މެމްބަރުން ނެތިގެން މިއަދު ވެސް ވޯޓެއް ނުނެގި

ރައްޔިތުންގެ މަޖިލީހުގެ ގާނޫނަށް އިސްލާހު ގެނައުމުގެ ބިލާއި ޕަބްލިކް ސާވިސް މީޑިއާ (ޕީއެސްއެމް)ގެ ގާނޫނަށް އިސްލާހު ގެނައުމުގެ ބިލު ފާސް ކުރުމަށް ވޯޓަށް އެހުމަށް ރައްޔިތުންގެ މަޖިލީހުގެ ރައީސް އަބްދުﷲ މަސީހް މުހައްމަދު އަނެއްކާ މިއަދު ވެސް ދެކޮޅު ހައްދަވައިފި އެވެ.

މިއަދުގެ ޖަލްސާގައި މަސީހު ވިދާޅުވީ ދެ ބިލެއް ފާސް ކުރަން ބަލާ އިރު، އެ ވަގުތު އެކަށީގެންވާ އަދަދަކަށް މެމްބަރުން ހާޒިރުވެވަޑައިގެންފައި ނެތް ކަމަށެވެ. އެކަމަކު، މަޖިލީހަށް ހާޒިރުވެވަޑައިގެން ވޯޓުގައި ބައިވެރިވެވަޑައިގަންނަވަން ޖެހޭނެ ކަން މަޖިލީހުގެ ގަވައިދުގައި ބުނެފައިވާތީ އެއާ އެއްގޮތަށް އަމަލު ކުރުމަށް މަސީހު އެދިވަޑައިގެންނެވި އެވެ.

"މާދަމާ ވެސް އެ މަސައްކަތް ކުރާނެ ވާހަކަ ދަންނަވަން،" ޖަލްސާ ނިންމަވާލައްވަމުން މަސީހް ވިދާޅުވި އެވެ.

މަސީހް އެހެން ވިދާޅުވި އިރު، ދެ ވަނަ ދައުރުގެ ޖަލްސާތައް ފެށުނު ފަހުން ޖަލްސާތަކުގައި ބައިވެރިވެވަޑައިގަންނަވަނީ ހަމައެކަނި ޕީޕީއެމް/އެމްޑީއޭ ކޯލިޝަންގެ މެމްބަރުންނެވެ. ޖަލްސާތަކުގައި އިދިކޮޅު އެއްވެސް މެމްބަރަކު ބައިވެރިވެވަޑައިނުގަންނަވާތާ އަހަރަކަށްވުރެ ގިނަ ދުވަސްވެއްޖެ އެވެ. އެ ބޭފުޅުން ވިދާޅުވަނީ މަސީހުގެ އިތުބާރު ނެތްކަމުގެ މައްސަލަ، މަޖިލީހުގެ އަޣުލަބިއްޔަތުން ހުށަހައަޅާފައި އޮއްވާ އެއަށް ވޯޓަށް ނާއްސަވައި، ރިޔާސަތުގައި މަސީހު އިންނަވައިގެން ޖަލްސާތައް ކުރިއަށް ނުގެންދެވޭނެ ކަމަށެވެ.

މަސީހް މީގެ ކުރިން ވަނީ އިންތިޚާބުތަކާ ގުޅޭ ގާނޫނުތަކަށް ސަރުކާރާއި ޕީޕީއެމުން ހުށަހެޅި އިސްލާހުތަކަށް ވޯޓަށް އަހަން ވެސް ދެކޮޅު ހައްދަވައިފަ އެވެ. އެކަމަކު، ފަހުން، ބިލުތައް ފާސް ކުރީ ރައްޔިތުން އެ މައްޗަށް އަމަލުކުރަން ލާޒިމްކުރާ އެއްވެސް ކަމެއް މަޖިލީހުން ފާސްކުރަން ޖެހޭނީ މަޖިލިހުގެ ދެ ބައިކުޅަ އެއް ބަޔަށް ވުރެ ގިނަ މެމްބަރުން ހާޒިރުވެ ތިބެ ކަމަށް ގާނޫނުއަސާސީގައި ބުނެފައި ވިޔަސް "ޒަރޫރީ ހާލަތްތަކުގައި" އެއަށް ވުރެ މަދުން މެމްބަރުން ތިއްބަސް ވޯޓަށް އެހޭ ގޮތަށް މަޖިލީހުން ކަނޑައެޅުމަށް ފަހު އެވެ.

މަސީހުގެ މި ހުށައެޅުއްވުމުގައި ރައްޔިތުން އެ މައްޗަށް އަމަލުކުރުން ލާޒިމްކުރާ ގާނޫނުތައް ފާސްކުރާ އިރު މަޖިލީހުގެ ދެ ބައިކުޅަ އެއް ބަޔަށް ވުރެ ގިނަ މެމްބަރުން ތިބެން ޖެހޭނެ ކަމަށް ގާނޫނުއަސާސީގައި ބުނެފައިވާ މާއްދާގެ އެއްވެސް ވާހަކައެއް ގެންނަވާފައެއް ނުވެ އެވެ.

ގާނޫނުއަސާސީގެ 87 ވަނަ މާއްދާގައި ބުނަނީ "ރައްޔިތުން އެއަށް އަމަލްކުރުން ލާޒިމްކުރާ އެއްވެސް ކަމެއް ރައްޔިތުންގެ މަޖިލިހުން ފާސްކުރުމަށްޓަކައި ވޯޓަށް އަހަންވާނީ އެ މަޖިލިހުގެ ޖުމްލަ މެމްބަރުންގެ ދެބައި ކުޅަ އެއްބަޔަށް ވުރެ ގިނަ މެމްބަރުން އެ ވޯޓެއް ނަގާ ޖަލްސާގައި ހާޒިރުވެ ތިބޭ ވަގުތެއްގައި" ކަމަށެވެ.

މަޖިލީހުގެ ގަވައިދުގެ 37 ވަނަ މާއްދާގެ (ބ) ގައި ވެސް ހަމަ އެގޮތަށް ވަނީ ކަނޑައަޅާފަ އެވެ. މިހާރުގެ މަޖިލިހުގައި 85 މެމްބަރުން ތިއްބަވާ އިރު ގާނޫނުއަސާސީގައި އެ ބުނާ އަދަދަކީ 43 މެމްބަރުންނެވެ.

މަޖިލީހުގެ އިންތިޚާބުގެ ގާނޫނަށް ސަރުކާރުން ހުށަހެޅި އިސްލާހުގައި ވަނީ ރައްޔިތުންގެ މަޖިލީހުގެ މެމްބަރު ކަމަށް ކުރިމަތިލުމަށް ދައްކަންޖެހޭ ފީ 5،000ރ. ގެ ބަދަލުގައި 15،000ރ. ދައްކަންޖެހޭ ގޮތަށް ބަދަލު ކުރުމަށް ހުށަހަޅައިފަ އެވެ. އަދި ޕީއެސްއެމްގެ ގާނޫނަށް ހުށަހެޅި އިސްލާހުގައި ވަނީ ޕީއެސްއެމްގެ ގަވަނިން ބޯޑަށް ބޭފުޅުން އައްޔަންކުރުމުގެ ބާރު ރައީސަށް ދޭން ނިންމައިފަ އެވެ.