބައިކުޅަ ދެބައި ގައުމުގެ ވޯޓު ލިބިގެންނެވެ.

ސަލާމަތީ މަޖިލީހުގެ ދާއިމީ މެމްބަރުންގެ ގޮތުގައި ފަސް ގައުމެއް އޮންނައިރު ބާކީ ތިބޭ 10 މެމްބަރުންނަކީ ދެ އަހަރުން ދެ އަހަރުން ދައުރުވާ ވަގުތީ މެމްބަރުންނެވެ. ވަގުތީ މެމްބަރު ކަމަށް އިންތިހާބު ކުރަނީ އެކި ސަރަހައްދުތަކުންނެވެ.

ސަލާމަތީ މަޖިލީހުގެ ދާއިމީ މެމްބަރުންގެ ގޮތުގައި ތިބެނީ ދުނިޔޭގެ ބޮޑެތި ބާރުތައް ކަމަށްވާ އެމެރިކާ އާއި ރަޝިއާ އާއި ޗައިނާ އާއި އިނގިރޭސި ވިލާތް އަދި ފަރަންސޭސި ވިލާތެވެ.