ހިތްވަރުގަދަ މަޔެއް، ބޭނުންވީ ލުޔެއް، އެހީ ޓްވިޓާ އިން

ޒާރާއަކީ ދަރިއަކު ގޮވައިގެން ބިކަ ހާލުގައި އުޅެން ޖެހި، ދަތި ދިރިއުޅުމެއް އުޅެމުންދާ އެކަނިވެރި މަޔެކެވެ. އޭނާ މަސައްކަތުގައި އުޅޭ އިރު ދަރިފުޅު މުސްކާން ސްކޫލަށާއި އެހެނިހެން ތަންތަނަށް އުފުލަނީ ބައިސްކަލުގަ އެވެ. އެކަމަކު މުސްކާން ބޮޑުވަމުން އަންނަ އިރު، ބައިސްކަލުގައި އޭނާ އިންނަ ގޮނޑި މިހާރު މާ ކުޑަ އެވެ. އާމްދަނީ ހޯދަމުން ދަރިފުޅު ތަންތަނަށް ގެންދަން ޒާރާ އަށް ސައިކަލެއް ކޮންމެހެން ވެސް މުހިއްމެވެ.

މިއީ ދިވެއްސަކާ އިނދެގެން ލިބުނު ކުއްޖަކު ގޮވައިގެން މާލޭގައި ދިރިއުޅެމުން އަންނަ ނޭޕާލްގެ އަންހެނަކަށް ސައިކަލެއް ހޯދައިދިނުމުގެ އުއްމީދުގައި އެހީ އަށް އެދި ޓްވިޓާގައި މީހަކު ކިޔައިދީފައިވާ ވާހަކައެކެވެ. ޒާރާގެ ތަކުލީފުތަކަށް ލުޔެއް ގެނެސްދޭނެ ސައިކަލެއް ގަންނަން ބޭނުންވާ ފައިސާ ހަދިޔާކުރަން އާއްމުކޮށް ފުރުސަތު ހުޅުވާލި ހަސަން ޒަކީ ވަނީ އޭނާ އެ ކަމަށް އިސްނެގި ސަބަބު ތަފްސީލްކޮށް ބުނެދީފަ އެވެ. އެއީ ޒާރާ މަސައްކަތްކުރަން މާލޭގައި އުޅެނިކޮށް 2011ގައި ދިވެއްސަކާ ދިމާވެ، ކައިވެނިކުރި ފަހުން އޭނާ އަށް ކަންތައް ދިމާވި ހިތްދަތި ގޮތެވެ.

ކައިވެންޏަށް ފަހު ފިރިމީހާގެ ރަށުގައި ދިރިއުޅެމުން ގެންދިޔަ އިރު ފިރިމީހާ އާމްދަނީ ހޯދަން މަސައްކަތެއް ނުކުރެ އެވެ. އިސާހިތަކު މުސްކާން ލިބި، ޒާރާ ކުރިން ރައްކާކޮށްފައި ހުރި ހުރިހާ ފައިސާއެއް ހުސްކޮށްލަން ޖެހުނީ އާއިލާގެ ޚަރަދުތައް ބެލެހެއްޓުމަށެވެ. ކައިވެންޏަށް ދެ އަހަރު ވީ ތަނާ، ޒާރާ ވަރިކުރުމަށް ފަހު އެހެން މީހަކާ ކައިވެނިކުރަން ފިރިމީހާ ބޭނުންވި އެވެ. ފިރިމީހާ ޒާރާ ގޮވައިގެން ކޯޓަށް ގޮސް ވަރި ސާބިތުކުރި އަޑުއެހުން ކުރިއަށް ގެންދިޔައީ ދިވެހި ބަހުންނެވެ. ޒާރާ އަށް ދިވެހި ބަސް ރަނގަޅަށް ދޭހަ ނުވާ އިރު، ކޯޓުގައި ދެއްކި ވާހަކަތައް އޭނާ އަށް ތަރުޖަމާ ކޮށްދީފައެއް ނުވެ އެވެ. އަދި މައްސަލައިގައި އޭނާގެ ބަހެއް ހޯދާފައެއް ވެސް ނުވެ އެވެ.

ވަރިކުރި ފިރިމީހާ ޒާރާ އަށް އެންގީ 10 މަހުގެ ދަރިފުޅު ބާއްވާފައި ފެރީ އަށް އަރައިގެން މާލެ ދިޔުމަށެވެ. އެކަމަކު އޭނާ މާލެ އަށް ފުރީ ދަރިފުޅު ގޮވައިގެންނެވެ. ވަންނާނެ ތަނެއް ނެތި، ޒާރާ އާއި މުސްކާން އެ ރޭ ނިދީ ކުރިން މާލޭގައި މަސައްކަތްކުރި އިރު ޒާރާއާ ދިމާވި ބަންގްލަދޭޝް މީހަކު އިތުރު އެތައް ބަޔަކާ އެކު ނިދަން އަރާ މުޑުދާރު ތަނެއްގަ އެވެ. ހެނދުނު ހޭލި އިރު މުސްކާންގެ މުޅި ގައި އޮތީ މަކުނު ހަފައިފަ އެވެ.

ޖެހިގެން އައި ދުވަހު ޒާރާ އަށް ވަކީލަކާ ވާހަކަދައްކަން ފުރުސަތު ލިބުނެވެ. ހިލޭ އެހީތެރިވި އެ ވަކީލު ޒާރާގެ ދެމައިން ވަގުތީ ގޮތުން ތިބޭނެ ތަނެއް ހޯދައިދިނެވެ. އަދި މުސްކާންގެ ގާނޫނީ ބަލަދުވެރިކަން ޒާރާ އަށް ހޯދައިދޭން މަސައްކަތް ފެށި އެވެ.

ހެޔޮ އެދޭ ފަރާތްތަކުގެ އެހީއާ އެކު، ހަޟާނާތުގެ މައްސަލަ ޒާރާ އަށް ކާމިޔާބުވީ ދެ އަހަރު ދުވަހުންނެވެ. އެކަމަކު 2015ގައި ކޯޓުން މައްސަލަ ނިންމީ، މުސްކާންގެ ބައްޕަގެ ހުއްދަ ނެތި އޭނާ ގޮވައިގެން ރާއްޖެ އިން ބޭރަށް ނުދާން ޝަރުތުކޮށްފަ އެވެ. ކުރީގެ ފިރިމީހާގެ ފަރާތުން ޚަރަދެއް ނުލިބި، ޒާރާ އާ ވަޒީފާއެއް ހޯދި އެވެ. ޚަރަދުބަރަދު ހަމަޖައްސަން ކުރާ ބުރަ މަސައްކަތުން ލިބޭ މުސާރައިގެ ބޮޑު ބައި ޒާރާ ހޭދަކުރަނީ މުސްކާން ބަލައިދޭ ޑޭކެއާ އަށް ފައިސާ ދައްކާށެވެ. ރާއްޖޭގައި ހުރުމުގެ ވިސާ އާކުރަން ފައިސާ ދައްކަން ވެސް ކޮންމެ އަހަރަކު ބޮޑު ހޭދައެއް ކުރަން ޖެހެ އެވެ.

އެކަމަކު މާލޭގައި މި ގޮތަށް ގަނަތެޅެން ޖެހުނަސް، ރާއްޖެ އިން ބޭރަށް ދާކަށް މުސްކާންގެ ބައްޕަ ހުއްދައެއް ނުދިނެވެ. އަދި މުސްކާންގެ ޕާސްޕޯޓެއް ވެސް ނެތެވެ. އެންމެ ފަހުން މުސްކާން ސްކޫލަށް ދާން ފެށި އެވެ. އޭނާ ސްކޫލަށާއި އިތުރު ހަރަކާތްތަކަށާއި ޑޭކެއާ އަށް ގެންގޮސް ގެންނަން ޒާރާ ގަތީ ބައިސްކަލެކެވެ. އެކަމަކު މުސްކާން ބޮޑުވަމުން އަންނަ އިރު، ބައިސްކަލް ދޫކޮށްލަން ޒާރާ އަށް ވަނީ މަޖުބޫރުވެފަ އެވެ. ބައިސްކަލުގައި މުސްކާން ބައިންދާ ގޮނޑި އޭނާ އަށް މިހާރު ކުޑަވެއްޖެ އެވެ. ފުލުހުން މަގުމަތިން ޒާރާ ހުއްޓުވައިގެން އެކަން ނުކުރަން ވެސް އަންގަ އެވެ.

މި ވާހަކަ ކިޔައިދިނުމަށް ފަހު ހަސަން ބުނީ މަސައްކަތުގައި އުޅެމުން މުސްކާންގެ ކަންކަން ފުރިހަމަކޮށްދެވޭނެ ގޮތެއް ޒާރާ އަށް ފަހިކޮށްދޭން އޭނާ އަށް ސައިކަލެއް ހޯދައިދިނުން މުހިއްމު ކަމަށެވެ. އެހެންވެ، އެ ކަމަށް އެހީތެރިވާން ބޭނުންވާ މީހުން އެކައުންޓަކަށް ފައިސާ ޖަމާކުރަން އޭނާ ވަނީ އެދިފަ އެވެ.

ޓްވިޓާގައި ގިނަ ބައެއްގެ ސަމާލުކަން މި ކަމަށް ލިބި، ބައެއް މީހުން ވަނީ ފައިސާ ހަދިޔާކޮށްފަ އެވެ. ބައެއް މީހުން ފުރަތަމަ ބޭނުންވީ މި ވާހަކައިގެ ތެދު ދޮގު ކަށަވަރުކުރެވޭނެ ގޮތެކެވެ. އެހެންވެ، ހަސަން ވަނީ ޒާރާ އަށް ހިލޭ މަސައްކަތްކޮށްދިން ދެ ވަކީލެއްގެ ފޯނު ނަމްބަރު ދީފަ އެވެ. އަދި ބޭނުންވާ ހުރިހާ މައުލޫމާތަކާއި ލިޔެކިޔުން އެ މީހުން ފޯރުކޮށްދޭނެ ކަމަށް އޭނާ ބުންޏެވެ.

މިހާތަނަށް ޒާރާގެ ދެމައިންނަށް ލިބުނު އެންމެ ބޮޑު އެހީއަކީ ލޮޓަސް ކުންފުނީގެ ޑިސްކައުންޓެކެވެ. ހަސަންގެ ޓްވީޓްތަކަށް އިޖާބަދެއްވަމުން އެ ތަނުގެ މެނޭޖިން ޑިރެކްޓަރު ޒައިނަލް އާރިފް ކުރެއްވި ޓްވީޓެއްގައި ވިދާޅުވީ 50 ޕަސެންޓުގެ ޑިސްކައުންޓަކާ އެކު ޒާރާ އަށާއި މުސްކާން އަށް ލޮޓަސް ފިހާރައިގައި ސައިކަލެއް ތައްޔާރުކޮށްފައި އެބަ ހުރި ކަމަށެވެ.