ކެންޑިޑޭޓުންނަށް ވަގުތު ދިނުމުގެ އުސޫލަށް އަމަލުކުރަން ޖެހޭނީ ޚަބަރުތައް ގެނެސްދޭ ބްރޯޑްކާސްޓަރުން އެކަނި

އަންނަ މަހު ބާއްވާ މި އަހަރުގެ ރިޔާސީ އިންތިޚާބުގައި ވާދަކުރައްވާ ކެންޑިޑޭޓުންނަށް ޓީވީ ޗެނަލްތަކުން ވަގުތު ދިނުމާ ގުޅޭ ގޮތުން މޯލްޑިވްސް ބްރޯޑްކާސްޓިން ކޮމިޝަނުން އާންމުކުރި އުސޫލަށް އަމަލުކުރަން ޖެހޭނީ ޚަބަރާއި ރާއްޖޭގެ ސިޔާސީ މަސްރަހުގައި ހިނގާ ކަންކަން ގެނެސްދޭ ބްރޯޑްކާސްޓަރުން އެކަނި ކަމަށް ކަނޑައަޅައި އެ އުސޫލަށް އިސްލާހެއް ގެނެސްފި އެވެ.

މި ރިޔާސީ އިންތިޚާބުގައި ބައިވެރިވާ ކެންޑިޑޭޓުންނަށް ޓީވީ ޗެނަލްތަކުގެ ވަގުތު ދިނުމުގައި، އާންމުކުރި އުސޫލުގައި ކުރިން ބުނެފައިވާ ގޮތުން، ބްރޯޑްކާސްޓް ކުރުމުގެ ހުއްދަ ނަގާފައިވާ ކޮންމެ ފަރާތަކުން ވެސް އެ އުސޫލަށް އަމަލު ކުރަންޖެހެ އެވެ.

އެކަމަކު، އެ އުސޫލުގައި ބުނާ ބްރޯޑްކާސްޓަރުންނަކީ ކޮބައިކަން ބްރޯޑްކާސްޓިން ކޮމިޝަނުން އަލުން މާނަކޮށް، އިސްލާހު މިއަދު ގެޒެޓް ކޮށްފައިވާއިރު، އެ އަށް ފެތެނީ "ޚަބަރާއި ރާއްޖޭގެ ސިޔާސީ މަސްރަހުގައި ހިނގާ ކަންކަން" ގެނެސްދޭ ބްރޯޑްކާސްޓަރުން އެކަންޏެވެ. އަދ ބްރޯޑްކާސްޓް ކުރުމުގެ ގާނޫނުގެ ދަށުން ބްރޯޑްކާސްޓް ކުރުމުގެ ލައިސަންސް ލިބިގެން ބްރޯޑްކާސްޓް ކުރާ ޗެނަލްތަކަށް ވާން ޖެހެ އެވެ.

މިދިޔަ ހޯމަ ދުވަހު ގެޒެޓް ކުރި ކެންޑިޑޭޓުންނަށް ވަގުތު ހުސް ކުރުމާ ބެހޭ އުސޫލަގައި ވަގުތު ވިއްކުން ނުވަތަ ހިލޭ ދިނުން ލާޒިމްވެ އެވެ. ނަމަވެސް އެ ވަގުތުގައި ގާނޫނާ ހިލާފް ކޮންޓެންޓެއް ބްރޯޑްކާސްޓް ކޮށްފި ނަމަ ޒިންމާ ނަގަންޖެހެނީ އެ ސްޓޭޝަނަކުންނެވެ.

އަންނަ މަހުގެ 23 ގައި ބާއްވާ ރިޔާސީ އިންތިޚާބުގައި ވާދަ ކުރައްވާނީ ޕީޕީއެމްގެ ކެންޑިޑޭޓް ރައީސް އަބްދުﷲ ޔާމީނާއި އިދިކޮޅު އިއްތިހާދުގެ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އެވެ.