އިކޮނޮމިކް މިނިސްޓަރުގެ ނައިބަކަށް ޝަފީގު އައްޔަން ކުރައްވައިފި

އިކޮނޮމިކް މިނިސްޓަރުގެ ނައިބުގެ މަގާމަށް، ރައްޔިތުންގެ ޚާއްސަ މަޖިލީހުގެ ތ. އަތޮޅުގެ މެމްބަރުކަން ކުރެއްވި، އަހުމަދު ޝަފީގު (ސައްޕެ)، ރައީސް އަބްދުﷲ ޔާމީން މިއަދު އައްޔަން ކުރައްވައިފި އެވެ.

ރައީސް އޮފީހުން ބުނީ، ހ. ރޭޑިއަންޓް، އަހުމަދު ޝަފީގު އިކޮނޮމިކް މިނިސްޓްރީގެ ނައިބުގެ މަގާމަށް އައްޔަން ކޮށްފައިވާ ކަމަށެވެ.

ކުރީގެ ރައީސް މުހައްމަދު ނަޝީދާ ގާތް ގުޅުމެއް އޮތް ޝަފީގު ވަނީ އެމްޑީޕީ ސަރުކާރުގެ ހޯމް މިނިސްޓްރީގެ ސްޓޭޓް މިނިސްޓަރު ކަން ވެސް ކުރައްވައިފަ އެވެ. އަދި ތިމަރަފުށީ ދާއިރާގެ ބައި އިލެކްޝަނަށް އެމްޑީޕީން ކުރިމަތިލާނެ ކެންޑިޑޭޓަކު ހޮވުމަށް ބޭއްވި ޕްރައިމަރީ ގައި ވެސް އޭނާ ވާދަކުރެއްވި އެވެ. ނަމަވެސް، އެ ޕްރައިމަރީން އޭނާ އަށް ވީ ނާކާމިޔާބެވެ.

ވެރިކަން ކުރާ ޕާޓީ، ޕީޕީއެމަށް ސޮއިކުރައްވައި، ރައީސް ޔާމީންގެ ކެމްޕެއިން ހަރަކާތްތަކުގައި ޝަފީގު ހަރަކާތްތެރިވަމުން އަންނަތާ ދުވަސްތަކެއް ވަނީ ވެފަ އެވެ.

ޝަފީގާ އެކު، ޑެޕިއުޓީ މިނިސްޓަރުންގެ ގޮތުގައި އިކޮނޮމިކް މިނިސްޓްރީގައި މިހާރު ތިއްބަވަނީ ފަސް ބޭފުޅެކެވެ.