ގިނަ ރިސޯޓްތަކެއްގައި ވޯޓު ފޮށި ބެހެއްޓުމަކީ ކާމިޔާބީއެއް: މާރިޔާ

ރިސޯޓެއްގައި ވޯޓު ލާން 100 މީހުން ރަޖިސްޓްރީކޮށްފި ނަމަ އެ ރަށެއްގައި ވޯޓު ފޮއްޓެއް ބަހައްޓަން އިލެކްޝަންސް ކޮމިޝަނުން ނިންމުމަކީ ލިބުނު ބޮޑު ކާމިޔާބެއް ކަމަށް އިދިކޮޅު ރިޔާސީ ކެންޑިޑޭޓުގެ ތަރުޖަމާނު މާރިޔާ އަހުމަދު ދީދީ މިއަދު ވިދާޅުވެއްޖެ އެވެ.

އިލެކްޝަންސް ކޮމިޝަނުން މީގެ ކުރިން ހަމަޖައްސާފައި އޮތީ އެންމެ ހަތް ރިސޯޓުގައި ވޯޓު ފޮށި ބެހެއްޓުމަށެވެ. އެގޮތަށް އެކަން ކުރިޔަށް ދިޔަ ނަމަ 10،000 އަށް ވުރެ ގިނަ މީހުންގެ ވޯޓުލުމުގެ ހައްގު ގެއްލޭނެ ކަމުގެ ބިރު އޮތީ ހީވެފަ އެވެ.

ކުރިން އޮތް ގޮތުން ނަމަ ރިސޯޓެއްގައި ވޯޓު ފޮށި ބަހައްޓާނީ މަދުވެގެން 250 މީހުން ރަޖިސްޓްރީކޮށްފި ނަމަ އެވެ.

ނަމަވެސް އެ ނިންމުން އަނބުރާ ގެންދިއުމަށް ފަހު އީސީން ރޭ ހަމަޖެއްސީ ރިސޯޓެއްގައި މަދުވެގެން 100 މީހުން ވޯޓު ލާން ރަޖިސްޓްރީކޮށްފި ނަމަ އެ ރަށެއްގައި ވޯޓު ފޮށި ބަހައްޓާ ގޮތަށެވެ. އެގޮތަށް ދީލައިލީ ވަރަށް ގިނަ ފާޑުކިއުންތައް އަމާޒުވުމުންނެވެ.

މިއަދު ބޭއްވި ނޫސްވެރިންގެ ބައްދަލުވުމުގައި މާރިޔާ ވިދާޅުވީ އީސީގެ ނިންމުން ބަދަލުވީ އެ ކޮމިޝަނަށް އިދިކޮޅު އިއްތިހާދު އަދި އެހެން ވެސް ފަރާތްތަކުން ކުރި ޕްރެޝަރު ބޮޑުވެގެން ކަމަށެވެ.

"ވޯޓުގެ ހައްގު ގެއްލިގެންދާ މީހުންގެ އެއްބާރުލުން ވެސް ލިބިގެން މިގޮތަށް މަސައްކަތް ކުރެވިއްޖެ ކަމަށްވާ ނަމަ ރައީސް ޔާމީން ކިތަންމެ މަކަރެއް ހައްދަވާނަމޭ ހިއްޕުޅަށް އަރުއްވާ ހުންނެވި ކަމުގައިވި ނަމަވެސް އަޅުގަނޑުމެން 23 ސެޕްޓެމްބަރުގެ ވޯޓު ކާމިޔާބު ވާނެ،" މާރިޔާ ވިދާޅުވި އެވެ.

އޭނާ ވިދާޅުވި ގޮތުގައި ނުކުޅެދުންތެރިކަން ހުންނަ މީހުންގެ ވޯޓު ކަރުދާހުގައި އިލެކްޝަންސް ކޮމިޝަނުގެ އޮފިޝަލުން ފާހަގަ ޖަހާ ގޮތަށް އޮތް ނިންމުން ވެސް ބަދަލު ކުރެވޭނެ އެވެ.

"އަޅުގަނޑުމެން އަދިވެސް ދެކެނީ ހާއްސަ އެހީއަށް ބޭނުންވާ ފަރާތްތަކުގެ ހައްގަށް އަރައިގަންނަނީ ކަމަށް. އަދި މި ނޫން ގޮތަށް އެބޭފުޅުން ވިސްނާވަޑައިގަންނަވާ ވޯޓުގެ ކަންތައް ހަމަޖައްސަވައި އެމީހަކު އިހްތިޔާރު ކުރާ ވޯޓުކަން ކަރުދާސް ކޮޅުގައި ޖެހެނީ ޔަގީންވުން އެއީ އަޅުގަނޑުމެން ބޭނުންވާ ކަމެއް،" މާރިޔާ ވިދާޅުވި އެވެ.

އަންނަ ސެޕްޓެމްބަރު 23ގައި ރިޔާސީ އިންތިހާބުގައި ވޯޓު ލުމުގެ ހައްގު ލިބޭ މީހުންގެ އަދަދު 263،000 އަށް އަރަ އެވެ. މުޅި ރާއްޖޭގައި 452 ވޯޓު ފޮށި ބަހައްޓަން ވަނީ ހަމަޖައްސާފަ އެވެ.