އަލީ ވަހީދުގެ އަނބިކަނބަލުންނަށް އިސް މަގާމެއް

ޓޫރިޒަމް މިނިސްޓަރު އަލީ ވަހީދުގެ އަނބިކަނބަލުން އައިޝަތު ލީޝާ ފޮރިން މިނިސްޓްރީގެ އިސް މަގާމަކަށް ރައީސް އިބްރާހިމް މުހައްމަދު ސޯލިހު އައްޔަންކުރައްވައިފި އެވެ.

ރައީސް އޮފީހުގެ ވެބްސައިޓުގައިވާ ގޮތުން ޑެޕިއުޓީ މިނިސްޓަރުންގެ ފެންވަރުގައި ލީޝާ ހަމަޖެއްސެވީ ފޮރިން މިނިސްޓްރީގެ ލީގަލް ކައުންސެލަށެވެ. އޭނާ އެ މަގާމަށް ހަމަޖެއްސެވީ މިދިޔަ ހަފުތާގަ އެވެ.

ލީޝާ އަކީ ގާނޫނީ ދާއިރާ އިން ކިޔަވައި ވިދާޅުވެފައިވާ އަދި ބައެއް މައްސަލަތަކުގައި ކޯޓުގައި ވަކާލާތު ކުރައްވާފައިވާ ބޭކަނބަލެއް ވެސް މެ އެވެ. އޭނާ ވަނީ އިންޓނޭޝަނަލް ރިލޭޝަންސް އެންޑް ޑިމޮކްރެޓިކް ޕޮލިޓިކްސް އިން މާސްޓާސް ހައްދަވައިފަ އެވެ.

މީގެ އިތުރުން ލީޝާ ވަނީ ޖުޑިޝަލް ސާވިސް ކޮމިޝަން (ޖޭއެސްސީ) ގެ އެސިސްޓެންޓް ލީގަލް އޮފިސަރުކަމާއި ރައީސް އޮފީހުގެ ސީނިއާ ރިސާޗު އޮފިސަރުކަން ވެސް ކުރައްވައިފަ އެވެ.

ފޮރިން މިނިސްޓްރީގައި މިހާރު ވެސް ޑެޕިއުޓީ މިނިސްޓަރުންގެ ފެންވަރުގައި ހަ ބޭފުޅުން އެބަ ތިއްބެވެ.

މި ސަރުކާރުގައި މިހާރު ޑެޕިއުޓީ މިނިސްޓަރުންގެ ފެންވަރުގައި މަގާމުގައި ތިއްބެވި ބޭފުޅުން ހިމައިގެން 64 ޑެޕިއުޓީ މިނިސްޓަރަކު އެބަތިއްބެވި އެވެ. އޭގެ ތެރެއިން 10 ބޭފުޅަކު ތިއްބެވީ ރައީސް އޮފީހުގަ އެވެ.

ޑެޕިއުޓީ މިނިސްޓަރަކަށް މުސާރަ އާއި އެލަވަންސްގެ ގޮތުގައި ކޮންމެ މަހަކު ލިބިވަޑައިގަންނަވާނީ 30،500ރ. އެވެ. އެއީ 18،000ރ. ގެ މުސާރަ އަކާއި 12،500ރ. ގެ އެލަވަންސެކެވެ.