އާމިރު ހާނާއި އަމީތާބް ބައްޗަންގެ "ތަގްސް އޮފް ހިންދުސްތާން" ގެ ލޯގޯ ދައްކާލައިފި

މި އަހަރުގެ އެންމެ އުންމީދީ އެއް ފިލްމު ކަމަށްވާ، އަމީތާބް ބައްޗަން އާއި އާމިރު ހާން ފުރަތަމަ ފަހަރަށް އެކީގައި ބޮޑު ސްކްރީނުން ފެނިގެންދާ "ތަގްސް އޮފް ހިންދުސްތާން" ގެ ލޯގޯ ދައްކާލައިފި އެވެ.

އެ ފިލްމު އުފައްދާ ޔާޝްރާޖް ފިލްމްސް (ވައިއާރްއެފް) އިން ފިލްމުގެ ލޯގޯ މޯޝަން ޕޯސްޓަރެއްގެ ގޮތުގައި ދައްކައިލުމަށް ފަހު، އަންގާރަ ދުވަހުން ފެށިގެން ފިލްމުގެ މައި ކެރެކްޓާތަކުގެ ލުކްސް ސިލްސިލާކޮށް ދައްކައިލަން ވަނީ ނިންމައިފަ އެވެ. މިއީ މިހާތަނަށް އާމިރާއި އަމީތާބް ވެސް އެންމެ ތަފާތުކޮށް ފެންނާނެ އެއް ފިލްމަށް ވާނެ އެވެ.

އެ ދެ ތަރިންނާ އެކު، "ތަގްސް އޮފް ހިންދުސްތާން" ގެ ބަތަލާއިންގެ ގޮތުގައި ފެނިގެން ދާނީ ކެޓްރީނާ ކެއިފާއި "ޑަންގަލް" އިން ވިދައިލި ބަތަލާ ފާތިމާ ސަނާ ޝެއިފް އެވެ.

ވައިއާރްއެފުން މިހާތަނަށް ބެލުންތެރިންނަށް ގެނެސްދޭ އެންމެ އަގުބޮޑު އަދި އެންމެ ތަފާތު ފިލްމުގެ ގޮތުގައި ސިފަކުރެވޭ "ތަގްސް އޮފް ހިންދުސްތާން" އަކީ "ދޫމް 3" ގެ ޑައިރެކްޓަރު ވިޖޭ (އަޗަރިއާ) ކްރިޝްނާ ލިޔެ، ޑައިރެކްޓްކޮށްފައިވާ ފިލްމެކެވެ.

މީގައި ދައްކުވައިދޭނީ އިނގިރޭސީންގެ އަޅުވެތިކަމުގައި އިންޑިއާ އަށް ދުވަސްވަރުގެ ކަންތައްތަކެކެވެ. ފިލްމްގެ މައިގަނޑު ވާހަކަ ބިނާކޮށްފައި ވަނީ ފިލިޕް މެޑޯ ޓޭލާ 1839 ގައި ނެރުނު ހިޔާލީ ވާހަކަ "ކޮންފެޝަންސް އޮފް އަ ތަގް" އަށެވެ. އޭގައި ކިޔައިދެނީ އަނިޔާވެރި ކަނޑުފޭރޭ ބައެއްގެ ވާހަކަ އެވެ.

އައިމެކްސް ފޯމެޓްގައި ސިނަމާތަކަށް ގެންނަ "ތަގްސް އޮފް ހިންދުސްތާން" އާ ބެހޭ ގޮތުން ވައިއާރްއެފުން ބުނީ މިއީ މިހާތަނަށް ހިންދީ ފިލްމަކުން ބަލައިލަން ނުލިބޭ ކަހަލަ ތަޖުރިބާއެއް ބެލުންތެރިން ސިނަމާތަކުގައި ކުރާނެ ފިލްމެއް ކަމަށެވެ.

ބޮލީވުޑްގެ ވިޔަފާރި ހަބަރުތައް ދިރާސާ ކުރާ މީހުން ވެސް މިހާރު ލަފާ ކުރާ ގޮތުގައި މި ފިލްމުވެގެން ދާނީ ހިންދީ ސިނަމާގެ ބޮކްސް އޮފީހުގައި އާ ރިކޯޑްތަކެއް މުގުރައިލާނެ ފިލްމަކަށެވެ. އަދި ފިލްމަކީ މޮޅު ފިލްމަކަށް ވާނެ ކަމުގެ ޔަގީންކަން އޮތް ކަމަށް ބުނެފައިވެ އެވެ.

މިހާރު ބެލުންތެރިން ޓްރެއިލާގެ އިންތިޒާރުގައި ވެސް ތިބި "ތަގްސް އޮފް ހިންދުސްތާން" ސިނަމާތަކަށް އަންނާނީ ނޮވެމްބަރު 8 ގަ އެވެ.